రండి, రండి.. నరకానికి దారి ఇదే!

ఇరాన్-అమెరికా యుద్ధం తారాస్థాయికే చేరినట్టు కనిపిస్తోంది. ఇరాన్ ప్రాంతానికి అమెరికా తన సైనిక బలగాలను భారీగా మోహరిస్తుండడాన్ని ఇరాన్ తీవ్రంగా దుయ్యబట్టింది. ముఖ్యంగా ఇరాన్ అధికారిక ఇంగ్లీష్ దినపత్రిక 'ది టెహ్రాన్ టైమ్స్' ప్రచురించిన కథనం ఇప్పుడు ప్రపంచవ్యాప్తంగా సంచలనం సృష్టిస్తోంది.

అమెరికా సుమారు 10,000 మంది అదనపు సైనికులను పంపుతోందన్న వార్తలపై ఇరాన్ తీవ్రంగా స్పందించింది. తన పత్రికా ముఖచిత్రంపై “వెల్‌కమ్ టు హెల్” (నరకానికి స్వాగతం) అనే హెడ్డింగ్‌తో అమెరికాకు నేరుగా సవాల్ విసిరింది.

ప్రస్తుతం సుమారు 3,500 మంది మెరైన్ సైనికులు USS ట్రిపోలి యుద్ధనౌక ద్వారా సెంట్రల్ కమాండ్ (CENTCOM) పరిధిలోకి చేరుకున్నారు. ఈ భారీ మోహరింపు వెనుక బలమైన కారణం ఉందనే వాదనలు వినిపిస్తున్నాయి.

ఇరాన్‌కు వ్యూహాత్మకంగా అత్యంత కీలకమైన 'ఖార్గ్ ఐలాండ్'ను స్వాధీనం చేసుకునేందుకు అమెరికా ప్లాన్ చేస్తోందని సమాచారం.

ఆపరేషన్ ఎపిక్ ఫ్యూరీ: ఇప్పటికే ఈ దీవిపై 'ఆపరేషన్ ఎపిక్ ఫ్యూరీ' పేరుతో అమెరికా దాడులు చేస్తోంది. ఇప్పుడు సైనికుల రాకతో అది మరింత ముదిరే అవకాశం ఉంది.

ఫిబ్రవరి 28 నుండి అమెరికా-ఇజ్రాయెల్ ఉమ్మడిగా ఇరాన్‌పై దాడులు కొనసాగిస్తున్నాయి. CENTCOM నివేదికల ప్రకారం పరిస్థితి ఇలా ఉంది.

ఇప్పటివరకు అమెరికా దళాలు 11,000 కంటే ఎక్కువ యుద్ధ విమానాల విన్యాసాలు (Combat Flights) నిర్వహించాయి.

ఇరాన్‌కు చెందిన సుమారు 150 యుద్ధ నౌకలను అమెరికా ధ్వంసం చేసినట్లు తెలుస్తోంది.

ఇస్లామిక్ రివల్యూషనరీ గార్డ్ కార్ప్స్ (IRGC) స్థావరాలు, క్షిపణి కేంద్రాలు, వైమానిక రక్షణ వ్యవస్థలే లక్ష్యంగా దాడులు జరుగుతున్నాయి.

మరోవైపు ఇరాన్ కూడా వెనక్కి తగ్గడం లేదు. ట్రంప్, నెతన్యాహులను లక్ష్యంగా చేసుకుని 'హంట్ అండ్ ఎలిమినేట్' ఆపరేషన్ ప్రారంభించినట్లు ప్రచారం జరుగుతోంది. అమెరికాకు చెందిన F-16 యుద్ధ విమానాలను తమ క్షిపణులు ఢీకొట్టాయని ఇరాన్ క్లెయిమ్ చేస్తోంది.

మధ్యప్రాచ్యంలో నెలకొన్న ఈ ఉద్రిక్తతలు ఎటు దారితీస్తాయోనని ప్రపంచ దేశాలు ఆందోళన చెందుతున్నాయి. ఇరాన్ అన్నట్టుగా ఇది అమెరికాకు 'నరకం' అవుతుందా లేక ఇరాన్ తన సామర్థ్యాన్ని కోల్పోతుందా అనేది వేచి చూడాలి.