TDPలో ముఠా కుమ్ములాటలపై చంద్రబాబు ఫైర్

పనితీరుపై కొలమానం ఎందుకు?

అధికార ప్రవేశం తర్వాత మొదటి ఏటా (జూన్ 2024 నుంచి) చంద్రబాబు నాయుడు ఎమ్మెల్యేల పనితీరును పరిశీలించడానికి ప్రతి నెలా సర్వేలు నిర్వహిస్తున్నారు. RISE సర్వే ప్రకారం 32 మంది ఎమ్మెల్యేలు 'సురక్షిత గ్రీన్ జోన్'లో ఉంటే, 90 మంది 'ఆరెంజ్ జోన్'లో, 53 మంది 'రెడ్ జోన్'లో ఉన్నారు. KK సర్వేలో 15 మంది ఎమ్మెల్యేలకు ప్రజల నుంచి ప్రతికూల ఫీడ్‌బ్యాక్ వచ్చింది. S9 సర్వేలో కూడా మొదటి సారి ఎమ్మెల్యేలు, అనుభవం లేని వారి పనితీరు మీద అసంతృప్తి వ్యక్తమైంది. ఈ సర్వేలు ప్రజలు, పార్టీ కార్యకర్తల నుంచి సమాచారాన్ని సేకరించి, ఎమ్మెల్యేలకు 'ప్రోగ్రెస్ కార్డులు' ఇచ్చి, మెరుగు పరచాలని సూచనలు చేస్తున్నాయి.

ఈ సర్వేలు ఎందుకు?

చంద్రబాబు నాయుడు చెప్పిన ప్రకారం TDP కి 12 లక్షల కుటుంబ సాధికార సారథులు, 46 వేల మంది బూత్ స్థాయి నాయకులు, 8 వేల మంది యూనిట్ ఇన్‌చార్జ్‌లు ఉన్నారు. ఈ వ్యవస్థ ద్వారా ఎమ్మెల్యేల నుంచి అధిష్టానానికి రియల్‌టైమ్ సమాచారం వస్తోంది. "పనితీరు మెరుగు పరచకపోతే 2029లో టికెట్ కు గుడ్‌బై" అని జూలై 26న జరిగిన సమావేశాల్లో స్పష్టం చేశారు. ఇది పార్టీని డిసిప్లిన్‌తో నడిపించాలనే, ప్రజల అసంతృప్తిని ముందుగానే గుర్తించాలనే వ్యూహాత్మక చర్య. కానీ విమర్శకులు ఇది 'భయపెట్టి నియంత్రణ' అని, ఎమ్మెల్యేల మధ్య భయాందోళనలు పెంచుతోందని వాదిస్తున్నారు.

48 మంది ఎమ్మెల్యేలకు నోటీసులు

అధికారంలోకి వచ్చినప్పటి నుంచి పార్టీ సమావేశాల్లో ఎమ్మెల్యేల తీరుపై తప్పుపడుతున్నారు. సుమారు 30 మంది ఎమ్మెల్యేలను ఇంటికి పిలిపించి, వ్యక్తిగతంగా మాట్లాడి హెచ్చరించారు. ఇసుక, లిక్కర్ అవినీతి, ఫ్యాక్షన్‌లు, నియోజకవర్గంలో లేకపోవడం వంటి ఆరోపణలు ఈ హెచ్చరికలకు కారణం. జూన్ 8న "పనితీరు సమీక్ష చేస్తూ ఒక్కొక్కరితో వన్-టు-వన్ సమావేశాలు జరుపుతాను" అని ప్రకటించారు. జూలైలో 21 మంది ఎమ్మెల్యేలతో 45 నిమిషాల చర్చలు జరిపారు. అయినా ఆదివారం జరిగిన పార్టీ సమావేశంలో మళ్లీ పలువురిని తప్పుపట్టారు.

