రెండో దశలో ల్యాండ్ పూలింగ్ కు ఏడు గ్రామాల రైతుల భూమి

ఈ దశలో ఏడు గ్రామాల నుంచి భూమి సేకరణ జరుగనుంది. వైకుంఠపురం, పెదమద్దూరు, ఎండ్రాయి, కర్లపూడి గ్రామాల్లో 7,562 ఎకరాలు, వడ్డమాను, హరిశ్చంద్రపురం, పెదపరిమి గ్రామాల్లో 9,104.57 ఎకరాలు సేకరిస్తారు. ఇందులో భాగంగానే ప్రభుత్వానికే చెందిన 3,828 ఎకరాల (ఎక్కువగా కొండ ప్రాంతాలు) కూడా ఈ అభివృద్ధి ప్రణాళికలో భాగమవుతాయి.

ఈ భూములతో ఏమి నిర్మిస్తారు?

500 ఎకరాల్లో అంతర్జాతీయ గ్రీన్‌ఫీల్డ్ విమానాశ్రయం, ఇన్నర్ రింగ్ రోడ్, రైల్వే లైన్, రైల్వే స్టేషన్, 2,500 ఎకరాల విస్తీర్ణంలో అంతర్జాతీయ స్పోర్ట్స్ సిటీ (గతంలో కేవలం 70 ఎకరాలు మాత్రమే కేటాయించగా, ఒలింపిక్ స్థాయి క్రీడలు నిర్వహించేలా సీఎం చంద్రబాబు విస్తరణకు ఆదేశించారు), స్మార్ట్ ఇండస్ట్రియల్ కారిడార్లు, ఇతర మౌలిక సదుపాయాలు ఉంటాయి.

అమరావతి భూమి విలువ పెరగాలన్నా, ఆర్థిక వృద్ధి రేటు ఎగిసిపడాలన్నా... అంతర్జాతీయ విమానాశ్రయం, హైటెక్ పరిశ్రమలు తప్పనిసరని ప్రభుత్వం గట్టిగా నమ్ముతోంది.

గతంలో మాదిరిగానే రైతులకు హామీలు

జరీబు భూమికి 1,000 చదరపు గజాల నివాస ప్లాట్ + 450 చదరపు గజాల వాణిజ్య ప్లాట్, మెట్ట భూమికి 1,000 చదరపు గజాల నివాస ప్లాట్ +250 చదరపు గజాల వాణిజ్య ప్లాట్, ఏటా కౌలు చెల్లింపు కొనసాగింపు, ఈ ఏడు గ్రామాల్లో ఇప్పటికే జరిగిన గ్రామ సభల తీర్మానాల ఆధారంగానే ఈ నిర్ణయం జరుగుతుంది.

పాత సమస్యలు... కొత్త గడువు

మొదటి దశలో భూములిచ్చిన రైతుల్లో కొందరికి ఇంకా రిటర్నబుల్ ప్లాట్ల రిజిస్ట్రేషన్ పూర్తి కాలేదు. జరీబు, నాన్ జరీబు, గ్రామ కంఠం, రోడ్డు శూలాల వల్ల ఆలస్యమైంది. ఈ అన్ని సమస్యలనూ ఒక నెల్లోగా పరిష్కరిస్తామని, పొరపాటున ఎక్కువ భూమి ఇచ్చిన చోట వెనక్కి తీసుకుంటామని కేబినెట్ స్పష్టం చేసింది. అసైన్డ్ రైతుల ఇబ్బందులను మంత్రివర్గ ఉపసంఘం పరిశీలిస్తోంది.

అమరావతి కేవలం రాజధాని నగరం కాకుండా, దక్షిణ భారతదేశంలోనే అతిపెద్ద ఆర్థిక కేంద్రంగా ఎదగాలన్న లక్ష్యంతో ఈ విస్తరణ జరుగుతోందని పాలకులు చెబుతున్నారు. 2014–19 మధ్య ప్రారంభమై ఐదేళ్లు స్తంభించిన అమరావతి ప్రాజెక్టు ఇప్పుడు మళ్లీ పనులు మొదలు పెట్టి వేగంగా నిర్మాణాలు చేపట్టింది. రైతుల సహకారం, స్పష్టమైన ప్రణాళిక, ఖచ్చితమైన హామీలతో ఈసారి అడుగులు ప్రభుత్వం వేస్తుందా? రైతుల సమస్యలు వెంటనే పరిష్కరిస్తుందా? సమస్యలు సమస్యల దారిలో ఉంటాయి, తమ పని తమది అంటుందా? వేచి చూడాల్సిందే.