డీకే కుటుంబానికి బిగుస్తున్న ఉచ్చు: పాత కేసులే కొంపముంచాయా?

టీటీడీ మాజీ ఛైర్మన్, చిత్తూరు మాజీ ఎంపీ దివంగత డీకే ఆదికేశవులు నాయుడు కుమారుడు డీఏ శ్రీనివాస్, కుమార్తె డీఏ కల్పజ కేసు ఆంధ్రప్రదేశ్ లో సంచలనం సృష్టించింది. వందల కోట్ల రూపాయలున్న ఈ డీకే కుటుంబంలో ఇలాంటి మనుషులు కూడా ఉన్నారా అని చిత్తూరు జిల్లా వాసులు చర్చించుకుంటున్నారు. రియల్ ఎస్టేట్ వ్యాపారి రఘునాథ్ అనుమానాస్పద మృతి కేసులో సోమవారం రాత్రి వీరిద్దరినీ అదుపులోకి తీసుకున్నారు. వీరితో పాటు కర్ణాటకకు చెందిన డీఎస్పీ మోహన్‌ను కూడా అరెస్ట్ చేసినట్లు అధికారులు వెల్లడించారు. 14 రోజుల రిమాండ్ కి పంపారు.

2019 మే నెలలో బెంగళూరులో వ్యాపారి రఘునాథ్ ఉరివేసుకుని ఆత్మహత్య చేసుకున్నారు. ఆదికేశవులు నాయుడుకు రఘునాథ్ అత్యంత సన్నిహితుడు. అయితే, రఘునాథ్ ది ఆత్మహత్య కాదని, ఆస్తి గొడవల నేపథ్యంలో జరిగిన హత్య అని ఆయన భార్య మంజుల కోర్టును ఆశ్రయించారు. రఘునాథ్ పేరుతో ఉన్న సుమారు రూ. 250 కోట్ల విలువైన ఆస్తులను తమ పేర్లకు బదలాయించాలని శ్రీనివాస్, కల్పజ ఒత్తిడి తెచ్చారని ఆమె ఫిర్యాదులో పేర్కొన్నారు.

మొదట స్థానిక పోలీసులు దీనిని ఆత్మహత్యగా భావించి కేసు మూసివేసే ప్రయత్నం చేయగా, కర్ణాటక హైకోర్టు ఆదేశాలతో సీబీఐ రంగంలోకి దిగింది. తాజాగా ఈ కేసులో సంచలన విషయాలు వెలుగులోకి వచ్చాయి:

నకిలీ వీలునామా: రఘునాథ్ ఆస్తులను దక్కించుకునేందుకు నిందితులు నకిలీ వీలునామాను, తప్పుడు పత్రాలను సృష్టించినట్లు ఫోరెన్సిక్ దర్యాప్తులో తేలింది.

సాక్ష్యాల ధ్వంసం: రఘునాథ్ మరణించిన గెస్ట్‌హౌస్‌లో ఆధారాలను తుడిచిపెట్టడానికి నిందితులు ప్రయత్నించారని, ఇందుకు అప్పటి విచారణాధికారిగా ఉన్న డీఎస్పీ మోహన్ సహకరించారని సీబీఐ పేర్కొంది.

రిమాండ్‌లో నిందితులు:

అరెస్ట్ చేసిన శ్రీనివాస్, కల్పజ , డీఎస్పీ మోహన్‌ను సీబీఐ ప్రత్యేక కోర్టులో హాజరుపరిచారు. కోర్టు వారికి డిసెంబర్ 29 వరకు రిమాండ్ విధించడంతో నిందితులను బెంగళూరులోని పరప్పన అగ్రహార జైలుకు తరలించారు. ఆదికేశవులు నాయుడు కుటుంబ సభ్యులపై ఈ స్థాయి యాక్షన్ తీసుకోవడం ఉమ్మడి చిత్తూరు జిల్లాతో పాటు కర్ణాటకలోనూ పెద్ద చర్చకు దారితీసింది.

బెంగళూరుకు చెందిన ప్రముఖ పత్రికలైన 'ది హిందూ', 'టైమ్స్ ఆఫ్ ఇండియా', 'డెక్కన్ హెరాల్డ్' 'ఇండియన్ ఎక్స్‌ప్రెస్' ఈ కేసు గురించి సంచలన కథనాలను ప్రచురించాయి. ఆ పత్రికలు ప్రధానంగా ప్రస్తావించిన అంశాలు ఇవే:

కేవలం ఆస్తి తగాదాలే కాకుండా, క్రిమినల్ కుట్ర, మోసం, విలువైన పత్రాల ఫోర్జరీ, ప్రభుత్వ స్టాంపులు, సీళ్ల ఫోర్జరీ, సాక్ష్యాల ధ్వంసం వంటి తీవ్రమైన అభియోగాలను సీబీఐ నమోదు చేసినట్లు పత్రికలు పేర్కొన్నాయి.

