ఫ్రెంచ్ వారసత్వం నుంచి కాషాయం వైపు..
తమ ప్రయోజనాల కోసం కేంద్రంతో అంటిపెట్టుకుని ఉండడమే మంచిదని పుదుచ్చేరి ప్రభుత్వం భావిస్తోందా? ఈ తీరు ఓటర్లను ప్రభావితం చేయనుందా?
పుదుచ్చేరిలో ఎన్నికల వాతావరణం ఉత్కంఠభరితంగా మారుతోంది. గుర్తింపు, పాలన, రాజకీయ వాస్తవికత వంటి అంశాలు ప్రచారాన్ని దిశానిర్దేశం చేస్తున్నాయి.
‘టాకింగ్ సెన్స్ విత్ శ్రీని’ కార్యక్రమంలో ‘ది ఫెడరల్’ ఎడిటర్-ఇన్-చీఫ్ ఎస్. శ్రీనివాసన్ పుదుచ్చేరి పరిస్థితులను విశ్లేషించారు. పుదుచ్చేరి ఆర్థికంగా స్వయం సమృద్ధి లేని ఒక చిన్న ప్రాంతం అని పేర్కొన్నారు.
అయితే క్షేత్రస్థాయిలో రాజకీయాలు కీలకంగా మారాయని ‘ది ఫెడరల్’ అసిస్టెంట్ ఎడిటర్ ప్రమీలా క్రిష్ణన్ వివరించారు. పార్టీ కంటే అభ్యర్థి పనితీరు, అందుబాటులో ఉండడం గురించి ఓటర్లు పరిగణనలోకి తీసుకుని ఎన్నుకుంటారని పేర్కొన్నారు.
పుదుచ్చేరిలో క్రమేణా భారతీయ జనతా పార్టీ పుంజుకుంటున్నట్లు కనిపిస్తోంది. గతంలో పరిమిత స్థాయిలో ఉన్న ఈ పార్టీ, 2014 వేగంగా విస్తరించింది. కేంద్రంతో అనుసంధానం కారణంగా పాలనపై దాని ప్రభావం పడిందని విశ్లేషకులు అంటున్నారు. అయితే భావజాల పరంగా మార్పు పెద్దగా కనిపించదని, ఇది వ్యూహాత్మక విస్తరణ మాత్రమేనని పేర్కొన్నారు.
పుదుచ్చేరి ప్రత్యేకత కూడా ఈ సందర్భంగా చర్చకు వచ్చింది. ఫ్రెంచ్ వారసత్వం, బహుభాషా స్వభావం వల్ల ఇది తమిళనాడుతో పోలిస్తే భిన్నంగా ఉందని శ్రీనివాసన్ అన్నారు. ఈ కారణంగా ద్రావిడ పార్టీల ప్రభావం కొంత తగ్గినట్లు కనిపిస్తోంది.
ఎన్నికల దృష్ట్యా ఎన్డీఏ కూటమి బలంగా ఉందని అంచనా. ఆల్ ఇండియా ఎన్.ఆర్ కాంగ్రెస్, బీజేపీ మధ్య మెరుగైన సమన్వయం ఉంది. పాలన పరంగా చూస్తే.. పుదుచ్చేరి ఇంకా సమస్యలను ఎదుర్కొంటోంది. పర్యాటక కేంద్రమైనప్పటికీ, రోడ్లు, నీటి సరఫరా ఇబ్బందులు కనిపిస్తాయి. పురపాలక వ్యవస్థ కూడా బలహీనంగా ఉందన్న విమర్శ ఉంది.
మొత్తంగా చూస్తే, పుదుచ్చేరి ఓటర్లు వాస్తవిక దృక్పథంతోనే నిర్ణయం తీసుకునే అవకాశముంది. అయితే తమ ప్రయోజనాల కోసం కేంద్రంలో ఉన్న పార్టీకి మద్దతు ఇవ్వడం మంచిదని పాలకులు భావిస్తున్నారు. ఈ ధోరణి ఈసారి ఎన్నికల ఫలితాలపై ఎలాంటి ప్రభావం చూపుతుందో వేచి చూడాలి.
