సునేత్రా పవార్ ప్రమాణ స్వీకారంపై శివసేన (యూబీటీ) స్పందనేంటి?

మహారాష్ట్ర(Maharasthra) కొత్త ఉప ముఖ్యమంత్రి(Deputy CM)గా సునేత్రా పవార్(Sunetra Pawar) ప్రమాణ స్వీకారం వెనుక బీజేపీ కీలక పాత్ర ఉందని శివసేన (ఉద్ధవ్ బాలాసాహెబ్ థాకరే వర్గం) తీవ్ర ఆరోపణలు చేసింది. పార్టీ అధికార పత్రిక ‘సామ్నా’లో ప్రచురితమైన ప్రత్యేక సంపాదకీయంలో ఈ నిర్ణయం ముందస్తు సమాచారం లేకుండానే తీసుకున్నారని, పవార్ కుటుంబ సభ్యులకు కూడా తెలపలేదని విమర్శించింది.

మహారాష్ట్ర రాజకీయాల్లో సునేత్రా పవార్ ఉప ముఖ్యమంత్రిగా ప్రమాణ స్వీకారం చేయడం వివాదాస్పదమైంది. శివసేన (యూబీటీ) అధికార పత్రిక ‘సామ్నా’లో ప్రచురితమైన సంపాదకీయంలో, ఈ నిర్ణయం బీజేపీ ఆదేశాల మేరకే జరిగిందని ఆరోపించారు. రాష్ట్ర రాజకీయాల్లో సునేత్రా పవార్ ప్రవేశం కూడా బీజేపీ ప్రేరేపితమేనని పేర్కొన్నారు. ప్రమాణ స్వీకారం విషయమై పవార్ కుటుంబ సభ్యులు — శరద్ పవార్, సుప్రియా సూలేలకు ముందస్తు సమాచారం లేదని సంపాదకీయం విమర్శించింది.

అజిత్ పవార్ మరణం అనంతరం రాష్ట్ర రాజకీయాల్లో జరిగిన ఈ పరిణామం రాజకీయ ప్రయోజనాల కోసమేనని శివసేన అభిప్రాయపడింది. ఎన్సీపీ రెండు వర్గాల ఏకీకరణ అంశంలో కూడా బీజేపీ(BJP) నాయకత్వం ప్రభావం ఉందని, సునీల్ తత్కరే, ప్రఫుల్ పటేల్ వంటి నేతలు విలీనానికి వ్యతిరేకంగా ఉన్నారని వ్యాఖ్యానించింది.

ఇక సునేత్రా పవార్ ఉప ముఖ్యమంత్రిగా ఉన్నప్పటికీ అసలు నియంత్రణ ముఖ్యమంత్రి దేవేంద్ర ఫడ్నవీస్ చేతుల్లోనే ఉందని సంపాదకీయం ఎద్దేవా చేసింది. శివసేన (షిండే వర్గం), ఎన్సీపీ వర్గాలు ఫడ్నవీస్ ఆధీనంలోనే పనిచేస్తున్నాయనే విమర్శలు చేసింది. 2029 అసెంబ్లీ ఎన్నికల్లో బీజేపీ స్వతంత్రంగా పోటీ చేసి, ఇతర పార్టీల ఎమ్మెల్యేలు కాషాయ దళంలో చేరే అవకాశముందని కూడా అంచనా వేసింది.

అజిత్ పవార్ మరణానంతరం ఎన్సీపీలో నాయకత్వ పోటీ తీవ్రతరమైందని, కొందరు నేతలు వ్యక్తిగత ఆశయాలతో ముందుకు వస్తున్నారని సంపాదకీయం పేర్కొంది. “పాటిల్–పవార్” పార్టీ ప్రఫుల్ పటేల్ ఆధీనంలోకి వెళ్లకుండా ఉండేందుకే సునేత్రా పవార్‌ను ఉప ముఖ్యమంత్రిగా నియమించారని ఆరోపించింది. అయితే విమర్శల మధ్య సునేత్రా పవార్ సమర్థవంతంగా బాధ్యతలు నిర్వర్తిస్తారని కొందరు వర్గాలు అభిప్రాయపడుతుండగా, హిందూ సంప్రదాయ కర్మకాండలు పూర్తికాకముందే ప్రమాణ స్వీకారం జరగడంపై కూడా చర్చ నెలకొంది. మొత్తంగా ఈ పరిణామం మహారాష్ట్ర రాజకీయాల్లో కొత్త చర్చలకు దారితీసింది.