ఈసీ-టీఎంసీ మధ్య ముదిరిన ఘర్షణ.. ఓటర్ల తొలగింపుపై దేశవ్యాప్త చర్చ

పశ్చిమ బెంగాల్ ఎన్నికల వేళ, ఎన్నికల నిర్వహణపై వివాదాలతో రాజకీయాలు మరింత వేడెక్కాయి. తృణమూల్ కాంగ్రెస్ (టీఎంసీ) ప్రతినిధి బృందం ప్రధాన ఎన్నికల కమిషనర్ జ్ఞానేశ్ కుమార్‌ను కలసి, ఓటరు జాబితాల సవరణలో జరిగిన అవకతవకలపై తీవ్ర అభ్యంతరాలు వ్యక్తం చేసింది. ఈ సమావేశం అనంతర పరిణామాలు దేశవ్యాప్తంగా చర్చనీయాంశంగా మారాయి.

ఓటర్ల తొలగింపుపై టీఎంసీ ఆరోపణలు..

టీఎంసీ నేతల ప్రకారం, ప్రత్యేక ఇంటెన్సివ్ రివిజన్ (SIR) ప్రక్రియలో భాగంగా పశ్చిమ బెంగాల్‌లో 89 లక్షలకుపైగా ఓటర్లను జాబితాల నుంచి తొలగించారు. ఇది ఎన్నికల నిష్పాక్షికతను దెబ్బతీసే చర్యగా వారు అభివర్ణించారు. ఈ అంశంపై స్పష్టత కోరేందుకు టీఎంసీ ఎంపీలు సీఈసీని కలిశారు. సమావేశంలో డెరెక్ ఓబ్రెయిన్, సాగరిక ఘోష్, సాకేత్ గోఖలే తదితరులు పాల్గొన్నారు.

ఏడు నిమిషాల్లో ముగిసిన సమావేశం..

సాధారణంగా ఇటువంటి సమావేశాలు విస్తృతంగా సాగుతాయి. అయితే ఈసారి పరిస్థితి భిన్నంగా మారింది. టీఎంసీ ఆరోపణల ప్రకారం, సమావేశం కేవలం ఏడు నిమిషాల్లోనే ముగిసింది.

సీఈసీ “బయటకు వెళ్లండి” అని చెప్పడంతో సమావేశం అకస్మాత్తుగా ముగిసిందని డెరెక్ ఓబ్రెయిన్ పేర్కొన్నారు. అయితే సీఈసీ కేవలం “సమయం అయింది” అని చెప్పారని సాగరిక ఘోష్ తెలిపారు. ఈ విభిన్న వాదనలు వివాదానికి దారితీశాయి.

ఈసీ ఎక్స్ పోస్టుతో రాజుకున్న వివాదం..

సమావేశం అనంతరం ఎన్నికల సంఘం ‘ఎక్స్’ వేదికగా స్పందించింది. పశ్చిమ బెంగాల్ ఎన్నికలను ఎలాంటి హింస, బెదిరింపులు, ప్రలోభాలు లేకుండా నిర్వహిస్తామని పేర్కొంది.

ఒక రాజకీయ పార్టీని నేరుగా ఉద్దేశించి ఎన్నికల సంఘం స్పందించడం అరుదైన పరిణామంగా రాజకీయ వర్గాలు అభిప్రాయపడుతున్నాయి. ఈ పోస్టు టీఎంసీని లక్ష్యంగా చేసుకున్నదిగా భావించి, ఆ పార్టీ తీవ్రంగా ప్రతిస్పందించింది.

సీఈసీపై అభిశంసన నోటీసు..

ఈ వివాదాల మధ్య, సీఈసీపై ప్రతిపక్షాలు ఇచ్చిన అభిశంసన (ఇంపీచ్‌మెంట్) నోటీసు మరో కీలక పరిణామంగా మారింది.

లోక్‌సభ స్పీకర్ ఓం బిర్లా, రాజ్యసభ చైర్మన్ సీపీ రాధాకృష్ణన్ ఈ నోటీసును తిరస్కరించారు. మార్చి 12న 193 మంది ప్రతిపక్ష ఎంపీలు ఈ నోటీసును సమర్పించారు. పరిశీలన అనంతరం నోటీసును అంగీకరించలేమని తెలిపారు. అయితే కారణాలను బహిరంగంగా వెల్లడించకపోవడం మరో వివాదానికి దారితీసింది.

