మైసూర్ శాండిల్ సబ్బుకు బ్రాండ్ అంబాసిడర్‌గా తమన్నా..

ప్రతి బ్రాండ్‌కు పబ్లిసిటీ అవసరం. ప్రాడక్టును బట్టి ఇందుకోసం క్రికెటర్లను, సినీతారలను ఎంపిక చేసుకుంటారు. అయితే కర్ణాటక ప్రభుత్వానికి చెందిన కర్ణాటక సబ్బులు, డిటర్జెంట్స్ లిమిటెడ్ (KSDL), తమ మైసూర్ శాండల్ సబ్బుకు బహుభాషా నటి తమన్నా భాటియాను బ్రాండ్ అంబాసిడర్‌గా సెలెక్టు చేసుకోవడంతో రాష్ట్రంలో చర్చ మొదలైంది. రెండేళ్ల కాలపరిమితికి ఆమెకు సుమారు రూ.6.20 కోట్ల పారితోషికం ఇవ్వనున్నట్లు సమాచారం. ఈ నిర్ణయంపై కన్నడ అనుకూల సంఘాలు, కొంతమంది ప్రజా ప్రతినిధులు అభ్యంతరం వ్యక్తం చేస్తున్నారు.

తమన్నా ఎంపికకు కారణమదే..

ప్రభుత్వం తమ ఎంపికను సమర్థిస్తూ తమన్నాకు సోషల్ మీడియాలో 28 మిలియన్లకు పైగా అనుచరులు ఉన్నారని చెబుతోంది. ఆమెకు దక్షిణ భారతంతో పాటు హిందీ మాట్లాడే ఉత్తర భారత మార్కెట్లో కూడా మంచి గుర్తింపు ఉందని, యువతను ఆకర్షించాలంటే దేశవ్యాప్తంగా గుర్తింపు ఉన్న ముఖం అవసరమని వాదిస్తోంది.

విమర్శకుల మాట..

అయితే విమర్శకులు మాత్రం కన్నడ మూలాలున్న నటులకు కూడా సోషల్ మీడియా ఫాలోయింగ్ కూడా ఎక్కువగానే ఉందని చెబుతున్నారు. ఉదాహరణకు రష్మిక మందన్నకు 48 మిలియన్లకు పైగా ఫాలోవర్స్ ఉండగా, పూజా హెగ్డే, శిల్పా శెట్టి, ఐశ్వర్య రాయ్ వంటి నటీమణులకూ భారీ అనుచర గణం ఉంది. కన్నడ పరిశ్రమకు చెందిన రాధిక పండిట్, శ్రీనిధి శెట్టి, రచితా రామ్ వంటి నటీమణులకూ మంచి ఫాలోయింగ్ ఉందని గుర్తుచేస్తున్నారు.

“స్థానికులకు అవకాశం ఇవ్వాలి”

స్థానిక ప్రముఖులకు ప్రాధాన్యం ఇవ్వాలని రాజకీయ నాయకులు కోరుతున్నారు. గతంలో పునీత్ రాజ్‌కుమార్, శివరాజ్‌కుమార్, దర్శన్ వంటి ప్రముఖులు ప్రభుత్వ సంస్థలకు ఎటువంటి పారితోషికం లేకుండా బ్రాండ్ అంబాసిడర్‌లుగా పనిచేసిన ఉదాహరణలు ఉన్నాయని వారు చెబుతున్నారు. అదే విధంగా క్రికెటర్ అనిల్ కుంబ్లే కూడా అటవీ శాఖకు ఉచితంగా ప్రచారం చేసిన విషయాన్ని గుర్తుచేస్తున్నారు. KSDL కూడా భారీ ఖర్చు లేకుండా రాష్ట్రానికి చెందిన ప్రముఖులను ఎంపిక చేసుకోవచ్చని అభిప్రాయాలు వ్యక్తమవుతున్నాయి.

రాజకీయ ప్రతిస్పందన..

జేడీఎస్, బీజేపీ నేతలు ప్రభుత్వ నిర్ణయాన్ని తీవ్రంగా విమర్శిస్తున్నారు. కొందరు ఎమ్మెల్యేలు నిరసన తెలుపుతూ.. ఆ డబ్బును రైతులకు లేదా ఉపాధి సృష్టికి వినియోగించాలని సూచించారు. “మైసూర్ శాండల్ సబ్బుకు ప్రత్యేకంగా అంబాసిడర్ అవసరం లేదు; ప్రతి కన్నడిగుడే అంబాసిడర్” అని నటి రమ్య సోషల్ మీడియాలో వ్యాఖ్యానించారు.

సబ్బుకున్న చరిత్ర ఏమిటి?

మైసూర్ శాండల్ సబ్బుకు శతాబ్దం పైబడి చరిత్ర ఉంది. 1916లో మైసూర్ మహారాజా నల్వాడి కృష్ణరాజ వడియార్, దివాన్ సర్ ఎం. విశ్వేశ్వరయ్య ఈ ఫ్యాక్టరీని స్థాపించారు. ఇది ప్రపంచంలోనే 100 శాతం స్వచ్ఛమైన సహజ గంధపు నూనెతో తయారయ్యే ప్రత్యేక సబ్బుగా గుర్తింపు పొందింది. భౌగోళిక సూచిక (GI) ట్యాగ్ కూడా పొందింది.

వ్యాపార కోణం..

KSDL గణాంకాల ప్రకారం 2024–25 ఆర్థిక సంవత్సరంలో సంస్థ రూ.1,785 కోట్ల టర్నోవర్ సాధించింది. అందులో కేవలం 18 శాతం అమ్మకాలు మాత్రమే కర్ణాటకలోనివి కాగా, 82 శాతం ఇతర రాష్ట్రాలు, విదేశీ మార్కెట్ల నుంచే వచ్చాయి. ఈ కారణంగా జాతీయ స్థాయిలో గుర్తింపు ఉన్న వ్యక్తిని ఎంపిక చేయడం అవసరమైందని ప్రభుత్వం చెబుతోంది.

తుది విశ్లేషణ..

ఈ వివాదం “ప్రాంతీయ గౌరవం” వర్సెస్ “జాతీయ మార్కెటింగ్ అవసరం” అనే రెండు భావాల మధ్య నడుస్తోంది. ఒకవైపు స్థానిక ప్రతిభకు ప్రాధాన్యం ఇవ్వాలనే డిమాండ్ ఉంటే, మరోవైపు దేశవ్యాప్తంగా బ్రాండ్ విస్తరణ లక్ష్యంగా ప్రభుత్వం నిర్ణయం తీసుకున్నట్టు కనిపిస్తోంది. మైసూర్ శాండల్ వంటి చారిత్రాత్మక బ్రాండ్‌కు ఈ నిర్ణయం ఎంతవరకు లాభం చేకూరుస్తుందో కాలమే తేల్చాల్సి ఉంది.