ఇరాన్ ధైర్యమేమిటీ? ఎందుకింతలా తెగబడుతోందీ?

ఇరాన్-ఇజ్రాయెల్ యుద్ధం నేటితో 30వ రోజుకు చేరుకుంది. అమెరికా అండతో ఇజ్రాయెల్ క్షిపణి దాడులతో విరుచుకుపడుతున్నా, ఇరాన్ ఏమాత్రం బెదరడం లేదు. పైగా సరికొత్త హెచ్చరికలతో పశ్చిమ దేశాలను వణికిస్తోంది. మరోవైపు అమెరికా అధ్యక్షుడు డొనాల్డ్ ట్రంప్ చేసిన వివాదాస్పద వ్యాఖ్యలు ఇప్పుడు ప్రపంచవ్యాప్తంగా చర్చనీయాంశమయ్యాయి.

సౌదీ అరేబియా మద్దతుతో మయామిలో జరిగిన ఫ్యూచర్ ఇన్వెస్ట్‌మెంట్ ఇనిషియేటివ్ (FII) ప్రయారిటీ సమ్మిట్'లో ట్రంప్ చేసిన ప్రసంగం తీవ్ర దుమారం రేపుతోంది. గ్లోబల్ ఇన్వెస్ట్‌మెంట్, ఆర్థిక వృద్ధి గురించి మాట్లాడాల్సిన సమయంలో, ఆయన అకస్మాత్తుగా స్క్రిప్ట్‌కు భిన్నంగా వెళ్లారు.

ఎప్స్టీన్ కేసు ప్రస్తావన: ఈ సందర్భంగా ట్రంప్ చేసిన వ్యాఖ్యలు పాత వివాదాలను, ముఖ్యంగా జెఫ్రీ ఎప్స్టీన్ (Jeffrey Epstein) కేసును మళ్లీ తెరపైకి తెచ్చాయి. ఆయన ధోరణి, తీర్పుపై విమర్శకులు మండిపడుతున్నారు.ఇది దేశ ప్రతిష్టకు 'ప్రమాదకరం' అని అభివర్ణిస్తున్నారు.

ట్రంప్ వ్యాఖ్యలు, ఇరాన్ యుద్ధంలో అమెరికా జోక్యంపై అగ్రరాజ్యంలో నిరసనలు మిన్నంటుతున్నాయి. "నో కింగ్స్" పేరుతో లక్షలాది మంది వీధుల్లోకి వచ్చి ట్రంప్ నిరంకుశ ధోరణిని ఎండగడుతున్నారు. "మాకు యుద్ధం వద్దు - శాంతి కావాలి" అంటూ వాషింగ్టన్ నుంచి కాలిఫోర్నియా వరకు ప్రజలు భారీ ర్యాలీలు నిర్వహిస్తున్నారు. విదేశీ విధానాల్లో ట్రంప్ తీసుకుంటున్న నిర్ణయాలు అమెరికాను ముంచేస్తాయని వారు ఆందోళన చెందుతున్నారు.

తమ దేశంలోని విద్యాసంస్థలపై దాడులకు ప్రతికారంగా, మధ్యప్రాచ్యంలోని అమెరికా అనుబంధ యూనివర్సిటీలను లక్ష్యంగా చేసుకుంటామని ఇరాన్ హెచ్చరించింది. ప్రపంచ చమురు రవాణాకు కీలకమైన హార్ముజ్ జలసంధిని మూసివేస్తామని బెదిరించడం ద్వారా ప్రపంచ దేశాల వెన్నులో వణుకు పుట్టిస్తోంది. దీనివల్ల పాకిస్థాన్ వంటి దేశాల్లో ఇంధన ధరలు ఆకాశాన్నంటాయి.

మెన్‌లోని హూతీలు, ఇరాక్ మిలీషియాల ద్వారా ఇజ్రాయెల్, అమెరికా స్థావరాలపై దాడులను తీవ్రతరం చేసింది.

మరోవైపు, ఇరాన్ లోపలికి వెళ్లి గ్రౌండ్ ఆపరేషన్లు (భూతల దాడులు) చేసేందుకు అమెరికా రక్షణ శాఖ 'పెంటగాన్' ప్రణాళికలు సిద్ధం చేస్తోంది. చమురు నిల్వ కేంద్రమైన ఖార్గ్ ద్వీపంపై దాడులు చేయడమే లక్ష్యంగా ఈ ప్లాన్ ఉన్నట్లు తెలుస్తోంది.

పశ్చిమాసియాలో జరుగుతున్న పరిణామాలు భూతల పోరు దిశగా అనుమానాలు పెంచుతున్నాయి. ఈ ప్రాంతంలో అమెరికా తన సైనిక బలగాల మోహరింపును పెంచుతోంది. ఇరాన్‌ కూడా శాంతి చర్చలను సీరియస్‌గా తీసుకోవడంలేదు. ఏడాది లోపే తమపై రెండుసార్లు దాడి చేసిన ట్రంప్‌ సర్కారును ఆ దేశం విశ్వసించడంలేదు. చర్చల ప్రయత్నాల మాటున భూతల యుద్ధానికి అమెరికా సన్నద్ధమవుతోందని అనుమానిస్తోంది. ఈ నేపథ్యంలో చర్చలపై దృష్టి సారించడానికి బదులు.. అగ్రరాజ్య పదాతిదళ దాడులను తిప్పికొట్టే సన్నాహాలకు ప్రాధాన్యం ఇస్తోంది.

భూతల ఆపరేషన్‌కు ట్రంప్‌ ఆమోదం తెలిపారా అన్నదానిపై స్పష్టత లేదు. అయితే ఆ అంశాన్ని ఆయన పరిశీలిస్తున్నట్లు ప్రస్తుత పరిణామాలు చెబుతున్నాయి. గల్ఫ్‌లో వేలమంది సైనికులను అమెరికా మోహరిస్తోంది. 82వ ఎయిర్‌బార్న్‌ డివిజన్‌కు చెందిన 2వేల మంది సైనికులను ఇప్పటికే రంగంలోకి దించింది.

ఒకవైపు యుద్ధం ముదురుతుంటే, మరోవైపు దేశాధినేత వ్యాఖ్యలు, అంతర్గత నిరసనలు అమెరికాను ఇరకాటంలో నెట్టాయి. ఈ క్లిష్ట పరిస్థితుల్లో ఇరాన్ తన పట్టును మరింత బిగిస్తోంది.