రాజకీయ వేడిని పెంచిన ఉద్యోగ సంక్షోభం..

పశ్చిమ బెంగాల్‌లో యువత ఉద్యోగాల కోసం ఎదురు చూస్తున్న వేళ.. రాష్ట్ర ప్రభుత్వం ప్రారంభించిన ‘బంగ్లార్ యువ సాథి’ పథకం చర్చకు దారి తీసింది. ఒకవైపు వేలాది మంది యువకులు స్వయం ఉపాధి కోసం రిజిస్ట్రేషన్ క్యాంపుల వద్ద క్యూల్లో నిలబడుతుండగా, మరోవైపు శాశ్వత ప్రభుత్వ ఉద్యోగాల కోసం అర్హత సాధించిన అభ్యర్థులు నిరసనలు చేపట్టడం.. రాష్ట్రంలో ఉద్యోగ సంక్షోభంపై దృష్టిని కేంద్రీకరించింది.

నెలకు రూ.1500..

రాష్ట్ర ప్రభుత్వం ప్రవేశపెట్టిన ‘బంగ్లార్ యువ సాథి’ పథకం కింద 21 నుంచి 40 సంవత్సరాల మధ్య వయస్సు గల నిరుద్యోగ యువతకు నెలకు రూ. 1,500 భత్యం అందించనుంది. సెకండరీ పరీక్ష ఉత్తీర్ణులయిన వారికి ఈ సాయం వర్తిస్తుంది. రాష్ట్రంలోని 294 అసెంబ్లీ నియోజకవర్గాల్లో రిజిస్ట్రేషన్ శిబిరాలు ఏర్పాటు చేయగా..లక్షలాది మంది యువత పాల్గొన్నారు. ఆన్‌లైన్‌లో కూడా దరఖాస్తులు స్వీకరిస్తున్నారు. ప్రభుత్వం ఈ పథకాన్ని తాత్కాలిక ఆర్థిక ఉపశమనం కలిగించే చర్యగా ప్రచారం చేస్తోంది.

ఉపాధ్యాయ అభ్యర్థుల నిరసన..

అయితే ఇదే సమయంలో కోల్‌కతాలోని బికాష్ భవన్ బయట ఉపాధ్యాయ నియామకాలకు అర్హత సాధించిన అభ్యర్థులు పెద్ద ఎత్తున నిరసనలు చేపట్టారు. “డిగ్రీ ఉంది… ఉద్యోగం ఎక్కడ?” అంటూ ప్లకార్డులు పట్టుకుని ప్రభుత్వంపై ఆగ్రహం వ్యక్తం చేశారు. డి.ఎల్.ఎడ్, బి.ఎడ్ పూర్తి చేసిన అభ్యర్థులు నియామక లేఖలు ఇవ్వాలని డిమాండ్ చేస్తున్నారు. అలాగే పౌర రక్షణ వాలంటీర్లు కూడా స్థిరమైన ఉద్యోగ భద్రత కోరుతూ ర్యాలీలు నిర్వహిస్తున్నారు.

2016 స్కూల్ సర్వీస్ కమిషన్ నియామక ప్రక్రియను ప్రభుత్వం రద్దు చేసింది. భారీ అవకతవకల ఆరోపణల నేపథ్యంలో వేలాది ఉద్యోగాలు రద్దు కావడంతో అనేక మంది నిరుద్యోగులయ్యారు. కోర్టు తీర్పుల కారణంగా నియామకాలు ఆలస్యమవుతూ రావడం యువతలో అసంతృప్తిని పెంచింది.

పాలక తృణమూల్ కాంగ్రెస్ ఈ పథకాన్ని యువతకు మద్దతుగా తీసుకొచ్చామని చెబుతుండగా.. ప్రతిపక్షాలు మాత్రం ఇది “తాత్కాలిక ముసుగు” అని విమర్శిస్తున్నాయి. శాశ్వత ఉద్యోగాలు చూపకుండా తాత్కాలిక చర్యలు చేపట్టడం.. సమస్యకు పరిష్కారం కాదని అంటున్నారు.

రాజకీయంగా చూస్తే యువ సాథి పథకం ఎన్నికల ముందు యువ ఓటర్లను ఆకర్షించే ప్రయత్నంగా భావిస్తున్నారు. కానీ దీర్ఘకాలికంగా ఉద్యోగాల కొరత సమస్యను ఇది ఎంతవరకు తగ్గిస్తుంది అన్నది ఇంకా స్పష్టంగా లేదు. రాష్ట్రంలో నిరుద్యోగం అధికారిక గణాంకాల ప్రకారం తక్కువగా ఉన్నప్పటికీ, భూమి స్థాయిలో యువత ఎదుర్కొంటున్న సమస్యలు మాత్రం తీవ్రమైనవే అని ఈ పరిణామాలు సూచిస్తున్నాయి.