అనసూయ ఇచ్చిన కంప్లైంట్ తో 42 మందిపై కేసు

సోషల్ మీడియా కేవలం అభిప్రాయాలు పంచుకునే వేదిక మాత్రమే ఉండటం లేదు.. కొందరికి అది ఇతరుల వ్యక్తిత్వాన్ని హననం చేసే ఆయుధంగా మారింది. ముఖ్యంగా సెలబ్రిటీ మహిళలే లక్ష్యంగా సాగుతున్న ఈ 'డిజిటల్ దాడి' ఇప్పుడు హద్దులు దాటింది. ఇన్నాళ్లూ ఓపిక పట్టిన నటి అనసూయ, ఇప్పుడు మునుపెన్నడూ లేని విధంగా ఒకేసారి 42 మందిపై క్రిమినల్ కేసులు పెట్టి తెలుగు పరిశ్రమలో ప్రకంపనలు సృష్టించారు. ఇది కేవలం ఒక నటి పోరాటం మాత్రమే కాదు.. సోషల్ మీడియాలో రెచ్చిపోతున్న 'సైబర్ సైకోలకు' ఒక గట్టి హెచ్చరిక!

అనసూయ వర్సెస్ 42 మంది: డీప్‌ఫేక్ నుంచి డెత్ త్రెట్స్ వరకు?

టాలీవుడ్ పాపులర్ నటి, యాంకర్ అనసూయ భరద్వాజ్ మరోసారి వార్తల్లో నిలిచారు. తనపై జరుగుతున్న ఆన్‌లైన్ వేధింపులపై ఆమె సమరశంఖం పూరించారు. అసభ్యకర వ్యాఖ్యలు, మార్ఫింగ్ ఫోటోలు, డీప్‌ఫేక్ వీడియోలతో తనను మానసిక క్షోభకు గురిచేస్తున్నారంటూ ఏకంగా 42 మందిపై సైబరాబాద్ సైబర్ క్రైమ్ పోలీసులకు ఫిర్యాదు చేశారు. దీంతో పోలీసులు ఎఫ్‌ఐఆర్ నమోదు చేసి దర్యాప్తు ముమ్మరం చేశారు.

అసలేం జరిగింది?

ఈ వివాదం 2025 డిసెంబర్ 22న మొదలైంది. ఒక బహిరంగ వేదికపై ఒక తెలుగు నటుడు మహిళల దుస్తులు, శరీరాకృతిపై చేసిన వ్యాఖ్యలపై అనసూయ స్పందించారు. వ్యక్తిగత స్వేచ్ఛకు మద్దతుగా ఆమె మాట్లాడటాన్ని తప్పుబడుతూ సోషల్ మీడియాలో పెద్ద ఎత్తున దాడి మొదలైంది. ముఖ్యంగా కొన్ని యూట్యూబ్ ఛానెళ్లు, ఇన్ ఫ్లుయెన్సర్లు ఆమెను టార్గెట్ చేస్తూ అసభ్యకరమైన కంటెంట్‌ను ప్రసారం చేశారని అనసూయ ఆరోపించారు.

పిర్యాదులో ఏముంది

డిసెంబర్ 23, 2025 నుంచి తనపై సోషల్ మీడియా వేదికలైన యూట్యూబ్, ఇన్‌స్టాగ్రామ్, ఎక్స్ (ట్విట్టర్)లలో పెద్ద ఎత్తున దాడి మొదలైందని అనసూయ తన ఫిర్యాదులో తెలిపారు. టీవీ చర్చలు, యూట్యూబ్ వీడియోలు, ఇన్‌స్టాగ్రామ్ రీల్స్, లైవ్ స్ట్రీమ్స్, కామెంట్ సెక్షన్లలో తనను లక్ష్యంగా చేసుకుని అసభ్య పదజాలంతో దూషించారని ఆమె ఆవేదన వ్యక్తం చేశారు.

లైంగికంగా కించపరిచే సందేశాలు, తన శరీరాన్ని ఉద్దేశించి అసభ్య వ్యాఖ్యలు, తన వ్యక్తిత్వాన్ని దెబ్బతీసేలా పరువు నష్టం కలిగించే పోస్టులు పెట్టారని ఆమె వివరించారు. కొందరు వ్యక్తులు, కొన్ని ప్లాట్‌ఫామ్‌లు తన గౌరవానికి, వృత్తికి, పబ్లిక్ ఇమేజ్‌కు భంగం కలిగించేలా అసహ్యకరమైన రీతిలో పదేపదే చర్చించారని ఆమె ఆరోపించారు.

లిస్టులో ఉన్న ఆ 'ప్రముఖులు' వీరే!

