భారీ పెట్టుబడులు..చంద్రబాబు కళ్లల్లో ఆనందం

శ్రీసిటీలో 5 కొత్త యూనిట్ల ప్రారంభం, 12 ప్రాజెక్టులకు ఒప్పందాలు

సదస్సు సందర్భంగా ముఖ్యమంత్రి చంద్రబాబు నాయుడు వర్చువల్‌గా శ్రీసిటీలో 5 కొత్త పారిశ్రామిక యూనిట్లను ప్రారంభించారు. తిరుపతి జిల్లాలోని ఈ మల్టీ ప్రొడక్ట్ స్పెషల్ ఎకనామిక్ జోన్ (ఎస్‌ఈజె)లో ఇంజనీరింగ్, ఫుడ్ ప్రాసెసింగ్, ఫార్మా రంగాల్లో రూ.2,320 కోట్ల పెట్టుబడితో 12 కొత్త ప్రాజెక్టులకు వివిధ కంపెనీలతో ఒప్పందాలు (ఎమ్ఓయూలు) చేసుకున్నారు. ఈ ప్రాజెక్టుల ద్వారా 12,365 మందికి ఉద్యోగాలు లభించనున్నాయని చంద్రబాబు తెలిపారు. శ్రీసిటీని ప్రపంచ స్థాయి పారిశ్రామిక టౌన్‌షిప్‌గా మార్చాలని ఆయన సూచించారు. ఇక్కడ డైకిన్, ఇసుజు, క్యాడ్బరీ వంటి కంపెనీలు ప్రపంచ మార్కెట్‌కు ఉత్పత్తులు సరఫరా చేస్తున్నాయని, వివిధ దేశాల పరిశ్రమలు ఇక్కడికి వచ్చేలా ప్రోత్సహిస్తామని చెప్పారు. రాష్ట్రంలో మొదటిసారిగా 'ఎస్క్రో అకౌంట్లు' ఏర్పాటు చేస్తూ పారిశ్రామిక ఇన్సెంటివ్స్ అందిస్తామని కూడా ప్రకటించారు.

శ్రీసిటీ అభివృద్ధి మోడల్: 1.5 లక్షల ఉద్యోగాలు, 6 వేల ఎకరాల భూమి

ఒక ప్రణాళికతో శ్రీసిటీని ఏర్పాటు చేశాం. అభివృద్ధికి ఇది చక్కటి ఉదాహరణగా నిలిచింది అని చంద్రబాబు నాయుడు పేర్కొన్నారు. త్వరలోనే 6 వేల ఎకరాల భూమిని అందుబాటులోకి తెస్తామని, 50 దేశాలకు చెందిన కంపెనీలు ఇక్కడి నుంచే పనిచేస్తాయని ఆయన చెప్పారు. 2028 నాటికి శ్రీసిటీని ఉత్తమ పారిశ్రామిక ప్రాజెక్టుగా మార్చి, 1.5 లక్షల ఉద్యోగాలు కల్పిస్తామని ప్రకటించారు. బెల్జియం, జపాన్, యుకె, జర్మనీ, ఆస్ట్రేలియా వంటి దేశాల నుంచి హెల్త్‌కేర్, ఇంజనీరింగ్, ఎలక్ట్రానిక్స్, ఆటోమొబైల్, మెడికల్ డివైసెస్ రంగాల్లో రూ.8.8 లక్షల కోట్ల పెట్టుబడులు ఆమోదించామని తెలిపారు. పెట్టుబడులు, ఉద్యోగాల కల్పనకు భారీ ప్రణాళికలు వేస్తున్నామని, ఆంధ్రప్రదేశ్‌ను గ్లోబల్ ఇండస్ట్రియల్ హబ్‌గా మార్చుకుంటామని చంద్రబాబు స్పష్టం చేశారు.