ఇరాన్ దెబ్బకు ట్రంప్ భయపడ్డారా? విరామం వెనుక ప్లాన్ ఏంటీ!

ఇరాన్-అమెరికా యుద్ధం 25వ రోజుకు చేరుకున్న వేళ నాటకీయ పరిణామాలు చోటుచేసుకున్నాయి. ఇరాన్ విద్యుత్ కేంద్రాలను 48 గంటల్లో "నేలమట్టం చేస్తాం" అని హెచ్చరించిన ట్రంప్, అనూహ్యంగా 5 రోజుల పాటు దాడుల విరామాన్ని ప్రకటించడం ఇప్పుడు అంతర్జాతీయంగా చర్చనీయాంశమైంది. ట్రంప్ ప్రకటనను ఇరాన్ తోసిపుచ్చింది. అదో ఫేక్ న్యూస్ అంటూ కొట్టిపారేసింది.

ట్రంప్ ప్రకటించిన "చర్చల" అంశాన్ని ఇరాన్ పూర్తిగా తోసిపుచ్చింది. ఇరాన్ పార్లమెంటు స్పీకర్ మహమ్మద్ బాఘెర్ ఖలీబా ఎక్స్‌ (X) వేదికగా స్పందిస్తూ.. "అమెరికాతో ఎటువంటి చర్చలు జరగలేదు. ఆర్థిక, చమురు మార్కెట్లను తన గుప్పెట్లోకి తెచ్చుకోవడానికి, తన వైఫల్యాల నుంచి ప్రపంచ దృష్టిని మళ్లించడానికి ట్రంప్ 'ఫేక్ న్యూస్' ప్రచారం చేస్తున్నారు" అని మండిపడ్డారు.

ఇరాన్ అధికారిక మీడియా, ఐఆర్జీసీ (IRGC) వర్గాలు ఈ విరామాన్ని భిన్నంగా విశ్లేషిస్తున్నాయి. "హర్ముజ్ జలసంధిని మూసివేస్తామన్న మా హెచ్చరికలకు అమెరికా దడుచుకుంది. మా విద్యుత్ కేంద్రాలపై చేయి వేస్తే పశ్చిమాసియాలోని అమెరికా స్థావరాలన్నీ స్మశానాలవుతాయని భయపడే ట్రంప్ ఈ 5 రోజుల విరామ నాటకానికి తెరలేపారు" అని ఇరాన్ మీడియా పేర్కొంది.

యుద్ధ భయంతో అంతర్జాతీయంగా ముడిచమురు ధరలు పెరిగిపోవడంతో అమెరికా ఆర్థిక వ్యవస్థపై ఒత్తిడి పెరిగింది. ట్రంప్ ప్రకటన రాగానే చమురు ధరలు ఒక్కసారిగా 11% పడిపోయాయి. ఈ తాత్కాలిక ఊరట కోసమే ట్రంప్ "చర్చలు జరుగుతున్నాయి, ఇరాన్ శాంతిని కోరుకుంటోంది" వంటి ప్రకటనలు చేస్తున్నారని ఇరాన్ విదేశాంగ శాఖ కొట్టిపారేసింది.

అయితే, ఇరాన్ విదేశాంగ మంత్రి అబ్బాస్ అరాగ్చీ మాటలను బట్టి చూస్తే.. ప్రత్యక్ష చర్చలు జరగకపోయినా, టర్కీ, ఈజిప్ట్, పాకిస్థాన్ వంటి దేశాల ద్వారా రాయబారాలు నడిచినట్లు తెలుస్తోంది. అమెరికా పంపిన కొన్ని ప్రతిపాదనలు తమకు అందాయని, వాటిని సమీక్షిస్తున్నామని ఇరాన్ అధికారి ఒకరు వెల్లడించడం గమనార్హం.

ట్రంప్ మళ్లీ వేటు వేస్తాడా?

ట్రంప్ ప్రకటనలో ఓ హెచ్చరికా లేకపోలేదు. "5 రోజుల తర్వాత చర్చలు సఫలం కాకపోతే మళ్లీ భీకర దాడులు మొదలవుతాయి." మరోవైపు ఇరాన్ కూడా అదే రేంజ్ లో స్పందించింది. "అమెరికా దాడులకు ధీటుగానే మా దాడులూ ఉంటాయి" అని ఇరాన్ సవాల్ విసిరింది.

