2026లో కేవలం వ్యతిరేకతతో గెలుపు కష్టమే: ఒక విశ్లేషణ

తమిళనాడు అసెంబ్లీ ఎన్నికల సమీపిస్తుండడంతో రాజకీయ సమీకరణాలు వేగంగా మారుతున్నాయి. కేవలం ప్రభుత్వ వ్యతిరేకతతోనే గెలుస్తామని భావిస్తే అది హామీ కాదని సీనియర్ రాజకీయ విశ్లేషకుడు టి రామకృష్ణన్ తాజా అంచనాలో స్పష్టం చేశారు. ఇదే ఇప్పుడు రాష్ట్ర రాజకీయాల్లో ప్రధాన చర్చగా మారింది.

ప్రస్తుతం పొత్తులు కొత్త మలుపులు తీసుకుంటున్నాయి. డీఎంకేతో డీఎండీకే జతకట్టింది. ఇటు కాంగ్రెస్ సీట్ల పంపకాలపై చర్చలు కొనసాగుతున్నాయి. డీఎంకే నుంచి మరిన్ని సీట్లు డిమాండ్ చేస్తున్నట్లు సమాచారం. అయితే కాంగ్రెస్‌కు రాష్ట్రంలో ఇంకా ఓట్ షేర్ ఉందని, దక్షిణ జిల్లాల్లో ముఖ్యంగా మైనారిటీల్లో ఆ పార్టీ ప్రభావం ఉందని రామకృష్ణన్ చెప్పారు. 2014లో రాష్ట్రవ్యాప్తంగా 4 శాతం ఓట్లు వచ్చినా.. దక్షిణంలో అది 6 నుంచి 7 శాతానికి చేరిందని వివరించారు. కాంగ్రెస్‌ను పూర్తిగా వదిలేయడం డీఎంకేకు లాభదాయకం కాదని అభిప్రాయపడ్డారు. కేంద్ర నాయకత్వం కూడా డీఎంకేతోనే కొనసాగాలని చూస్తోందని చెప్పారు.

పదేళ్ల తర్వాత డీఎంకేను అధికారంలోకి తీసుకురావడమే ప్రధాన ఉద్దేశమని చెప్పారు. ఇప్పుడు పరిస్థితి భిన్నంగా ఉందని తెలిపారు. 2021, 2024 ఎన్నికలు, స్థానిక సంస్థల ఎన్నికల్లో డీఎంకే ఆధిక్యం కొనసాగిందని పేర్కొన్నారు.

విజయ్ రాజకీయ రంగప్రవేశం తర్వాత రాష్ట్ర రాజకీయాల్లో కొత్త సమీకరణాల చర్చ మొదలైంది. సీట్ల పంపకంతో పాటు అధికార భాగస్వామ్యాన్ని కూడా ప్రతిపాదించడం ఆకర్షణీయమైన ఆఫర్‌గా కనిపిస్తోందని విశ్లేషకులు భావిస్తున్నారు. అయితే గెలుపు హామీ లేకుండా ఏ పార్టీ కూడా అలాంటి ప్రతిపాదనపై ముందుకు వెళ్లదని టి రామకృష్ణన్ స్పష్టం చేశారు. డీఎంకే, అన్నాడీఎంకే వంటి ప్రధాన ద్రవిడ పార్టీలు తమ మిత్రపక్షాలకు గెలుపు అవకాశంపై ఒక స్థిర నమ్మకం కల్పించగలవని, విజయ్ మాత్రం ఇంకా ఎన్నికల పరీక్షను ఎదుర్కోలేదని ఆయన చెప్పారు. అందుకే ప్రస్తుతం అతన్ని ఓటు విభజన చేసే శక్తిగా మాత్రమే చూస్తున్నారని అభిప్రాయపడ్డారు.

విజయ్ గ్రామాల పర్యటనలు, ప్రాథమిక ఆరోగ్య కేంద్రాల అభివృద్ధిపై దృష్టి పెట్టడం వంటి అంశాలు రాజకీయంగా సానుకూల సంకేతాలేనని రామకృష్ణన్ అంచనా వేశారు. అయితే మంచి ఉద్దేశాలు మాత్రమే సరిపోవని, ప్రజలు స్పష్టమైన కార్యాచరణ ప్రణాళికను ఆశిస్తారని తెలిపారు. 2020ల తమిళనాడు సామాజిక-ఆర్థికంగా గణనీయంగా మారిపోయిందని, ఆ మార్పులను లోతుగా అర్థం చేసుకుని వ్యూహం రూపొందించాల్సిన అవసరం ఉందని సూచించారు.

డీఎండీకే డీఎంకే కూటమిలో చేరడం ఎన్నికల గణితాన్ని ప్రభావితం చేసే అంశంగా మారింది. వ్యవస్థాపకుడు విజయకాంత్‌కు ఇప్పటికీ ఉన్న వ్యక్తిగత ఆదరణ పార్టీకి బలం కావచ్చని విశ్లేషించారు. ఓట్ల శాతం ఖచ్చితంగా చెప్పడం కష్టం అయినా, తీవ్ర పోటీ ఉన్న నియోజకవర్గాల్లో చిన్న మార్పే ఫలితాన్ని ప్రభావితం చేస్తుందని చెప్పారు. 2024లో డీఎంకే కూటమి సుమారు 47 శాతం ఓట్లు సాధించిందని గుర్తుచేశారు. వ్యతిరేకత కారణంగా ఆ శాతం తగ్గినా, డీఎండీకే జతకావడం సమీకరణాన్ని మళ్లీ సమతుల్యం చేయవచ్చని పేర్కొన్నారు. ముఖ్యంగా నాయుడు వర్గంలో డీఎండీకేకు ఉన్న మద్దతు అన్నాడీఎంకేకు నష్టాన్ని కలిగించే అవకాశముందని తెలిపారు.

ఇదిలా ఉండగా, అన్నాడీఎంకే క్షేత్రస్థాయిలో తగిన చురుకుదనం కనబరచడం లేదని రామకృష్ణన్ వ్యాఖ్యానించారు. చెన్నైలో పార్టీ బలహీనంగా ఉందని, డెల్టా జిల్లాల్లో ప్రచార చైతన్యం స్పష్టంగా కనిపించడం లేదని చెప్పారు. ఒకే నాయకుడి రాష్ట్ర పర్యటన సరిపోదని, సంస్థాగతంగా బలమైన సిద్ధత అవసరమని సూచించారు. సోషల్ మీడియా చురుకుదనం మాత్రమే గెలుపుకు హామీ కాదని అభిప్రాయపడ్డారు.

కొత్త పార్టీలు, కొత్త నాయకులు రంగంలోకి రావడంతో పోటీ మరింత విభిన్నంగా మారిందని ఆయన విశ్లేషించారు. ఓట్ల విభజన, పొత్తుల మార్పులు, స్థానిక ప్రభావాలు అన్నీ కలిసి ఫలితాలను నిర్ణయించనున్నాయని చెప్పారు. ప్రస్తుత దశలో ఏ పార్టీకి పూర్తి హామీ లేదని, 2026 ఎన్నికల దిశగా వ్యూహాలను మరింత కచ్చితంగా మలచుకోవాల్సిన సమయం వచ్చిందని ఆయన విశ్లేషణ ముగిసింది.