మద్యం కుంభకోణంలో మజిలీలెన్నో

సిట్ (SIT) నివేదిక ప్రకారం.. ఈ స్కామ్ ఏదో ఒక రోజులో జరిగింది కాదు. ప్రతినెలా సగటున రూ. 50 నుండి రూ. 60 కోట్ల మేర కమీషన్లు చేతులు మారాయని అధికారులు గుర్తించారు. మద్యం సరఫరా, అమ్మకాలు, లైసెన్సుల విషయంలో జరిగిన ఈ అవినీతి నెట్‌వర్క్ చాలా లోతుగా పాతుకుపోయిందని దర్యాప్తు సంస్థలు చెబుతున్నాయి.

తాజా పరిణామం.. చెవిరెడ్డికి విముక్తి

జనవరి 29, 2026న ఈ కేసులో అతిపెద్ద మలుపు చోటుచేసుకుంది. వైకాపా మాజీ ఎమ్మెల్యే చెవిరెడ్డి భాస్కర్ రెడ్డి సుదీర్ఘంగా 226 రోజుల పాటు జైలులో గడిపిన తర్వాత, హైకోర్టు షరతులతో కూడిన బెయిల్ మంజూరు చేయడంతో విడుదలయ్యారు. ఆయనతో పాటు మరో కీలక నేత సజ్జల శ్రీధర్ రెడ్డి, చెరుకూరి వెంకటేష్ నాయుడులకు కూడా న్యాయస్థానం ఊరటనిచ్చింది.

మొత్తం 33 మందిని నిందితులు

ఈ భారీ కుంభకోణానికి సంబంధించి సిట్ (SIT) దాఖలు చేసిన చార్జిషీటులో మొత్తం 33 మందిని నిందితులుగా చేర్చారు. ఇందులో వ్యక్తులతో పాటు ఈ అక్రమ లావాదేవీలకు వేదికైన 19 కంపెనీల పేర్లు కూడా ఉన్నాయి. దర్యాప్తులో భాగంగా పోలీసులు ఇప్పటివరకు 12 మందిని అరెస్టు చేయగా, వారిని విజయవాడ, గుంటూరు జిల్లా జైళ్లకు తరలించారు. అయితే, న్యాయస్థానాల్లో సుదీర్ఘ వాదనల తర్వాత, అరెస్టు అయిన వారిలో 9 మంది ఇప్పటికే బెయిల్‌పై విడుదలయ్యారు. తాజాగా 226 రోజుల రిమాండ్ తర్వాత విడుదలైన మాజీ ఎమ్మెల్యే చెవిరెడ్డి భాస్కర్ రెడ్డితో పాటు, ఎంపీ మిథున్ రెడ్డి, రిటైర్డ్ ఐఏఎస్ అధికారి ధనుంజయ రెడ్డి వంటి వారు ప్రస్తుతం బయట ఉన్నారు.

రాజ్ కేసిరెడ్డికి ఎదురుదెబ్బ

అయితే, ఈ కేసులో కింగ్‌పిన్గా భావిస్తున్న ప్రధాన నిందితుడు (A1) రాజ్ కేసిరెడ్డికి మాత్రం హైకోర్టులో గట్టి ఎదురుదెబ్బ తగిలింది. సుమారు రూ. 135 కోట్ల నిధుల మళ్లింపులో ఆయనకు ప్రత్యక్ష సంబంధం ఉందని భావిస్తున్న కోర్టు, ఆయన బెయిల్ పిటిషన్‌ను నిర్ద్వంద్వంగా తోసిపుచ్చింది. దీంతో ఆయన ఇంకా జైలులోనే కొనసాగుతున్నారు. మరోవైపు, ఏడో నిందితుడిగా ఉన్న ముప్పిడి అవినాష్ రెడ్డి ఇప్పటికీ పోలీసులకు చిక్కకుండా పరారీలో ఉండటం గమనార్హం. ఆయన దాఖలు చేసిన ముందస్తు బెయిల్ పిటిషన్‌ను సైతం కోర్టు కొట్టివేయడంతో, ఆయన కోసం గాలింపు చర్యలు ముమ్మరమయ్యాయి.

