హర్ముజ్ మళ్లీ మూత, లెబనాన్ లో బాంబుల మోత!
లెబనాన్ పై దాడులకు ఇరాన్ నిరసన, నిలిచిపోయిన 426 ఆయిల్ నౌకలు! 41వ రోజుకు చేరిన యుద్ధం
ఇరాన్ పై అమెరికా, ఇజ్రాయెల్ యుద్ధం 41వ రోజుకు చేరుకుంది. అమెరికా చొరవతో ప్రకటించిన తాత్కాలిక కాల్పుల విరమణ ఒప్పందం మొదటి రోజే తీవ్ర ఉద్రిక్తతల మధ్య చిక్కుకుంది. లెబనాన్పై ఇజ్రాయెల్ జరిపిన భారీ దాడులతో పశ్చిమాసియాలో శాంతి ప్రక్రియ ప్రశ్నార్థకంగా మారింది. కాల్పుల విరమణ ఇరాన్తో మాత్రమేనని, హిజ్బుల్లాతో కాదని స్పష్టం చేస్తూ ఇజ్రాయెల్ లెబనాన్పై విరుచుకుపడింది. కేవలం 10 నిమిషాల వ్యవధిలో 100కు పైగా లక్ష్యాలపై ఇజ్రాయెల్ దాడులు చేసింది. ఈ దాడుల్లో 182 మంది మరణించగా, వందలాది మంది గాయపడ్డారని లెబనాన్ ఆరోగ్య మంత్రిత్వ శాఖ వెల్లడించింది.
హర్ముజ్ జలసంధి మూసివేత
లెబనాన్పై ఇజ్రాయెల్ దాడులను కాల్పుల విరమణ ఒప్పంద ఉల్లంఘనగా ఇరాన్ పేర్కొంది. దీనికి నిరసనగా కీలకమైన హర్ముజ్ జలసంధి (Strait of Hormuz) గుండా నౌకల రాకపోకలను ఇరాన్ రివల్యూషనరీ గార్డ్స్ నిలిపివేసింది. ప్రపంచ చమురు సరఫరాకు ఈ మార్గం అత్యంత కీలకం కావడంతో అంతర్జాతీయంగా ఆందోళన మొదలైంది.
ఇజ్రాయెల్ దాడులను 'ఒప్పంద ఉల్లంఘన'గా ఇరాన్ అభివర్ణించింది. అమెరికా, ఇరాన్ల మధ్య కుదిరిన కాల్పుల విరమణ ఇరాన్పై దాడులకు మాత్రమే పరిమితమని, లెబనాన్లోని హిజ్బుల్లాపై దాడులు కొనసాగుతాయని ఇజ్రాయెల్ ప్రధాని నెతన్యాహు స్పష్టం చేశారు. ఒప్పందం కుదిరిన కొద్ది గంటల్లోనే ఇజ్రాయెల్ లెబనాన్పై అత్యంత భారీ స్థాయిలో వైమానిక దాడులు చేసింది. 10 నిమిషాల్లో 100 లక్ష్యాలపై దాడులు జరిగాయి. దీన్ని ఇరాన్ ఒప్పంద ఉల్లంఘనగా పరిగణిస్తూ నిరసనగా జలసంధిని మూసివేసింది.
ప్రపంచ చమురు సరఫరాలో దాదాపు 20% నుండి 30% వరకు ఈ జలసంధి గుండానే జరుగుతుంది. దీన్ని మూసివేయడం ద్వారా అంతర్జాతీయంగా చమురు ధరలను పెంచి, అమెరికా, ఇజ్రాయెల్లపై ఒత్తిడి తీసుకురావాలని ఇరాన్ రివల్యూషనరీ గార్డ్స్ (IRGC) భావిస్తోంది. అమెరికా విధించిన ఆంక్షల ఎత్తివేత, ఇజ్రాయెల్ తన దాడులను పూర్తిగా ఆపాలని ఇరాన్ డిమాండ్ చేస్తోంది. ఈ డిమాండ్లు నెరవేరనంత వరకు జలసంధిని తెరిచే ప్రసక్తే లేదని ఇరాన్ పార్లమెంట్ స్పీకర్ హెచ్చరించారు.
ప్రస్తుతం ఈ జలసంధి మూసివేత వల్ల 426 చమురు నౌకలు అక్కడే నిలిచిపోయాయి. దీనివల్ల ప్రపంచ మార్కెట్లో చమురు ధరలు ఒక్కసారిగా పెరిగి ఆర్థిక అనిశ్చితి నెలకొంది.
పాకిస్థాన్లో చర్చలు..
ఈ ఉద్రిక్తతల నడుమ శనివారం పాకిస్థాన్లోని ఇస్లామాబాద్లో ఇరు దేశాల ప్రతినిధులు భేటీ కానున్నారు. అమెరికా తరపున ఉపాధ్యక్షుడు జేడీ వాన్స్, స్టీవ్ విట్కాఫ్, జారెడ్ కుష్నర్ ఈ చర్చల్లో పాల్గొననున్నారు. అయితే, చర్చలు మొదలవ్వకముందే తమ ప్రతిపాదనలను ఇజ్రాయెల్ ఉల్లంఘిస్తోందని ఇరాన్ పార్లమెంట్ స్పీకర్ మండిపడ్డారు.
శాంతి ఒప్పందంపై నెలకొన్న సందిగ్ధతతో ఆసియా స్టాక్ మార్కెట్లు నష్టాల్లో ముగిశాయి. హాంకాంగ్, చైనా, జపాన్ మార్కెట్లు 0.6% నుండి 1.1% వరకు పతనాన్ని చవిచూశాయి. అటు చమురు ధరలు మళ్లీ పెరిగాయి. బ్రెంట్ క్రూడ్ ధర బ్యారెల్కు $96.75 కి చేరుకుంది.
హర్ముజ్ జలసంధి మూసివేత వల్ల రోజుకు సుమారు 1.2 కోట్ల నుండి 1.5 కోట్ల బ్యారెళ్ల చమురు సరఫరా ఆగిపోయే ప్రమాదం ఉందని విశ్లేషకులు హెచ్చరిస్తున్నారు. కాల్పుల విరమణ నిలవకపోతే ప్రపంచ ఆర్థిక వ్యవస్థపై తీవ్ర ప్రభావం పడే అవకాశం ఉంది.
ప్రస్తుతానికి ఇటు ఇజ్రాయెల్ దాడులు, అటు హిజ్బుల్లా ప్రతిదాడులతో సరిహద్దు ప్రాంతాలు రణరంగంగానే ఉన్నాయి. శనివారం నాటి చర్చలే ఈ యుద్ధ గమనాన్ని నిర్ణయించనున్నాయి.
Next Story