రేషన్‌ షాపుల ద్వారా గోధుమలు కూడా అందిస్తాం

లబ్ధిదారులు స్మార్ట్‌ కార్డుల ఆధారంగా రేషన్‌ తీసుకోగానే ఆ సమచారం కేంద్ర, జిల్లా కార్యాలయాలకు చేరిపోతుందన్నారు. రేషన్‌ బియ్యం దుర్వినియోగం కాకుండా పకడ్బందీగా అన్ని చర్యలు చేపట్టామని, అందులో భాగంగా ఈ స్మార్ట్‌ రేషన్‌ కార్డులను కూడా తయారు చేసినట్లు చెప్పారు. ఏపీలోని తొమ్మిది జిల్లాల్లో సోమవారం ఇంటింటికి రేషన్‌ కార్డులు పంపిణీ చేస్టున్నట్లు చెప్పారు. సెప్టెంబరు 15 నాటికి రాష్ట్రంలోని 1.46 కోట్ల కుటుంబాలకు ఈ స్మార్ట్‌ రేషన్‌ కార్డులను అందిస్తామన్నారు. చిరునామాలు మార్చిన వారికి, కొత్త కార్డుల కోసం దరఖాస్తులు చేసుకున్న వారికి కూడా ఈ కార్డులను పంపిణీ చేస్తామన్నారు.

అంతేకాకుండా రేషన్‌ డీలర్ల వద్ద ఉన్న ఈ–పోస్‌ యంత్రాలను కూడా ఆధునీకరిస్తున్నట్లు తెలిపారు. ప్రస్తుతానికి ఏపీలో మొత్తం 29,797 రేషన్‌ షాపులు ఉన్నాయని, అయితే ప్రజల అవసరాలను దృష్టిలో ఉంచుకుని ఈ దుకాణాల సంఖ్య పెంచాలని ప్రభుత్వం నిర్ణయం తీసుకుందన్నారు. అంతేకాకుండా అవసరమైన చోట సబ్‌ డిపోలను కూడా ఏర్పాటు చేసేందుకు చర్యలు తీసుకుంటామని, ఆ మేరకు ప్రణాళికలు కూడా రూపొందిస్తున్నట్లు మంత్రి నాదెండ్ల మనోహర్‌ వెల్లడించారు.