ప్రతిపక్షాల తీవ్ర విమర్శలు..

ఈ నిర్ణయంపై ప్రతిపక్షాలు తీవ్రంగా స్పందించాయి. డెరెక్ ఓబ్రెయిన్ దీన్ని “సిగ్గుచేటు”గా అభివర్ణిస్తూ, బీజేపీ ప్రభావం ఉందని ఆరోపించారు. ‘‘ఈ నోటీసు ద్వారా పార్లమెంట్‌లో చర్చను ప్రారంభించడమే లక్ష్యమని, అయితే ఆ అవకాశాన్ని కూడా నిరాకరించారని టీఎంసీ నేత అభిషేక్ బెనర్జీ విమర్శించారు. ఇటు ప్రతిపక్షాల గొంతును నులిమివేస్తున్నారని కాంగ్రెస్ ఎంపీ ఇమ్రాన్ మసూద్ ఆరోపించారు.

రాజ్యసభ చైర్మన్ వైఖరి

నోటీసులో పేర్కొన్న ఆరోపణలు రాజ్యాంగపర ప్రమాణాలకు సరిపోవని రాజ్యసభ వర్గాల సమాచారం. సీఈసీపై చేసిన ఆరోపణలు “రాజకీయ, ఊహాత్మక”గా ఉన్నాయని పేర్కొన్నారు. అవి ఆర్టికల్ 324(5), 124(4) ప్రకారం తొలగింపునకు సరిపోవని వివరించారు.

పార్లమెంటరీ ప్రజాస్వామ్యంపై ఆందోళనలు..

ఈ పరిణామాలు పార్లమెంటరీ ప్రజాస్వామ్యానికి ఆందోళనకర సంకేతాలని ఆర్జేడీ నేత మనోజ్ కుమార్ ఝా పేర్కొన్నారు. ప్రతిపక్షాల అభిప్రాయాలను వినేందుకు అవకాశాలు తగ్గుతున్నాయని, పార్లమెంట్ చర్చ వేదికగా కాకుండా ప్రకటనల వేదికగా మారుతోందని విమర్శించారు. అదేవిధంగా, కీలక అంశాలపై చర్చకు సమయం ఇవ్వకపోవడం, ప్రతిపక్ష తీర్మానాలు పక్కనపడటం వంటి అంశాలు కూడా ప్రస్తావనకు వచ్చాయి.

ప్రజాస్వామ్యాన్ని ఖునీ చేస్తున్నారు..

సీనియర్ న్యాయవాది, ఎంపీ అభిషేక్ మను సింఘ్వీ నేతృత్వంలోని ప్రతిపక్షాలు ఢిల్లీలో సమావేశమై ఈ నిర్ణయాన్ని తీవ్రంగా తప్పుబట్టాయి. “జవాబుదారీతనాన్ని వాయిదా వేస్తే ప్రజాస్వామ్యమే దెబ్బతింటుంది. నిజం మీవైపు ఉంటే విచారణకు భయం ఎందుకు?” అని ఆయన ప్రశ్నించారు.

ఈ మొత్తం పరిణామాలను పరిశీలిస్తే, ఇది కేవలం ఓటర్ల తొలగింపు వివాదం మాత్రమే కాదు. ఎన్నికల సంఘం నిష్పాక్షికతపై ప్రశ్నలు, పార్లమెంట్‌లో ప్రతిపక్షాల పాత్ర, ప్రజాస్వామ్య వ్యవస్థల పనితీరు..ఇవన్నీ కలిపి పెద్ద రాజకీయ చర్చకు దారితీస్తున్నాయి.

పశ్చిమ బెంగాల్ ఎన్నికల ముందు చోటుచేసుకున్న ఈసీ-టీఎంసీ ఘర్షణ, దేశ రాజకీయాల్లో కీలక మలుపుగా మారుతోంది. సీఈసీపై నోటీసు తిరస్కరణతో ఈ వివాదం మరింత వేడెక్కింది.