'నాటో' పై ట్రంప్ చిందులు, అవన్నీ కాగితపు పులులంటూ ఎద్దేవా!

ఇరాన్‌తో అమెరికా యుద్ధం 29వ రోజుకు చేరింది. పరస్పర హెచ్చరికలు తారాస్థాయికి చేరుకున్నాయి. సరిగ్గా ఈ సమయంలోనే నాటో (NATO) దేశాల తీరుపై అమెరికా అధ్యక్షుడు డొనాల్డ్ ట్రంప్ తీవ్ర అసంతృప్తి వ్యక్తం చేశారు. నాటో ఒక 'కాగితపు పులి' అని, గతంలో తాము ఆ దేశాలకు అండగా నిలిచినా, ఇప్పుడు అవసరమైనప్పుడు అవి తమకు సాయం చేయడం లేదని మండిపడ్డారు.

ఇరాన్ తాజాగా సౌదీ అరేబియాలోని అమెరికా సైనిక స్థావరంపై క్షిపణులతో దాడి చేసింది. ఈ దాడిలో సుమారు 10 నుండి 12 మంది అమెరికా సైనికులు గాయపడినట్లు, కొన్ని యుద్ధ విమానాలు దెబ్బతిన్నట్లు నివేదికలు చెబుతున్నాయి.

అదనపు బలగాల మోహరింపు...

అమెరికా అధ్యక్షుడు డొనాల్డ్ ట్రంప్ పశ్చిమాసియాకు మరో 10,000 మంది అదనపు సైనికులను, అత్యాధునిక ఫైటర్ జెట్లను పంపాలని నిర్ణయించారు.

మయామిలో జరిగిన పెట్టుబడిదారుల సదస్సులో ఆయన మాట్లాడుతూ.. ఇరాన్‌పై యుద్ధం నాలుగో వారానికి చేరుతున్నా యూరప్ దేశాల నుంచి ఆశించిన మద్దతు లభించడం లేదన్నారు. "గతంలో వారి కోసం మేము ఎప్పుడూ సిద్ధంగా ఉండేవాళ్ళం. కానీ ఇప్పుడు వారి ప్రవర్తన చూస్తుంటే, మేము కూడా వారి పక్షాన ఉండాల్సిన అవసరం లేదనిపిస్తోంది" అని వ్యాఖ్యానించారు. ఒకరిపై దాడి జరిగితే అందరూ కలిసి పోరాడాలనే నాటో నిబంధన (ఆర్టికల్ 5)పై కూడా ట్రంప్ అనుమానాలు రేకెత్తించారు.

ట్రంప్ వ్యాఖ్యలను పరిశీలిస్తే, ఆయన అంతర్జాతీయ దౌత్య మర్యాదల కంటే తన 'అమెరికా ఫస్ట్' విధానానికే మొగ్గు చూపుతున్నట్లు అర్థమవుతోంది.

"మీరు మాకు సాయం చేయకపోతే, మేము మీకు రక్షణ కల్పించం" అని అనడం ద్వారా దశాబ్దాలుగా ఉన్న రక్షణ ఒప్పందాలను ఆయన కేవలం వ్యాపార లావాదేవీలుగా చూస్తున్నారు.

నాటోను 'పేపర్ టైగర్' అని పిలవడం ద్వారా మిత్రదేశాల ఆత్మవిశ్వాసాన్ని దెబ్బతీస్తున్నారు. ఇది రష్యా వంటి దేశాలకు పరోక్షంగా అవకాశం ఇచ్చినట్లవుతుంది.

ఇరాన్ పై దాడి చేసే ముందు మిత్రదేశాలను సంప్రదించకుండా, ఇప్పుడు వారు సైనిక సాయం చేయడం లేదని నిందించడం ట్రంప్ కే చెల్లింది.

గతంలో యూరప్ దేశాలతో సంబంధాలు మెరుగుపడినా, డెన్మార్క్ పరిధిలోని గ్రీన్ లాండ్‌ను ఆక్రమిస్తామంటూ ట్రంప్ చేసిన వ్యాఖ్యలతో మళ్లీ ఉద్రిక్తతలు పెరిగాయి.

ఈ యుద్ధంలో అమెరికా పదాతి దళాలను (Ground Troops) రంగంలోకి దించాల్సిన అవసరం లేదని, మరికొద్ది వారాల్లోనే యుద్ధం ముగుస్తుందని అమెరికా విదేశాంగ మంత్రి మార్కో రూబియో ధీమా వ్యక్తం చేశారు.

మధ్యప్రాచ్యం అతలాకుతలం..

ఇటు లెబనాన్ లోనూ ఇస్రాయెల్ దాడుల వల్ల ప్రాణనష్టం భారీగా పెరుగుతోంది. మార్చి 2 నుంచి జరిగిన దాడుల్లో సుమారు 1,142 మంది మరణించినట్లు అక్కడి ఆరోగ్య శాఖ వెల్లడించింది.

ఇరాన్ అభ్యర్థన మేరకు ఆ దేశ ఇంధన వనరులపై (Energy Sector) జరపాలనుకున్న దాడులను ఏప్రిల్ 6 వరకు వాయిదా వేస్తున్నట్లు ట్రంప్ ప్రకటించారు. అయితే తాము ఎలాంటి అభ్యర్థన చేయలేదని ఇరాన్ స్పష్టం చేసింది.

పాకిస్థాన్ మధ్యవర్తిత్వంతో అమెరికా ఒక 15 పాయింట్ల శాంతి ప్రతిపాదనను పంపింది. కానీ, ఇది ఏకపక్షంగా ఉందని ఇరాన్ దీనిని తిరస్కరించింది. తమపై ఉన్న ఆర్థిక ఆంక్షలను పూర్తిగా ఎత్తివేసే వరకు వెనక్కి తగ్గేది లేదని ఇరాన్ విదేశాంగ శాఖ ప్రకటించింది.

ఇరాన్ ఆధీనంలో హార్మూజ్ జలసంధి..

ఇరాన్ ఈ కీలకమైన సముద్ర మార్గాన్ని తన ఆధీనంలోకి తీసుకుని, శత్రు దేశాల నౌకలను అడ్డుకుంటోంది. థాయ్‌లాండ్ వంటి కొన్ని దేశాలు ఇరాన్‌తో ఒప్పందం కుదుర్చుకుని తమ చమురు ట్యాంకర్లకు సురక్షిత మార్గాన్ని పొందాయి.