మరో రెండు, మూడు వారాల్లో కీలక బిల్లులు..

రాజ్యసభ సమావేశాలను తాత్కాలికంగా వాయిదా వేసినా, త్వరలో మళ్లీ సమావేశమవుతామని పార్లమెంటరీ వ్యవహారాల మంత్రి కిరణ్ రిజిజు తెలిపారు. కీలక బిల్లులపై చర్చలు కొనసాగుతున్నాయని, వచ్చే 2–3 వారాల్లో ముఖ్యమైన బిల్లును తీసుకురానున్నామని చెప్పారు.

లోక్‌సభ సీట్ల పెంపు?

మరోవైపు మహిళా రిజర్వేషన్ చట్టం అమలుకు కేంద్రం వేగంగా ముందుకు సాగుతోంది. ఇందుకోసం కనీసం రెండు బిల్లులను తీసుకురావాలని యోచిస్తోంది. అదే సమయంలో లోక్‌సభ సీట్లను ప్రస్తుత సంఖ్య 546 నుంచి 861కి పెంచే ప్రతిపాదనను కూడా పరిశీలిస్తోంది.

డీలిమిటేషన్‌ను జనాభా లెక్కలతో అనుసంధానించాలా? లేదా? వేరుచేయాలా? అనే అంశంపై ప్రతిపక్షాలతో చర్చలు జరుగుతున్నట్లు సమాచారం.

రాజ్యసభలో కాంగ్రెస్ నేత జైరాం రమేష్ ఈ అంశంపై ప్రశ్నించగా, ప్రభుత్వం బడ్జెట్ సమావేశాలను నిరవధికంగా వాయిదా వేయబోదని రిజిజు స్పష్టం చేశారు. మరోవైపు, ప్రతిపక్షాలు అఖిలపక్ష సమావేశం నిర్వహించాలని డిమాండ్ చేశాయి.

మహిళా రిజర్వేషన్ బిల్లుకు నిజంగా కట్టుబడి ఉంటే 2023లోనే ఎందుకు తీసుకురాలేదని ప్రతిపక్ష నాయకుడు మల్లికార్జున ఖర్గే ప్రశ్నించారు. ఎన్నికల ముందు ఈ బిల్లులు తీసుకురావడం రాజకీయ ప్రయోజనాల కోసమేనని ఆరోపించారు.

ఈ విమర్శలకు స్పందించిన రిజిజు, మహిళలకు ఇచ్చిన హామీని అమలు చేయడంలో ప్రభుత్వం కట్టుబడి ఉందని చెప్పారు. ఈ అంశాన్ని రాజకీయ కోణంలో చూడవద్దని స్పష్టం చేశారు.

మొత్తంగా మహిళా రిజర్వేషన్ అమలుపై కేంద్రం ముందడుగు వేస్తున్నా.. దాని చుట్టూ రాజకీయ వాదోపవాదాలు కొనసాగుతున్నాయి.