2019 మే 4న వైట్‌ఫీల్డ్‌లోని గెస్ట్‌హౌస్‌లో రఘునాథ్ ఉరివేసుకుని చనిపోగా, అప్పటి స్థానిక పోలీసులు దర్యాప్తును నీరుగార్చారని పత్రికలు రాశాయి. నిందితులు రఘునాథ్‌ను రెండు రోజుల పాటు అక్రమంగా నిర్బంధించి, హత్య చేసి, ఆపై ఆత్మహత్యగా చిత్రీకరించారని సీబీఐ ఎఫ్‌ఐఆర్‌లో పేర్కొన్నట్లు వెల్లడించాయి.

2016లో ఆదికేశవులు నాయుడు నివాసాలు, కార్యాలయాలపై జరిగిన ఐటీ దాడుల వెనుక రఘునాథ్ ఉన్నారని శ్రీనివాస్, కల్పజ అనుమానించినట్లు 'ఇండియన్ ఎక్స్‌ప్రెస్' కథనం పేర్కొంది. ఆ దాడుల్లో రూ.60 కోట్ల నగదు, రూ.250 కోట్ల విలువైన ఆస్తుల పత్రాలు దొరకడం వీరి మధ్య శత్రుత్వానికి ప్రధాన కారణమని వివరించాయి.

అప్పటి ఇనస్పెక్టర్ మోహన్ (ప్రస్తుత డీఎస్పీ) నిందితులకు అనుకూలంగా వ్యవహరించి, రఘునాథ్ ఆత్మహత్య చేసుకున్నట్లు తప్పుడు 'బి-రిపోర్ట్' కోర్టుకు సమర్పించారని, ఈ కుట్రలో ఆయన పాత్రను సీబీఐ నిర్ధారించినట్లు పత్రికలు హైలైట్ చేశాయి.

రఘునాథ్ ఆస్తులను కాజేయడానికి నిందితులు ఒక నకిలీ వీలునామాను సృష్టించారని, అందుకు అవసరమైన పాత స్టాంపు పేపర్లను ఫోర్జరీ చేశారని ఫోరెన్సిక్ నివేదికల ఆధారంగా సీబీఐ ధృవీకరించినట్లు పత్రికలు రాశాయి.

బెంగళూరులోని సదాశివనగర్ నివాసంలో డీఏ శ్రీనివాస్ డ్రగ్స్ వాడుతున్నారనే పక్కా సమాచారంతో పోలీసులు దాడులు నిర్వహించారు. ఆ సమయంలో ఆయన వద్ద భారీగా గంజాయి, ఇతర నిషేధిత మత్తు పదార్థాలు దొరకడంతో పోలీసులు అరెస్ట్ చేసి జైలుకు తరలించారు.

రఘునాథ్ మరణం తర్వాత కొన్ని కీలక ఆస్తుల పత్రాలు వెలుగులోకి వచ్చాయి. ఆదికేశవులు నాయుడు బతికున్నప్పుడే ఆ ఆస్తులను తమకు రాసిచ్చినట్లు నిందితులు కొన్ని పత్రాలను సృష్టించారు. అయితే, అవి పాత తేదీలతో (Back-dated) సృష్టించిన నకిలీ పత్రాలని, వాటిపై ఉన్న సంతకాలు ఫోర్జరీ చేసినవని ఫోరెన్సిక్ పరీక్షల్లో తేలింది.

ఆదికేశవులు నాయుడు మరణం తర్వాత ఆదాయపు పన్ను శాఖ వీరి నివాసాలు, వైదేహి మెడికల్ కాలేజీపై మెరుపు దాడులు చేసింది. ఆ సమయంలో దాదాపు రూ. 43 కోట్ల నగదును అధికారులు స్వాధీనం చేసుకున్నారు. మెడికల్ సీట్ల కేటాయింపులో అక్రమాలు, పన్ను ఎగవేతకు సంబంధించి ఐటీ శాఖ పలు అభియోగాలు నమోదు చేసింది.

వైదేహి ఇన్‌స్టిట్యూట్ ఆఫ్ మెడికల్ సైన్సెస్ నిర్వహణ విషయంలో కుటుంబ సభ్యుల మధ్య ఆధిపత్య పోరు సాగింది. ట్రస్టు ఆస్తుల అప్పగింత విషయంలో భాగస్వాములతో జరిగిన గొడవలే రఘునాథ్ మరణానికి మూలమని విచారణ సంస్థలు భావిస్తున్నాయి.

ఈ పాత కేసులన్నింటినీ క్రోడీకరిస్తూ సీబీఐ పక్కా ఆధారాలు సేకరించింది. కేసును తప్పుదోవ పట్టించిన పోలీస్ అధికారుల పాత్రను కూడా బయటపెట్టింది.