‘అల్ ఫలాహ్’ లో మరోసారి సోదాలు
ఒక మహిళను నియమించుకోవడానికి ప్రణాళిక వేసినట్లు వెల్లడి
By : Praveen Chepyala
Update: 2025-11-30 11:32 GMT
ఢిల్లీ పేలుడులో ముడిపడి ఉన్న వైట్ కాలర్ టెర్రర్ మాడ్యూల్ కేసులో అరెస్ట్ అయిన డాక్టర్ షాహీన్ షాహీద్, ఉగ్రవాద చర్యకు మహిళలను నియమించుకోవాలని ప్లాన్ చేసినట్లు వెల్లడించారని ఫరీదాబాద్ పోలీస్ వర్గాలు తెలిపాయి.
దర్యాప్తుకు సంబంధించి అల్ ఫలాహ్ విశ్వవిద్యాలయంలో మాజీ ఫార్మకాలజిస్ట్ అయిన షాహిద్ ను జాతీయ దర్యాప్తు సంస్థ(ఎన్ఐఏ) గురువారం విశ్వవిద్యాలయం క్యాంపస్ కు తీసుకువచ్చారు.
విచారణ సమయంలోనే తనకు ఓ మహిళా కావాలని ప్లాన్ చేసినట్లు తెలిసింది. విశ్వ విద్యాలయంలోని షాహిద్ హస్టల్ గది నుంచి ఎన్ఐఏ అధికారులు రూ. 18.5 లక్షల నగదుతో పాటు కొన్ని బంగారు బిస్కట్లను, విదేశీ కరెన్సీని కూడా స్వాధీనం చేసుకున్నారు.
ఉత్తరాఖండ్ లో మరో ఇద్దరు అరెస్ట్..
మరో పరిణామంలో, ఢిల్లీలోని ఎర్రకోట సమీపంలో జరిగిన కారు పేలుడుకు సంబంధించి ఇక్కడి బన్భుల్పురా ప్రాంతానికి చెందిన ఒక ఇమామ్, అతని సహచరుడిని ఎన్ఐఏ అరెస్ట్ చేసింది.
ఎర్రకోట వెలుపల జరిగిన పేలుడులో ప్రధాన నిందితుడు డాక్టర్ ఉమర్ నబీకి సంబంధించిన మొబైల్ నంబర్ కాల్ వివరాల ద్వారా ఢిల్లీ పోలీసులకు హల్ధ్వానీ నుంచి ఒక క్లూ అందిందని, దాని ఆధారంగా నిందితులను అరెస్ట్ చేసినట్లు వారు తెలిపారు.
అరెస్ట్ అయిన నిందితులు బిలాలీ మసీద్ ఇమామ్ మహ్మద్ ఆసిఫ్, ఎలక్ట్రీషియన్ నాజర్ కమల్ ను ఢిల్లీ, హల్ద్వానీ పోలీసుల సహాయంతో ఎన్ఐఏ బృందం శుక్రవారం రాత్రి అరెస్ట్ చేసి ఇద్దరిని ఢిల్లీకి తీసుకెళ్లినట్లు వారు తెలిపారు.
జ్యూడీషియల్ కస్టడీ..
ఎర్రకోట పేలుడు కేసులో అరెస్ట్ అయిన ముగ్గురు వైద్యులు, ఒక మత ప్రచారకులను ఢిల్లీ కోర్టు శనివారం పది రోజుల జ్యూడీషియల్ కస్టడీకి పంపింది. నలుగురు నిందితులు ముజమ్మిల్ గనై, అదిల్ రాథర్, షహీనా సయీద్ అలాగే మౌల్వీ ఇర్ఫాన్ అహ్మద్ వాగేలను సెషన్స్ జడ్జీ అంజు బజాబ్ చంద్నా ముందు హజరుపరిచారు.
వారిని పదిరోజుల జ్యూడీషియల్ కస్టడీకి పంపారు. ప్రస్తుతానికి ఈ కేసులో ఎన్ఐఏ ఏడుగురు నిందితులను అరెస్ట్ చేసింది. ఇది జమ్మూకశ్మీర్ పోలీసులు చేధించిన వైట్ కాలర్ టెర్రర్ మాడ్యూల్ తో ముడిపడి ఉంది.
‘‘ఆత్మాహుతి బాంబు దాడికి సంబంధించి వివిధ ఆధారాల కోసం ఏజెన్సీ అన్వేషిస్తూనే ఉంది. ఈ దారుణమైన దాడిలో పాల్గొన్న ఇతరులను గుర్తించి ట్రాక్ చేయడానికి సంబంధిత పోలీసు దళాలతో సమన్వయంతో రాష్ట్రాల అంతటా సోదాలు నిర్వహిస్తోంది’’ అని ఎన్ఐఏ ప్రకటనలో తెలిపింది.