నితీష్ కుమార్ రాజ్యసభకు? బీహార్ రాజకీయాల్లో ఉత్కంఠ

బీహార్ రాజకీయాల్లో కీలక పరిణామం చోటుచేసుకోబోతోందన్న ఊహాగానాలు జోరందుకున్నాయి. రెండు దశాబ్దాలుగా ముఖ్యమంత్రిగా కొనసాగుతున్న నితీష్ కుమార్ రాజ్యసభకు వెళ్లనున్నారనే వార్తలు రాజకీయ వర్గాల్లో చర్చనీయాంశంగా మారాయి.

గత నవంబర్‌లో జరిగిన అసెంబ్లీ ఎన్నికల్లో ఎన్‌డీఏ ఘన విజయం సాధించిన తరువాత ఈ పరిణామం ప్రాధాన్యత సంతరించుకుంది. నితీష్ కుమార్ రాజ్యసభ నామినేషన్ పత్రాలు సిద్ధంగా ఉన్నాయని, ఆయన సంతకం మాత్రమే మిగిలి ఉందని తెలుస్తోంది. మార్చి 5న నామినేషన్ దాఖలు చేసే అవకాశముందని బీహార్ బీజేపీ యూనిట్ చీఫ్ సంజయ్ సరోగి వెల్లడించారు. నామినేషన్‌కు అదే చివరి తేదీ. రాజ్యసభ ఎన్నికలు మార్చి 16న జరగనున్నాయి.

మార్చి 1న 75వ పుట్టినరోజు జరుపుకున్న నితీష్ భవిష్యత్తుపై రాష్ట్ర రాజకీయాల్లో విస్తృత చర్చలు జరుగుతున్నాయి. 2005 నుంచి ముఖ్యమంత్రిగా కొనసాగుతున్న ఆయన తర్వాతి వారసుడు ఎవరు అనే ప్రశ్న ముందుకు వచ్చింది. ఈ నేపథ్యంలో ఆయన కుమారుడు నిశాంత్ కుమార్ రాజకీయాల్లోకి ప్రవేశిస్తారా? అనే ఊహాగానాలు మరింత బలపడుతున్నాయి.

జెడీయూ వర్గాల్లో వరుసగా సమావేశాలు జరుగుతున్నాయి. పార్టీ జాతీయ వర్కింగ్ ప్రెసిడెంట్ సంజయ్ ఝా ఢిల్లీ నుంచి పాట్నాకు చేరుకుని నితీష్‌తో సుదీర్ఘ చర్చలు జరిపారు. కేంద్ర మంత్రి లాలన్ సింగ్ కూడా రాష్ట్రానికి చేరుకోనున్నారని సమాచారం. పార్టీ సీనియర్ నేతలతో సమావేశం నిర్వహించి రాజ్యసభ అభ్యర్థులపై తుది నిర్ణయం తీసుకునే అవకాశముందని వర్గాలు తెలిపాయి.

ఇప్పటివరకు మూడు ప్రధాన ప్రతిపాదనలు చర్చలో ఉన్నట్లు సమాచారం. ఒకటి — నిశాంత్‌ను రాజ్యసభకు పంపి, నితీష్‌ను ముఖ్యమంత్రిగా కొనసాగించడం. రెండోది — నితీష్‌ను రాజ్యసభకు పంపి, బీజేపీకి ముఖ్యమంత్రి పదవి ఇవ్వడం; ఆ తరువాత నిశాంత్‌ను ఉప ముఖ్యమంత్రిగా తీసుకోవడం. మూడోది — నిశాంత్‌ను నేరుగా ముఖ్యమంత్రిగా నియమించడం.

జెడీయూలో నితీష్‌కు అనుకూల వర్గం ఆయనను రాజ్యసభకు పంపడాన్ని వ్యతిరేకిస్తోందని సమాచారం. మరోవైపు బీజేపీకి దగ్గరగా ఉన్న వర్గాలు ఆయన ఎగువ సభకు వెళ్లాలని కోరుకుంటున్నట్లు తెలుస్తోంది.

ఇదే సమయంలో మార్చి 8న ప్రారంభం కావాల్సిన నితీష్ ‘సమృద్ధి యాత్ర’ వాయిదా పడే అవకాశం ఉందని సమాచారం. రాష్ట్ర రాజకీయ పరిస్థితుల దృష్ట్యా ఈ నిర్ణయం తీసుకునే అవకాశముందని నివేదికలు సూచిస్తున్నాయి.

మొత్తంగా నితీష్ రాజ్యసభకు వెళ్తారా? నిశాంత్ రాజకీయ రంగ ప్రవేశం చేస్తారా? అన్న ప్రశ్నలకు సమాధానం కోసం బీహార్ ఎదురుచూస్తోంది. వచ్చే కొన్ని రోజులు రాష్ట్ర రాజకీయాలకు కీలకంగా మారనున్నాయి.