OTT ప్రియులకు టాలీవుడ్ గట్టి షాక్ !

సినిమా రిలీజైన నెల రోజుల్లోనే ఇంట్లోనే కూర్చుని సోఫాలో పడుకుని ఓటీటీలో చూసేద్దాం అనుకునే వారికి టాలీవుడ్ గట్టి షాక్ ఇవ్వబోతోంది. ఇకపై మీరు మొబైల్ స్క్రీన్‌పై కొత్త బొమ్మ చూడాలంటే కనీసం రెండు నెలలు ఆగాల్సిందే! అవును, టాలీవుడ్ వర్గాల నుంచి వస్తున్న సమాచారం ప్రకారం '8 వారాల నిబంధన' (8-Week Rule) మళ్ళీ అమల్లోకి రాబోతోంది. అసలు ఓటీటీ సంస్థలు ఎందుకు వెనకడుగు వేస్తున్నాయి? ఈ కొత్త రూల్ వెనుక ఉన్న అసలు కారణం ఏంటి?

కొన్నేళ్ల క్రితం వరకు టాలీవుడ్ నిర్మాతలకు సినిమా రిలీజ్ అంటే భయం కాదు… పండుగ. ఎందుకంటే ఒక సినిమా థియేటర్లలో ఎలా ఆడినా… OTT డీల్ అన్నది బీమా లాంటిది. ఫ్లాప్ అయినా డబ్బు వచ్చేది. హిట్ అయితే అదనంగా లాభం. కానీ 2025 చివరి నుండి పరిస్థితి ఒక్కసారిగా తలకిందులైంది. ఇప్పుడు టాలీవుడ్ ముందున్న సమస్య “సినిమా తీయటం కాదు… అమ్మటం!”

పాతాళానికి పడిపోయిన ఓటీటీ డీల్స్!

ఒకప్పుడు ప్రభాస్ సినిమాలంటే రూ. 200 కోట్లు, అల్లు అర్జున్ 'పుష్ప-2' కి ఏకంగా రూ. 275 కోట్ల డీల్స్ చూసి అందరి మైండ్ బ్లాక్ అయ్యింది. కానీ ఇప్పుడు సీన్ రివర్స్ అయ్యింది. నెట్‌ఫ్లిక్స్, అమెజాన్ వంటి దిగ్గజ సంస్థలు ఇప్పుడు తెలుగు సినిమాలపై ఖర్చు తగ్గించేశాయి. రీసెంట్‌గా 'ధురంధర్' వంటి భారీ సినిమాకు సైతం కేవలం రూ. 290 కోట్లు మాత్రమే ఆఫర్ రావడం ఇండస్ట్రీని ఉలిక్కిపడేలా చేసింది. స్టార్ సినిమాలు కాకుండా మీడియం రేంజ్ చిత్రాల పరిస్థితి అయితే మరీ దారుణంగా తయారైంది.

ఒకప్పుడు OTTలే టాలీవుడ్‌కు బంగారు గనులు

పాన్ ఇండియా మార్కెట్ వచ్చాక నిర్మాతల బిజినెస్ మోడల్ మారిపోయింది. స్టార్ హీరో సినిమా అంటే ముందే భారీ డిజిటల్ డీల్. రిలీజ్ కాకముందే నిర్మాతకు ఖర్చు రికవరీ. థియేటర్ కలెక్షన్స్ = లాభం. ఒక దశలో స్టార్ సినిమాలు వందల కోట్లకు అమ్ముడయ్యాయి.

డిజిటల్ హక్కులు థియేటర్ బిజినెస్ కంటే పెద్దవి అయ్యాయి. అందుకే 2020–2023 మధ్య టాలీవుడ్‌లో ఒక ట్రెండ్ వచ్చింది: “సినిమా ప్రేక్షకుల కోసం కాదు… OTT కోసం తయారు చేయడం.” స్టోరీలు కూడా మారాయి — థియేటర్ మాస్ ఎలిమెంట్స్ తగ్గి, బింజ్-వాచ్ ఫ్రెండ్లీ నారేషన్ పెరిగింది.

