మొయినాబాద్ ఫామ్ హౌస్‌లో డ్రగ్స్ పార్టీ కలకలం

మొయినాబాద్ శివార్లలోని ఒక ఫామ్ హౌస్‌లో జరిగిన డ్రగ్స్ పార్టీపై పోలీసులు దాడి చేయడంతో భారీ సంచలనం రేగింది. ఈ పార్టీలో ప్రముఖ రాజకీయ నాయకులు పాల్గొనడం ఘటనకు మరింత ప్రాధాన్యతను తీసుకొచ్చింది. పార్టీలో టీడీపీకి చెందిన ఏలూరు ఎంపీ పుట్టా మహేష్ కుమార్ యాదవ్, బీఆర్ఎస్ తాండూరు మాజీ ఎమ్మెల్యా పైలెట్ రోహిత్ రెడ్డి, రాజస్థాన్ మాజీ ఎమ్మెల్యా నితీష్ శర్మతో పాటు మరికొందరు ప్రముఖులు ఉన్నట్లు పోలీసులు వెల్లడించారు.

పక్కా సమాచారంతో ఈగల్ టీమ్ ఆకస్మిక దాడి

డ్రగ్స్ పార్టీ జరుగుతోందన్న పక్కా సమాచారంతో ఈగల్ టీమ్ పోలీసులు శనివారం రాత్రి సుమారు 9:30 గంటల సమయంలో ఫామ్ హౌస్‌పై దాడి చేశారు. అయితే దాడికి ముందు నుంచే పోలీసులు ఆ ప్రదేశంపై నిఘా ఉంచారు. సాయంత్రం 7 గంటల ప్రాంతంలో పలువురు పెద్ద కార్లలో అక్కడికి చేరుకున్నారని గమనించిన పోలీసులు దాదాపు రెండు గంటలు వేచి చూసి ఆ తర్వాత ఆకస్మికంగా దాడి చేశారు.

పోలీసులను చూసి గాల్లో కాల్పులు

మఫ్టీలో వచ్చిన పోలీసులను చూసిన వెంటనే పార్టీలో ఉన్న ఒక వ్యక్తి తన దగ్గర ఉన్న తుపాకీతో గాల్లో నాలుగు రౌండ్లు కాల్పులు జరపడం పరిస్థితిని మరింత ఉద్రిక్తంగా మార్చింది. వెంటనే పోలీసులు తాము ఈగల్ టీమ్‌కు చెందినవారమని చెప్పడంతో పార్టీలో ఉన్నవారు అక్కడి నుంచి పారిపోవడానికి ప్రయత్నించారు. కానీ పోలీసులు వారిని అడ్డుకుని అందరినీ అదుపులోకి తీసుకున్నారు.

అదుపులోకి తీసుకున్న వారిలో ప్రముఖులు

పోలీసులు అదుపులోకి తీసుకున్న వారి వివరాలు తెలుసుకున్న తర్వాత ఆశ్చర్యపోయారు. ఎందుకంటే వారిలో రాజకీయ నాయకులు, రియల్ ఎస్టేట్ వ్యాపారులు ఉన్నారు. ముఖ్యంగా ఏలూరు ఎంపీ పుట్టా మహేష్ కుమార్ యాదవ్, తాండూరు మాజీ ఎమ్మెల్యా పైలెట్ రోహిత్ రెడ్డి ఉన్నట్లు గుర్తించారు.

ఈ ఫామ్ హౌస్ అజీజ్ నగర్ ప్రాంతంలో ఉంది. ఇదే ఫామ్ హౌస్ గతంలో బీఆర్ఎస్ ఎమ్మెల్యేల కొనుగోలు వ్యవహారంతో తెలంగాణ వ్యాప్తంగా పెద్ద సంచలనం సృష్టించింది.

కాల్పులు జరిపింది రాజస్థాన్ మాజీ ఎమ్మెల్యా

పోలీసుల వివరాల ప్రకారం కాల్పులు జరిపింది రాజస్థాన్‌లోని జైపూర్ మాజీ ఎమ్మెల్యా నితీష్ శర్మ. అతనితో పాటు రోహిత్ రెడ్డి సోదరుడు రితీష్ రెడ్డి, ప్రియాంక రెడ్డి అనే మహిళతో పాటు మరో ఏడుగురు ప్రముఖులు కూడా పార్టీలో ఉన్నారు. వీరందరినీ పోలీసులు అదుపులోకి తీసుకుని మొయినాబాద్ పోలీస్ స్టేషన్‌కు తరలించారు.

రక్తపరీక్షల్లో బయటపడ్డ నిజాలు

పట్టుబడిన 11 మందిలో ఆరుగురు కొకైన్ తీసుకున్నట్లు రక్త పరీక్షల్లో తేలింది. అయితే టీడీపీ ఎంపీ పుట్టా మహేష్ కుమార్ యాదవ్‌కు డ్రగ్స్ నెగిటివ్ వచ్చినట్లు పోలీసులు తెలిపారు. అయినప్పటికీ ఆయన అధికంగా మద్యం సేవించినట్లు వెల్లడైంది.

సిమ్లా నుంచి కొకైన్ తెచ్చిన వ్యాపారవేత్త

పార్టీలో ఉన్న కౌశిక్ రెడ్డి అనే వ్యాపారవేత్త తరచూ సిమ్లాకు వెళ్తుంటాడని పోలీసులు తెలిపారు. ఈ పార్టీలో ఉపయోగించిన కొకైన్‌ను అతనే సిమ్లా నుంచి తీసుకొచ్చినట్లు అనుమానం వ్యక్తం చేస్తున్నారు.

పోలీసుల అదుపులో ఉన్నవారు

ఈ ఘటనలో ప్రస్తుతం పోలీసుల అదుపులో ఉన్నవారిలో

పుట్టా మహేష్ కుమార్ యాదవ్

పైలెట్ రోహిత్ రెడ్డి

నితీష్ శర్మ

వర్గనేని రమేష్

వి. శ్రవణ్ కుమార్

రితీష్ రెడ్డి

నల్లపునేని విజయకృష్ణ

శ్రీధర్ రెడ్డి

ప్రియాంక రెడ్డి

తదితరులు ఉన్నట్లు పోలీసులు తెలిపారు.

వీరి పై విచారణ కొనసాగుతుండగా, తర్వాత వారిని మెజిస్ట్రేట్ ఎదుట హాజరు పరచనున్నారు. ఈ ఘటన రాజకీయంగా కూడా పెద్ద చర్చకు దారితీసే అవకాశముంది.