‘రూపాయి విలువ పడిపోయినా ఆర్థిక వ్యవస్థ బలంగా ఉంది’

భారత ఆర్థిక వ్యవస్థ బలంగా ఉందని, గ్లోబల్ పరిణామాల ప్రభావంతోనే రూపాయి క్షీణించిందని ఆర్థిక మంత్రి నిర్మలా సీతారామన్ తెలిపారు.

దేశ ఆర్థిక పరిస్థితి దృఢంగా ఉందని స్పష్టం చేశారు. లోక్‌సభలో రూపాయి విలువ తగ్గుదలపై అడిగిన ప్రశ్నకు సమాధానంగా ఆమె మాట్లాడారు.

భారత ఆర్థిక వ్యవస్థ బలమైన పునాదులపై నిలిచిందని, విదేశీ మారక నిల్వలు స్థిరంగా ఉన్నాయని పేర్కొన్నారు. అంతర్జాతీయ వేదికలపై భారత ద్రవ్యలోటు నిర్వహణకు ప్రశంసలు లభిస్తున్నాయన్నారు.

ఫిబ్రవరి 28, 2026న పశ్చిమ ఆసియా వివాదం ప్రారంభమైన తరువాత రూపాయి విలువ 4.1 శాతం తగ్గి, మార్చి 27న డాలర్‌కు రూ.94.82 వద్ద ముగిసిందని వివరించారు. అయితే ఈ తగ్గుదల కేవలం భారత రూపాయికే పరిమితం కాదని, ప్రపంచవ్యాప్తంగా ప్రధాన కరెన్సీలు ప్రభావితమయ్యాయని చెప్పారు.

దక్షిణ కొరియా వాన్ 4.6%, థాయ్ బాట్ 5.5%, ఫిలిప్పీన్స్ పెసో 4.8% వరకు క్షీణించాయని ఉదాహరణలు ఇచ్చారు. ఈ నేపథ్యంలో ఇతర అభివృద్ధి చెందుతున్న దేశాలతో పోలిస్తే రూపాయి స్థిరంగా ఉందని ఆమె అన్నారు.

ఇక ఆర్థిక శాఖ సహాయ మంత్రి పంకజ్ చౌదరి మాట్లాడుతూ రూపాయి మారకపు విలువను మార్కెట్ నిర్ణయిస్తుందని తెలిపారు. అనేక అంతర్జాతీయ, దేశీయ కారకాలు దీనిపై ప్రభావం చూపుతాయని, ప్రభుత్వం మరియు ఆర్‌బీఐ పరిస్థితిని నిరంతరం పర్యవేక్షిస్తున్నాయని చెప్పారు.