ఇజ్రాయెల్, అమెరికా 'కుట్ర'లో భాగమేనా 'కాల్పుల విరమణ'!

పశ్చిమ ఆసియాలో శాంతి అనేది ఒక ఎండమావిలా మారుతోంది. ఒకవైపు కాల్పుల విరమణ ప్రయత్నాలు జరుగుతున్నాయని అనిపిస్తున్నా, మరోవైపు క్షేత్రస్థాయిలో బాంబుల మోత, హెచ్చరికలు పరిస్థితులను మరింత దిగజారుస్తున్నాయి.

అమెరికా అధ్యక్షుడు డొనాల్డ్ ట్రంప్ తన సోషల్ మీడియా వేదికగా ఇరాన్‌కు తీవ్ర హెచ్చరికలు జారీ చేశారు. "నిజమైన ఒప్పందం" కుదిరి, అది పూర్తిగా అమలు అయ్యే వరకు అమెరికాకు చెందిన నౌకలు, విమానాలు, సైనిక బలగాలు ఇరాన్ సరిహద్దుల్లోనే ఉంటాయని ఆయన స్పష్టం చేశారు. ఒప్పందాన్ని ఉల్లంఘిస్తే తీవ్ర పరిణామాలు ఉంటాయని హెచ్చరించడం ద్వారా అమెరికా తన పట్టును బిగిస్తోంది.

బుధవారం ఒక్కరోజే ఇజ్రాయెల్ జరిపిన దాడుల్లో లెబనాన్‌లో 200 మందికి పైగా మరణించడం, వెయ్యి మందికి పైగా గాయపడటం పరిస్థితి తీవ్రతకు అద్దం పడుతోంది. లెబనాన్ దీనిని జాతీయ సంతాప దినంగా ప్రకటించింది. అయితే, ఇక్కడ ప్రధాన మెలిక ఏమిటంటే.. ఇరాన్-అమెరికా మధ్య చర్చల్లో ఉన్న 'సీజ్‌ఫైర్' (కాల్పుల విరమణ) ఒప్పందంలో లెబనాన్ లేదని ఇజ్రాయెల్ ప్రధాని నెతన్యాహు, అమెరికా ఉపాధ్యక్షుడు జెడి వాన్స్ స్పష్టం చేయడం.

లెబనాన్‌పై ఇజ్రాయెల్ దాడులకు నిరసనగా ఇరాన్ కీలక నిర్ణయం తీసుకుంది. ప్రపంచ ఇంధన రవాణాకు అత్యంత కీలకమైన హార్ముజ్ జలసంధిని (Strait of Hormuz) ఇరాన్ మళ్లీ మూసివేసింది. ఇది ప్రపంచ ఆర్థిక వ్యవస్థపై కోలుకోలేని దెబ్బ తీసే అవకాశం ఉంది. ఈ జలసంధిని వెంటనే తెరవాలని అమెరికా డిమాండ్ చేస్తోంది.

ఇరాన్ విదేశాంగ మంత్రి అబ్బాస్ అరాక్చీ అమెరికాకు అల్టిమేటం జారీ చేశారు. లెబనాన్‌లో కాల్పుల విరమణ అనేది ఒప్పందంలో భాగమేనని ఇరాన్ వాదిస్తోంది. "అమెరికా తన వైఖరిని తేల్చుకోవాలి. ఇజ్రాయెల్ ద్వారా యుద్ధం చేయిస్తారా? లేక కాల్పుల విరమణ పాటిస్తారా? రెండూ సాధ్యం కాదు" అని ఆయన స్పష్టం చేశారు.

ఇరాన్ తనను కాపాడుతుందని, లెబనాన్‌లో కూడా కాల్పుల విరమణ అమలులోకి తెస్తుందని ఆశించిన హెజ్బొల్లాకు నిరాశే ఎదురవుతోంది. ఇజ్రాయెల్ గగనతలంపై పూర్తి నియంత్రణ సాధించి, హెజ్బొల్లా నిర్మూలనే లక్ష్యంగా దాడులు పెంచుతోంది. ఇరాన్ నుంచి ఆశించిన స్థాయిలో మద్దతు అందకపోవడం ఆ సంస్థను ఆత్మరక్షణలో పడేసింది.

పరిస్థితులు ఇలా ఉన్నప్పటికీ, దౌత్యపరమైన చర్చలు ఇంకా ముగియలేదు. ఇరాన్ పార్లమెంట్ స్పీకర్ మహమ్మద్-బాగేర్ గాలిబాఫ్ నేతృత్వంలోని ప్రతినిధి బృందం నేడు ఇస్లామాబాద్ (పాకిస్థాన్) చేరుకోనుంది. రేపు, ఏప్రిల్ 10న, అమెరికా ప్రతినిధులతో ఇరాన్ చర్చలు జరపనుంది.

ఈ చర్చలు విజయవంతమైతే యుద్ధం ఆగే అవకాశం ఉంది. లేనిపక్షంలో, హర్ముజ్ జలసంధి మూసివేత, ఇజ్రాయెల్ దాడుల నేపథ్యంలో ఇది పూర్తి స్థాయి అంతర్జాతీయ యుద్ధానికి దారితీసే ప్రమాదం కనిపిస్తోంది. ప్రస్తుతం ప్రపంచం చూపు రేపు ఇస్లామాబాద్‌లో జరిగే చర్చలపైనే ఉంది.