వీడిన జైలు సంకెళ్లు..

మొదట్లో ఈ కేసు తీవ్రత చూసి, నిందితులకు బెయిల్ రావడం ఇప్పట్లో సాధ్యం కాదని అందరూ భావించారు. కానీ, కాలక్రమేణా న్యాయపోరాటం చేస్తూ ఒక్కొక్కరుగా కీలక నేతలు, అధికారులు బయటకు వస్తున్నారు. ఈ బెయిల్ పర్వానికి గతేడాది సెప్టెంబర్‌లోనే వైసీపీ ఎంపీ పి.వి. మిథున్ రెడ్డి నాంది పలికారు. అప్పట్లో ఆయన బెయిల్ పొందడం రాష్ట్రవ్యాప్తంగా చర్చనీయాంశమైంది. ఆయన బాటలోనే పాలనా యంత్రాంగంలో కీలక పాత్ర పోషించిన రిటైర్డ్ ఐఏఎస్ అధికారి ధనుంజయ రెడ్డి, మాజీ సీఎం అత్యంత నమ్మకస్తుడు, ఓఎస్డీ (OSD) కృష్ణమోహన్ రెడ్డి కూడా జైలు గోడల నుంచి విముక్తి పొందారు. వీరితో పాటు వ్యాపార వర్గాల్లో సంచలనం సృష్టించిన భారతి సిమెంట్స్ డైరెక్టర్ బాలాజీ గోవిందప్ప కూడా బెయిల్ దక్కించుకోవడంతో, ఈ కేసులో అరెస్ట్ అయిన ప్రముఖుల్లో అత్యధికులు ప్రస్తుతం బయటే ఉన్నారు. ఒకప్పుడు కట్టుదిట్టమైన రిమాండ్‌లో ఉన్న వీరంతా ఇప్పుడు షరతులతో కూడిన స్వేచ్ఛను అనుభవిస్తున్నారు.

క్లైమాక్స్ కి చేరిందా..అసలు ఆట ఇప్పుడే మొదలైందా

వందల కోట్ల కమీషన్లు, పక్కా స్కెచ్‌తో సాగిన ఈ లిక్కర్ డీల్ ఇప్పుడు న్యాయస్థానాల వేదికగా ఒక ఉత్కంఠభరిత క్లైమాక్స్‌కు చేరుకుంది. నెలల తరబడి సాగిన జైలు జీవితం, ఎడతెగని విచారణల తర్వాత అరెస్టు అయిన 12 మందిలో 9 మంది ఇప్పటికే బయటకు రావడంతో కేసు కొంత చల్లబడినట్లు కనిపిస్తోంది. కానీ, ఇది కేవలం తుపాను ముందు ప్రశాంతత మాత్రమేనని విశ్లేషకులు భావిస్తున్నారు. ఎందుకంటే, ఈ భారీ కుంభకోణానికి అసలు సూత్రధారిగా భావిస్తున్న A1 రాజ్ కేసిరెడ్డి ఇంకా జైలు ఊచల వెనుకే ఉండటం, మరికొందరు కీలక నిందితులు పరారీలో ఉండటంతో ఈ కేసులో అసలు గుట్టు ఇంకా పూర్తిగా విప్పాల్సి ఉంది. చట్టం తన పని తాను చేసుకుపోతున్నా, తెర వెనుక అసలు బిగ్ బాస్ ఎవరన్నది తేలాల్సి ఉంది. చివరకు న్యాయస్థానం ఈ రూ. 3,500 కోట్ల లెక్కలను ఎలా తేలుస్తుంది? నిందితులకు శిక్ష పడుతుందా లేక ఈ కథ మరో అనూహ్య మలుపు తిరుగుతుందా? అన్నది కాలమే నిర్ణయించాలి.