అనసూయ ఇచ్చిన ఫిర్యాదులో జర్నలిస్టులు, లాయర్లు, తోటి నటీనటుల పేర్లు ఉండటం ఇండస్ట్రీలో హాట్ టాపిక్‌గా మారింది. ఈ ఎఫ్‌ఐఆర్‌లో మొత్తం 42 మందిని నిందితులుగా చేర్చారు. వీరిలో ప్రముఖ వ్యాఖ్యాతలు బొజ్జ సంధ్యారెడ్డి, ప్రియా చౌదరి గొగినేని, సోషల్ మీడియా ఇన్‌ఫ్లుయెన్సర్ పావని, ఆర్టిస్ట్ శేఖర్ బాషా (రాజా శేఖర్ గుడిమెట్ల), అడ్వకేట్ రజని, నటి కరాటే కల్యాణి, బిగ్ టీవీ యాంకర్ రోహిత్, ఆర్‌టీవీ న్యూస్ నెట్‌వర్క్ యాంకర్ మనోజ్ ఎజ్జిగిరి వంటి వారు ఉన్నారు. వీరితో పాటు పలువురు గుర్తు తెలియని వ్యక్తుల పేర్లను కూడా చేర్చారు. నిందితుల్లో చాలా మంది పేర్లు తెలియవని, దర్యాప్తులో వారిని గుర్తిస్తామని పోలీసులు తెలిపారు.

ఈ కేసును సైబరాబాద్ సైబర్ క్రైమ్స్ పోలీస్ స్టేషన్ ఎస్సై కె. రాధిక యాదవ్ నమోదు చేయగా, ఇన్ స్పెక్టర్ జి. విజయ్ కుమార్ దర్యాప్తు బాధ్యతలు చేపట్టారు. చట్ట ప్రకారం ఫిర్యాదుదారుకు ఎఫ్‌ఐఆర్ కాపీని ఉచితంగా అందించామని, ప్రస్తుతం ఈ కేసు దర్యాప్తు దశలో ఉందని అధికారులు తెలిపారు. ఆన్‌లైన్ కంటెంట్, సోషల్ మీడియా కార్యకలాపాలతో సహా అన్ని డిజిటల్ ఆధారాలను పరిశీలిస్తున్నామని పోలీసులు వెల్లడించారు.

డీప్‌ఫేక్ వీడియోల కలకలం!

కేవలం మాటలతోనే కాకుండా, కృత్రిమ మేధ (AI)ని ఉపయోగించి తనను లైంగికంగా కించపరిచేలా డీప్‌ఫేక్ వీడియోలు, మార్ఫింగ్ ఫోటోలు సృష్టించారని అనసూయ ఆవేదన వ్యక్తం చేశారు. ముసుగులు ధరించిన వ్యక్తులు తనను ప్రాణాలతో బెదిరించారని కూడా ఆమె ఫిర్యాదులో పేర్కొన్నారు. ఈ వేధింపుల వల్ల తన కుటుంబం తీవ్ర భయాందోళనలకు గురవుతోందని ఆమె స్పష్టం చేశారు.

ఈ కేసులో కీలకాంశాలు:

డీప్‌ఫేక్ అండ్ మార్ఫింగ్: ఆర్టిఫిషియల్ ఇంటెలిజెన్స్ (AI) ఉపయోగించి అనసూయను లైంగికంగా కించపరిచేలా వీడియోలు సృష్టించడం ఈ కేసులో ప్రధాన అంశం. ఇది కేవలం పరువు నష్టం కాదు, ఒక మహిళా ప్రైవసీపై జరిగిన దాడి.

ప్రముఖుల పేర్లు: 42 మంది నిందితుల్లో కరాటే కళ్యాణి, శేఖర్ బాషా వంటి ఆర్టిస్టులతో పాటు రజని వంటి అడ్వకేట్లు, సంధ్యారెడ్డి వంటి యాంకర్లు ఉండటం గమనార్హం. అంటే మీడియా ముసుగులో జరుగుతున్న వ్యక్తిత్వ హననంపై అనసూయ నేరుగా దాడి చేశారు.

క్రిమినల్ సెక్షన్ల పవర్: పోలీసులు నమోదు చేసిన సెక్షన్లలో BNS 75 (లైంగిక వేధింపులు), 351 (నేరపూరిత బెదిరింపులు) మరియు ఐటీ చట్టం 66-E (గోప్యత భంగం) ఉన్నాయి. వీటి ప్రకారం నేరం నిరూపితమైతే కఠినమైన జైలు శిక్షలు పడే అవకాశం ఉంది.

ఎందుకు ఇది ఒక సంచలనం?

చాలామంది సెలబ్రిటీలు ఆన్‌లైన్ ట్రోలింగ్‌ను లైట్ తీసుకుంటారు. కానీ అనసూయ మాత్రం "నియమం లేని సోషల్ మీడియా" కు ఒక రూల్ సెట్ చేసే పనిలో పడ్డారు. జర్నలిస్టులు, ఇన్‌ఫ్లుయెన్సర్లు భావప్రకటన స్వేచ్ఛ పేరుతో హద్దులు దాటితే చట్టం తన పని తాను చేసుకుపోతుందని ఈ కేసు నిరూపిస్తోంది.

అనసూయ తీసుకున్న ఈ నిర్ణయం తర్వాత సోషల్ మీడియాలో "ఏది మాట్లాడాలి? ఏది మాట్లాడకూడదు?" అనే అంశంపై చర్చ మొదలైంది. ఈ 42 మందిపై చర్యలు తీసుకుంటే, భవిష్యత్తులో సోషల్ మీడియాలో మహిళలపై దాడులు తగ్గే అవకాశం ఉంది.