తమిళనాడులో నిర్వహించే ఆల్ పార్టీ మీటింగ్ కు హజరవుతాం: అన్నాడీఎంకే

‘‘చెన్నైలో మార్చి 5 న నిర్వహించబోయే సమావేశానికి ఏఐడీఎంకే తరఫున ఇద్దరు ప్రతినిధులు హజరవుతారు’’ అని పళని స్వామి విలేకరులతో అన్నారు. దివంగత నేత మాజీ ముఖ్యమంత్రి జయలలిత 77 వ పుట్టిన రోజు సందర్భంగా రక్తదాన డొనేషన్ క్యాంపును ప్రారంభించిన ఆయన, అనంతరం విలేకరులతో మాట్లాడారు. తమ అభిప్రాయాలను అక్కడ వెలువరిస్తామని అన్నారు.

రాష్ట్రంలో ఉన్న అన్ని పార్టీలతో సమావేశం కావాలని ఎంకే స్టాలిన్ నిర్ణయించుకున్నారు. ఇందుకోసం రాష్ట్రంలో గుర్తింపు పొందిన, రిజిస్టర్ అయిన 45 పార్టీలను ఈ సమావేశాలకు ఆహ్వనం పంపారు.

ఈ సమావేశానికి బీజేపీతో పొత్తు పెట్టుకున్న పీఎంకే సైతం హజరవుతామని ప్రకటించింది. ఇప్పటికే చాలా పార్టీలు లోక్ సభ నియోజకవర్గాల పునర్విభజనకు సంబంధించిన తమ అభిప్రాయాలను వెల్లడించాయి. దీనివల్ల తమిళనాడు సహ ఇతర రాష్ట్రాలలో సీట్లు తగ్గుతాయని, దీనికి మేము అంగీకరించేది లేదని అంటున్నాయి.

‘‘ సీఎం స్టాలిన్ మాట్లాడుతూ.. మార్చి 5న ఆల్ పార్టీ మీటింగ్ నిర్వహించబోతున్నాం. నియోజకవర్గాల డిలిమిటేషన్ గురించి చర్చించబోతున్నాం. కుటుంబ నియంత్రణ విధానాలు పాటించి జనాభాను తగ్గించడం వల్ల ఎనిమిది స్థానాలు కోల్పోతున్నాం.’’ అని ఆందోళన వ్యక్తం చేశారు.