హీటెక్కిస్తోన్న ముద్రగడ ’అండీ‘ అస్త్రాలు
కాపుల మీద అంతగా కోపం ఉంటే, కట్టుబట్టలతో వేరే రాష్ట్రానికి పంపించే కార్యక్రమం చేయండి చంద్రబాబు గారు ’అండీ‘ అంటూ ముద్రగడ భావోద్వేగంగా స్పందించారు.
ఆంధ్రప్రదేశ్ రాజకీయాల్లో తనదైన ’లేఖాస్త్రాల‘తో సంచలనం సృష్టించే ముద్రగడ పద్మనాభ రెడ్డి, మరోసారి కలానికి పదును పెట్టారు. సోమవారం నాడు ముఖ్యమంత్రి చంద్రబాబు నాయుడు, మంత్రి నారా లోకేష్లను ఉద్దేశించి ఆయన రాసిన బహిరంగ లేఖ ఇప్పుడు రాష్ట్రవ్యాప్తంగా ప్రకంపనలు సృష్టిస్తోంది. ప్రతి వాక్యంలోనూ ఎంతో వినమ్రంగా ’అండీ.. అండీ..‘ అంటూ సంబోధిస్తూనే, కూటమి ప్రభుత్వంపై మునుపెన్నడూ లేనంత పదునైన విమర్శలు గుప్పించారు. ఏపీలో ప్రస్తుతం సాగుతున్నది రాక్షస పాలన అని అభివర్ణించిన ఆయన, ఒక అడుగు ముందుకు వేసి.. ప్రధాని మోదీని కోరి రాష్ట్రంలో ’ఎమర్జెన్సీ‘ పెట్టించమంటూ సంధించిన వ్యంగ్యాస్త్రాలు ఇప్పుడు సోషల్ మీడియాలో టాప్ ట్రెండింగ్గా మారాయి.
ఇది దమనకాండ కాదా అండీ?
ముద్రగడ తన లేఖను ఎంతో మర్యాదగా ప్రారంభిస్తూనే, ప్రభుత్వ తీరుపై నిప్పులు చెరిగారు. ’ఈ మధ్య కాలంలో గాడి తప్పిన మీ రాక్షస పాలనలో సాగుతున్న దహనకాండను కళ్ళారా చూస్తున్నానండి‘ అంటూ నేరుగా బాబు, లోకేష్లనే ప్రశ్నించారు. భారతదేశంలో ఎక్కడైనా ఇటువంటి పరిపాలన ఉందా అని నిలదీస్తూ, శాంతిభద్రతల పరిస్థితిపై తనదైన శైలిలో విసుర్లు విసిరారు.
ఎమర్జెన్సీ పెట్టమని అడగండి.. అప్పుడైనా మీకు తృప్తి కలుగుతుందండి
ప్రతిపక్ష నేతల ఇళ్లపై దాడులు, అక్రమ కేసులు పెట్టడం కంటే.. ప్రధానమంత్రి మోదీని కోరి ఏపీలో ’ఎమర్జెన్సీ‘ పెట్టించమని ముద్రగడ ఉచిత సలహా ఇచ్చారు. ’ఇంతలా వేధించే బదులు ఎమర్జెన్సీ పెడితే.. మీ పదవీ కాలం ముగిసే వరకు ప్రతిపక్షాన్ని నిశ్చింతగా జైల్లోనే ఉంచుకోవచ్చు కదండీ‘ అంటూ ఆయన సంధించిన వ్యంగ్యాస్త్రం ఇప్పుడు రాజకీయ వర్గాల్లో హాట్ టాపిక్గా మారింది.
లడ్డూ వివాదం.. నివేదికతో మీ గౌరవం పోయిందండి
తిరుమల లడ్డూ నెయ్యి కల్తీ అంశంపై చంద్రబాబు చేసిన వ్యాఖ్యలను ముద్రగడ తీవ్రంగా తప్పుబట్టారు. ’లడ్డూలో కల్తీ జరగలేదని సీబీఐ నివేదికతో మీరు చెప్పింది పచ్చి అబద్ధమని తేలిపోయిందండి. ఆ అబద్ధాన్ని కప్పిపుచ్చుకోవడానికే ఇప్పుడు మాజీ మంత్రులపై దాడులకు పాల్పడుతున్నారు. తప్పు జరిగిందని ముందే ఒప్పుకుని ఉంటే మీ గౌరవం పెరిగేదండి‘ అంటూ గతంలో తన తండ్రి చెప్పిన ’అబద్ధం ఆడవద్దు‘ అనే సూక్తిని లేఖలో ఉదహరించారు.
