నారా వారు..నేర్చకుంటూనే ఉంటారు

టీడీపీ పార్టీ ఆఫీసులో శిక్షణ తరగతులు జరుగుతున్నాయి.. అంతా సీరియస్‌గా నోట్స్ రాసుకుంటున్నారు. సరిగ్గా అదే సమయంలో మంగళవారం ముఖ్యమంత్రి చంద్రబాబు నాయుడు హఠాత్తుగా గదిలోకి ప్రవేశించారు. అయితే ఆయన వెళ్ళింది వేదిక ఎక్కి ఉపన్యాసం ఇవ్వడానికి కాదు. ఒక సామాన్య శిక్షార్థిలా మారి పాఠాలు వినడానికి. అక్కడ మాజీ మంత్రి పత్తిపాటి పుల్లారావు క్లాస్ చెబుతుంటే, ఏమాత్రం హడావుడి చేయకుండా అందరి మధ్యలో కూర్చొని ఒక క్రమశిక్షణ గల కార్యకర్తలా చంద్రబాబు విన్న తీరు అక్కడున్న వారిని ఆశ్చర్యపరిచింది. తనకున్న అపారమైన రాజకీయ అనుభవాన్ని పక్కన పెట్టి, పార్టీ భావజాలం.. కార్యకర్తల ప్రాధాన్యం గురించి చెబుతున్న ప్రతి మాటను ఆయన శ్రద్ధగా గమనించారు. అటు ముఖ్యమంత్రి కార్యకర్తలతో కలిసి పాఠాలు వింటుంటే, ఇటు మంత్రి నారా లోకేష్ ప్రతి బృందం దగ్గరకు వెళ్లి, సభ్యులతో ముచ్చటిస్తూ క్షేత్రస్థాయిలో ఏం జరుగుతుందో తెలుసుకోవడం గమనార్హం. తండ్రీకొడుకులిద్దరూ ఇలా క్యాడర్‌తో మమేకమై ’నాయకుడంటే నిర్దేశించడమే కాదు.. అందరితో కలిసి నడవడమే అని నిరూపించారని ఆ పార్టీ శ్రేణులు చర్చించుకుంటున్నారు.