ట్రంప్ ఇచ్చిన ఈ 'విరామం' కేవలం తుపాను ముందున్న ప్రశాంతత మాత్రమేనని నిపుణులు భావిస్తున్నారు. ఈ గడువు ముగిశాక సంభవించే ప్రధాన పరిణామాలు ఇలా ఉండొచ్చని అంచనా.

గడువు లోగా ఇరాన్ హర్ముజ్ జలసంధిని పూర్తిగా తెరవకపోతే, ఇరాన్‌లోని అతిపెద్ద విద్యుత్ ప్లాంట్‌లను అమెరికా "నేలమట్టం (Obliterate)" చేస్తుందని ట్రంప్ ఇప్పటికే హెచ్చరించారు. అదే జరిగితే ఇరాన్ మొత్తం అంధకారంలో మునిగిపోయే ప్రమాదం ఉంది.

ఇరాన్ 'రివర్స్' ఎటాక్.. పశ్చిమాసియా అంధకారం!

అమెరికా తనపై దాడులు చేస్తే ఊరుకోబోమని ఇరాన్ రివల్యూషనరీ గార్డ్స్ (IRGC) స్పష్టం చేసింది.

యూఏఈలోని బరాకా అణు విద్యుత్ ప్లాంట్, సౌదీ అరేబియా, కువైట్, ఖతార్‌లలోని ప్రధాన విద్యుత్, మంచినీటి శుద్ధి (Desalination) కేంద్రాలపై ఇరాన్ క్షిపణులతో విరుచుకుపడవచ్చు.

అరబ్ దేశాల్లో 70-80% విద్యుత్ కేంద్రాలు తీర ప్రాంతాల్లోనే ఉండటంతో, ఇరాన్ దాడుల వల్ల ఈ ప్రాంతమంతా విద్యుత్, నీటి కొరతతో అతలాకుతలం కావచ్చు.

గడువు తర్వాత ఇరాన్ తన పట్టు బిగించేందుకు పర్షియన్ గల్ఫ్ అంతటా సముద్ర మైన్లను (Sea Mines) వేయవచ్చని సమాచారం. దీనివల్ల కేవలం శత్రు దేశాల నౌకలే కాదు, సాధారణ వాణిజ్య నౌకల రాకపోకలు కూడా పూర్తిగా నిలిచిపోతాయి. ఇది ప్రపంచవ్యాప్తంగా చమురు సంక్షోభానికి దారితీసి, పెట్రోల్ ధరలను ఊహించని స్థాయికి తీసుకెళ్లవచ్చు.

ఇజ్రాయెల్ - లెబనాన్ సరిహద్దులో ఉద్రిక్తత

ఒకవైపు అమెరికాతో యుద్ధం జరుగుతుండగానే, ఇటు ఇజ్రాయెల్ కూడా ఇరాన్ అనుబంధ సంస్థలపై దాడులు తీవ్రం చేస్తోంది.

ఈ 5 రోజుల గడువు అనేది ఒక "టైమ్ బాంబ్" వంటిది. చర్చలు సఫలమైతే శాంతి దిశగా అడుగులు పడతాయి, లేదంటే మార్చి 29 తర్వాత పశ్చిమాసియాలో విద్యుత్ ప్లాంట్లు, చమురు క్షేత్రాల విధ్వంసం మొదలై అది ప్రపంచ ఆర్థిక వ్యవస్థపై కోలుకోలేని దెబ్బ తీస్తుంది. ట్రంప్ ఈ 5 రోజుల సమయాన్ని అటు ఆర్థిక మార్కెట్ల సర్దుబాటుకు , ఇటు ఇరాన్‌పై దౌత్యపరమైన ఒత్తిడి పెంచడానికి వాడుకుంటున్నారు. ఇరాన్ మాత్రం దీన్ని ఒక "సైకలాజికల్ వార్"గా అభివర్ణిస్తూ, తగ్గేదే లేదన్న సంకేతాలిస్తోంది.