కాపులనే టార్గెట్ చేస్తున్నారా? అయితే మమ్మల్ని వెళ్లగొట్టండి అండీ
ప్రభుత్వం ఉద్దేశపూర్వకంగా కాపు సామాజికవర్గ నేతలను లక్ష్యం చేసుకుంటోందని ముద్రగడ ఆవేదన వ్యక్తం చేశారు. మాజీ మంత్రులు అంబటి రాంబాబు, జోగి రమేష్, విడదల రజినిల ఇళ్లపై దాడులను ప్రస్తావిస్తూ.. ’కాపు కులాన్ని మీరు ప్రత్యేకంగా టార్గెట్ చేస్తున్నారండి. గతంలో నా కుటుంబాన్ని, ఇప్పుడు అంబటి కుటుంబాన్ని రోడ్డుకీడ్చారు. మీకు అంతగా కోపం ఉంటే, ఈ కులాన్ని కట్టుబట్టలతో వేరే రాష్ట్రానికి పంపించే కార్యక్రమం చేయండి అండీ‘ అంటూ భావోద్వేగంగా స్పందించారు.
పవన్ కల్యాణ్ ప్రస్తావన..వారిపై ప్రేమతోనే ఓట్లు వేశారండి
రాష్ట్రంలో కూటమి విజయానికి కారణాలను విశ్లేషిస్తూ పవన్ కల్యాణ్ అంశాన్ని ముద్రగడ ప్రస్తావించారు. చంద్రబాబు గారు.. మీరు జైల్లో ఉన్నప్పుడు డీలా పడిన మీ కార్యకర్తలను రోడ్డుపైకి తెచ్చింది పవన్ కల్యాణ్ గారేనండి. కాపులకు మీ మీద కోపం ఉన్నా, పవన్ మీద ప్రేమతోనే మీకు మద్దతు ఇచ్చారు. అటువంటి కాపు నేతలను ఇప్పుడు వేధించడం ఎంతవరకు న్యాయం అండీ? అని ప్రశ్నిస్తూ లోకేష్కు కూడా చురకలంటించారు.
రాజకీయ సెగ.. సోషల్ మీడియాలో రచ్చ
ముద్రగడ పద్మనాభ రెడ్డి లేఖ బయటకు వచ్చిన నిమిషాల వ్యవధిలోనే నెట్టింట దావానలంలా వ్యాపించింది. ముఖ్యంగా ఆయన ప్రతి వాక్యానికి చివర వాడిన ’అండీ‘ అనే సంబోధన, దాని వెనుక దాగి ఉన్న అత్యంత ఘాటైన విమర్శలు నెటిజన్లను విపరీతంగా ఆకర్షిస్తున్నాయి. ’మర్యాదగా చెబుతూనే మాడు పగిలేలా చురకలు అంటించారు‘ అంటూ సోషల్ మీడియా వేదికలపై ఈ లేఖ స్క్రీన్ షాట్లు తెగ వైరల్ అవుతున్నాయి. రాజకీయ విశ్లేషకుల నుంచి సామాన్య ప్రజల వరకు ప్రతి ఒక్కరూ ముద్రగడ మార్కు ’వినమ్ర విమర్శ‘పైనే చర్చించుకుంటున్నారు.
వైఎస్సార్సీపీ జైత్రయాత్ర.. టీడీపీ ఎదురుదాడి
ఈ లేఖతో వైఎస్సార్సీపీ (YSRCP) శ్రేణులకు సరికొత్త ఆయుధం దొరికినట్లయింది. ’ముద్రగడ గారు పక్కాగా ప్రశ్నించారు.. ప్రభుత్వ అరాచకాలను అద్దం పట్టారు‘ అంటూ వైసీపీ సోషల్ మీడియా వింగ్ ఈ లేఖను పెద్ద ఎత్తున షేర్ చేస్తోంది. మరోవైపు, టీడీపీ (TDP) నేతలు కూడా ఏమాత్రం తగ్గకుండా కౌంటర్ ఎటాక్ మొదలుపెట్టారు. ముఖ్యంగా బుద్ధా వెంకన్న వంటి నేతలు రంగంలోకి దిగి, ముద్రగడ గతంలో చేసిన ప్రతిజ్ఞలను, తన పేరును మార్చుకున్న అంశాలను ప్రస్తావిస్తూ ఎద్దేవా చేస్తున్నారు. ’అప్పుడు లేని కులప్రేమ ఇప్పుడు పుట్టుకొచ్చిందా?‘ అంటూ పాత అంశాలను తెరపైకి తెస్తుండటంతో సోషల్ మీడియాలో ’హాష్ ట్యాగ్‘ వార్ ముదిరి పాకాన పడింది.