థియేటర్లు ఖాళీ.. ఓటీటీలు బిజీ!

ఈ క్రమంలో థియేటర్లలో జనాలు రాకపోవడం, సినిమాలు రిలీజైన వారం పది రోజుల్లోనే ఫ్లాప్ టాక్ తెచ్చుకోవడం ఇండస్ట్రీని వేధిస్తోంది. విశ్వక్ సేన్ 'ఫంకీ', సుహాస్ 'హే బల్‌వంత్', 'కపుల్ ఫ్రెండ్లీ' వంటి సినిమాలు బాక్సాఫీస్ వద్ద ఆశించిన స్థాయిలో ఓపెనింగ్స్ రాబట్టలేకపోయాయి. దీంతో మేకర్స్ ఎలాగైనా జనాలని థియేటర్లకు రప్పించాలని ఫిక్స్ అయ్యారు. అందుకే తెలుగు ఫిల్మ్ చాంబర్ ఎగ్జిక్యూటివ్ కమిటీ మీటింగ్‌లో ఈ '8 వీక్ విండో' అంశం చర్చకు వచ్చింది.

ఇప్పుడు OTTలు ఎందుకు వెనక్కి?

ఇది కేవలం టాలీవుడ్ సమస్య కాదు. ఇది OTT బిజినెస్ రియాలిటీ.

OTTల మొదటి దశ: Subscriber acquisition phase

అప్పుడు వాళ్ల లక్ష్యం — ఎంత ఖర్చయినా కంటెంట్ కొనాలి. ఎందుకంటే ప్రతి రాష్ట్రంలో కొత్త సబ్స్క్రైబర్లు కావాలి.

ఇప్పుడు రెండో దశ: Profitability phase

ఇప్పుడు ప్రశ్న ఒకటే: “ఈ సినిమా కొత్త సబ్స్క్రైబర్ తెస్తుందా?”. తీసుకురాకపోతే — భారీ డీల్ లేదు. తెలుగు మార్కెట్‌లో ఇప్పటికే చాలా మంది OTTలు సబ్‌స్క్రైబ్ అయ్యారు. కొత్త యూజర్లు రావడం తగ్గింది. అందుకే ప్లాట్‌ఫామ్‌లు ఖర్చు కట్ చేశాయి.

అంటే ముందెన్నడూ చూడని నిజం బయటపడింది: సినిమా విలువ ఇప్పుడు స్టార్‌పై కాదు… రిటెన్షన్‌పై ఆధారపడుతోంది.

థియేటర్ కూడా ఎందుకు పడిపోతోంది?

ఇక్కడే అసలు సమస్య ఉంది. థియేటర్ మార్కెట్ పడిపోవడానికి మూడు కారణాలు:

1) ఈవెంట్ సినిమాలు మాత్రమే ఆడుతున్నాయి ప్రేక్షకుడు ఇప్పుడు స్పష్టంగా నిర్ణయించుకున్నాడు — “వీడియో అనిపిస్తే OTTలో చూస్తా… ఈవెంట్ అనిపిస్తే థియేటర్‌కు వస్తా.”

2) టికెట్ ధరలు పెరిగాయి

ఒక కుటుంబం థియేటర్‌కు వెళ్లడం ఇప్పుడు చిన్న ట్రిప్ ఖర్చుతో సమానం.

3) త్వరగా OTT రిలీజ్

మొదటి రోజు వెళ్లకపోతే 20–25 రోజుల్లోనే OTTలో వస్తుంది అనే నమ్మకం ప్రేక్షకుడిలో స్థిరపడింది.

అందుకే మిడ్ రేంజ్ సినిమాలకు ఓపెనింగ్స్ రావడం లేదు.

మౌత్ టాక్ వచ్చిన తర్వాతే ప్రేక్షకుడు వెళ్తున్నాడు — అప్పటికే షోలు తగ్గిపోతున్నాయి. అందుకే ఇప్పుడు ఎనిమిది వారాల రూల్.

ఏమిటీ ఈ 8 వారాల రూల్?

