రోగిగా ఐఏఎస్, వృద్ధుడిగా సూపరింటెండెంట్..జీజీహెచ్‌లో దడ!

ఆంధ్రప్రదేశ్ లోని గుంటూరు గవర్నమెంట్ జనరల్ ఆసుపత్రి(జీజీహెచ్) మరో సారి వార్తల్లో నిలచింది. అధికారులు మారు వేషాల్లో ఆకస్మిక తనిఖీలు చేపడుతుంటంతో చర్చనీయాంశంగా మారింది. జీజీహెచ్ గుంటూరులో మౌలిక సదుపాయాలు. రోగులకు అందుతున్న సేవలు, సిబ్బంది వ్యవహరిస్తున్న తీరు, వైద్యులు, సిబ్బంది అందుబాటులో ఉంటున్నారా లేక విధులకు డుమ్మా కొడుతున్నారా వంటి అనేక అంశాలు మరో సారి తెరపైకొచ్చాయి. వైద్యులతో పాటు ఇతర సిబ్బంది రోగులకు అందుబాటులో ఉండటం లేదని, వైద్య సేవలు సక్రమంగా అందడం లేదని, ప్రత్యేకించి రాత్రి సమయాల్లో వైద్యులు, సిబ్బంది అందుబాటులో ఉండటం లేదని, దీని వల్ల రోగులు ఇబ్బందులు పడుతున్నారనే విమర్శలు పెద్ద ఎత్తున రావడంతో వాటిని సరిదిద్దాలనే ఉద్దేశంతో తనిఖీలు నిర్వహించాలని నిర్ణయించుకున్నారు. 

 అందులో భాగంగా జీజీహెచ్ సూపరింటెండెంట్ డాక్టర్ ఎస్.ఎస్.వి. రమణ మంగళవారం రాత్రి 10 గంటల సమయంలో ఇద్దరు సహాయకులను వెంటపెట్టుకుని, ఓ వృద్ధుడి వేషంలో ఆసుపత్రికి చేరుకున్నారు. సాధారణ రోగిలా వైద్య సేవలు కోరుతూ వైద్యులు, సహాయకురాలులను అభ్యర్థించారు. సుమారు ఒక గంటకు పైగా ఆసుపత్రి మొత్తం తిరిగి, ఆపరేషన్ థియేటర్, ఐసీయూ, ఔట్‌పేషెంట్ విభాగాల్లో తనిఖీలు చేశారు. ఈ పరిశీలనలో వైద్యుల అందుబాటు, మందుల సరఫరా, రోగుల వివరాలు నమోదు, ఆసుపత్రి సేవల పట్ల రోగులు, వారితో వచ్చిన వారు ఏమని సంభాషించుకుంటున్నారనే అంశాలను పరిశీలించారు. 

 రాష్ట్ర వైద్య ఆరోగ్య శాఖ ముఖ్య కార్యదర్శి సౌరభ్ గౌర్ కూడా మారు వేషంలో తనిఖీలు నిర్వహించారు. శనివారం రోగి వేషంలో జీజీహెచ్‌కు చేరుకుని  ఆకస్మిక తనిఖీ చేశారు. జ్వరం వచ్చిందంటూ సాధారణ రోగిగా ప్రవేశించి, ఆసుపత్రి సౌకర్యాలు, వైద్యుల స్పందనను పరిశీలించారు. వైద్య ఆరోగ్య శాఖ ముఖ్య కార్యదర్శి సౌరభ్ గౌర్ మారు వేషంలో తనఖీలు చేస్తున్నారనే సమచారం గంట తర్వాత జీజీహెచ్ సూపరింటెండెంట్ డాక్టర్ ఎస్.ఎస్.వి. రమణకు తెలియడంతో పరుగు పరుగున ఆయన వద్దకు చేరుకుని నమస్కారం చేశారు. దీంతో సిబ్బంది అంతా ఒక్క సారిగా అలెర్ట్ అయ్యారు. అనంతరం ఆయనను వెంటబెట్టకుని ఈ తనిఖీలో రోగులకు వైద్య సేవలు సమయానుకూలంగా అందుతున్నాయా, మందులు, పరీక్షలు సరిగ్గా జరుగుతున్నాయా అనే అంశాలు సౌరబ్ గౌర్ పరిశీలించారు.