’రెడ్డి‘ గారూ..అసూయ ఎందుకండీ? ముద్రగడకు బుద్ధా వెంకన్న కౌంటర్
ముద్రగడ లేఖ బయటకు వచ్చిన కొద్దిసేపటికే బుద్ధా వెంకన్న తనదైన శైలిలో విమర్శలు గుప్పించారు. అసూయతో రాతలు రాయడం మానుకోండి ముద్రగడ పద్మనాభ రెడ్డి గారూ అంటూ సంబోధిస్తూనే పదునైన ప్రశ్నలు వేశారు.
కులం ఇప్పుడే గుర్తొచ్చిందా అండీ?: ’పవన్ కల్యాణ్ గారి తల్లిని, భార్యను గతంలో వైసీపీ నేతలు అసభ్య పదజాలంతో దూషించినప్పుడు మీకు కులం గుర్తుకు రాలేదా అండీ? అప్పుడు మీ మౌనం వెనుక ఉన్న రహస్యం ఏంటో చెప్పండి?‘ అని నిలదీశారు.
చంద్రబాబు చలవ మరిచారా?: ’1994లో మీరు ఓడిపోయి రాజకీయ సన్యాసం తీసుకుంటానంటే.. పిలిచి ఎంపీ టికెట్ ఇచ్చి గెలిపించిన చంద్రబాబు గారిని విమర్శించడానికి మీకు మనసెలా ఒప్పిందండీ?‘ అంటూ పాత జ్ఞాపకాలను గుర్తు చేశారు.
రాక్షస పాలన ఎవరిది?: ’గత ఐదేళ్లలో వైసీపీ హయాంలో జరిగిన దమనకాండ రాక్షస పాలన కాదా అండీ? అప్పుడు మీ కలం ఎందుకు కదలలేదు? ఇప్పుడు చట్టం తన పని తాను చేసుకుపోతుంటే దానికి కులాన్ని ఎందుకు ఆపాదిస్తున్నారండీ?‘ అని చురకలు అంటించారు.
సోషల్ మీడియాలో ’మీమ్స్‘ వర్షం
ముద్రగడ తన లేఖలో ప్రస్తావించిన ’రాష్ట్రంలో ఎమర్జెన్సీ పెట్టండి‘ అనే వ్యాఖ్య ఇప్పుడు మీమ్స్ క్రియేటర్లకు హాట్ కేక్లా మారింది. ముద్రగడ తన లేఖలో ’రాష్ట్రంలో ఎమర్జెన్సీ పెట్టండి‘ అని చేసిన వ్యాఖ్యపై సోషల్ మీడియాలో విపరీతమైన మీమ్స్ చక్కర్లు కొడుతున్నాయి. ముద్రగడ ఫోటో కింద ’నేను పేరు మార్చుకున్నాను.. కానీ నా లేఖల శైలి మార్చుకోను‘ అనే క్యాప్షన్తో ట్రోల్స్ వస్తున్నాయి. ’అండీ.. అండీ అంటూనే గూబ గుయ్ మనిపించారు‘ అని వైసీపీ కార్యకర్తలు ఒక పక్క, మీమ్స్ యుద్ధం చేస్తున్నారు. ’రెడ్డి‘ గారు అనే పదాన్ని బుద్ధా వెంకన్న పదే పదే వాడటంతో, నెటిజన్లు కూడా అదే హాష్ ట్యాగ్తో ముద్రగడ పేరు మార్పు ఉదంతాన్ని మళ్లీ ట్రోల్ చేస్తున్నారు. ముద్రగడ సంధించిన ’అండీ‘ అస్త్రాలకు.. టీడీపీ నేతలు ’రిటర్న్ గిఫ్ట్‘ విమర్శలతో సమాధానం చెప్పడంతో ఏపీ రాజకీయాల్లో ఒక్కసారిగా పొలిటికల్ హీట్ పెరిగింది.