సినిమా రిలీజ్ అయిన తర్వాత 56 రోజుల వరకు ఏ ఓటీటీ ప్లాట్‌ఫారమ్‌లోనూ ఆ సినిమా స్ట్రీమింగ్ అవ్వకూడదు. గతంలో 4 వారాలకే ఓటీటీలోకి ఇచ్చేలా కొందరు నిర్మాతలు నిబంధనలు మార్చేయడంతో థియేటర్ బిజినెస్ దెబ్బతిందని చాంబర్ భావిస్తోంది. ఇప్పుడు మళ్ళీ పాత పద్ధతిని కఠినంగా అమలు చేయాలని చూస్తున్నారు. ఒకవేళ ఇది అమలైతే, ఇకపై థియేటర్లలో సినిమా చూస్తేనే తప్ప.. ఓటీటీలో చూసే ఛాన్స్ చాలా కాలం ఉండదు.

అందుకే 8 వారాల విండో నిర్ణయం

ఇండస్ట్రీ ఇప్పుడు గ్రహించిన విషయం చాలా కీలకం: OTT త్వరగా వస్తే… థియేటర్ చనిపోతుంది. థియేటర్ చనిపోతే… OTT కూడా విలువ కోల్పోతుంది. ఎందుకంటే థియేటర్ హైప్ లేకుండా OTTలో సినిమా కూడా ట్రెండ్ అవ్వదు. అందుకే మళ్లీ పాత రూల్ తెస్తున్నారు: రిలీజ్ తర్వాత 8 వారాలు పూర్తయ్యే వరకు OTTలో పెట్టకూడదు. ఇది నిజానికి నిర్మాతలకు కాదు… ప్రేక్షకుడి మైండ్‌సెట్ మార్చే ప్రయత్నం.

ప్రేక్షకుడు ఇలా ఆలోచించాలి: “థియేటర్‌లో చూడకపోతే… రెండు నెలలు వేచి చూడాలి.” అప్పుడు మాత్రమే ఫస్ట్ వీక్ కలెక్షన్స్ పెరుగుతాయి.

కానీ రిస్క్ కూడా ఉంది

ఈ నియమం పనిచేయాలంటే రెండు షరతులు: ఈ రూల్ ని అందరు నిర్మాతలు కచ్చితంగా పాటించాలి. పెద్ద స్టార్ సినిమాలు కూడా అదే రూల్‌లో రావాలి. ఒక పెద్ద సినిమా బ్రేక్ చేస్తే… మొత్తం సిస్టమ్ మళ్లీ కూలిపోతుంది.

అసలు సమస్య సినిమాల్లోనే ఉందా?

చాలామంది OTTని తప్పుపడుతున్నారు. కానీ లోతుగా చూస్తే సమస్య మరింత తాత్వికం.ఇంతకు ముందు: సినిమా అనేది అరుదైన అనుభవం. ఇప్పుడు: సినిమా అంటే ప్యూర్ కంటెంట్. ప్రేక్షకుడు సినిమా చూడటం కాదు… స్క్రోల్ చేయటానికి అలవాటు పడిపోయాడు. అందుకే చిన్న సినిమా హిట్ కావాలంటే ఇప్పుడు మంచి కథ సరిపోదు. “రావాల్సిందే” అనిపించే అనుభవం ఇవ్వాలి.

ఏదైమైనా కంటెంట్ బాగుంటే ఆడియన్స్ థియేటర్లకే వస్తారని, ఓటీటీలో త్వరగా వచ్చేస్తుందన్న కారణంతోనే చాలా మంది వెయిట్ చేస్తున్నారని ఇండస్ట్రీ పెద్దలు విశ్లేషిస్తున్నారు. ఈ కొత్త నిర్ణయం వల్ల థియేటర్లు మళ్ళీ కళకళలాడతాయా? లేదా ఓటీటీ డీల్స్ ఇంకా తగ్గిపోతాయా? అన్నది చూడాలి. మరి మీరు థియేటర్ లో చూడటానికి ఇష్టపడతారా లేక 8 వారాలైనా సరే ఓటీటీ కోసమే వెయిట్ చేస్తారా?