పెన్షన్ల పంపిణీ కార్యక్రమంలో 17 నెలలుగా పాల్గొన్నానని, అనేక మంది ఎమ్మెల్యేలు పింఛన్ల పంపిణీనే కాకుండా ఇతర పార్టీ కార్యక్రమాల్లో పాల్గొనకపోవడాన్ని తీవ్రంగా పరిగణిస్తున్నారు. ఇటీవల 48 మంది ఎమ్మెల్యేలకు నోటీసులు జారీ చేసి, వెల్ఫేర్ కార్యక్రమాల్లో హాజరు కాకపోవడంపై హెచ్చరించారు. YSRCP నుంచి వచ్చిన ఒత్తిడి కూడా ఈ చర్యలకు ఒక కారణంగా చెబుతున్నారు. కానీ ఈ హెచ్చరికలు 'హెచ్చరికలపై హెచ్చరికలు'గానే మిగిలిపోతున్నాయా? TDP అంతర్గత వర్గాల్లో "ఇది పార్టీ ఐక్యతకు ఆటంకం కావచ్చు" అనే చర్చ జరుగుతోంది.

ఎమ్మెల్యేల వత్తిడికి మంత్రివర్గ ఉపసంఘం 'తల ఊపింది'?

జిల్లాల పునర్విభజన సందర్భంగా మంత్రివర్గ ఉపసంఘం కొందరు ఎమ్మెల్యేల వత్తిడికి లొంగినట్టు పరోక్ష వ్యాఖ్యలు సీఎం చేశారు. మూడు సార్లు చర్చలు జరిపి ఫైనల్ చేశారు కానీ పెనమలూరు, గన్నవరం, నూజివీడు నియోజకవర్గాలు జిల్లా కేంద్రాలకు దూరంగా ఉన్నప్పటికీ దీని గురించి ఆలోచించకపోవడాన్ని తప్పుపట్టారు. ఇది పార్టీలో అసంతృప్తిని మరింత పెంచింది. విమర్శకులు ఇది "స్థానిక నాయకుల ప్రభావం" కారణంగా జరిగిందని, ముఖ్యమంత్రి దీన్ని సరిదిద్దుకోవడం ద్వారా పార్టీ డైనమిక్స్‌ను మార్చాలని సూచిస్తున్నారు.

ఓటమి నియోజకవర్గాల్లో TDP ఇన్‌చార్జ్‌లపై అసంతృప్తి

11 నియోజకవర్గాల్లో ఓటమి చెందిన TDP అభ్యర్థులు ప్రస్తుతం ఇన్‌చార్జ్‌లుగా ఉన్నారు. అక్కడ YSRCP ఎమ్మెల్యేలు పేరుకు మాత్రమే ఉన్నప్పటికీ, TDP ఇన్‌చార్జ్‌ల పనితీరుపై అసంతృప్తి వ్యక్తం చేస్తున్నారు. "పార్టీ బలపడటం లేదు, స్థానికంగా పెత్తనం పెరుగుతోంది" అని ముఖ్యమంత్రి అసంతృప్తితో అన్నారు. ఇది పార్టీ విస్తరణ వ్యూహానికి ఆటంకంగా మారుతోంది. సర్వేలు ఇక్కడ కూడా ప్రజల అభిప్రాయాలను సేకరించి, మార్గదర్శకాలు ఇవ్వాలని సూచిస్తున్నాయి.

బలోపేతమా, భయపెట్టడమా?

చంద్రబాబు నాయుడు చర్యలు TDP ని 2029లో జరిగే ఎన్నికలకు సిద్ధం చేయడానికి దోహదపడతాయా? సానుకూలంగా చూస్తే ఇవి పార్టీ డిసిప్లిన్‌ను పెంచుతాయి. ప్రజల అసంతృప్తిని ముందుగానే గుర్తించి సరిదిద్దుతాయి. పెన్షన్లు, 'తల్లికి వందనం' వంటి వెల్ఫేర్ స్కీమ్‌లు సక్సెస్‌ఫుల్‌గా అమలవుతున్నప్పటికీ, ఎమ్మెల్యేలు ప్రజలకు సమాచారం అందించకపోవడం పార్టీ ఇమేజ్‌కు దెబ్బ తీస్తోంది. సర్వేలు రియల్‌టైమ్ ఫీడ్‌బ్యాక్ ఇవ్వడం వల్ల మెరుగుదల అవకాశం ఉంది.

ఈ హెచ్చరికలు TDPలో అంతర్గత ఉద్రిక్తతలను పెంచుతున్నాయి. 48 మందికి నోటీసులు (ఇందులో మంత్రలు కూడా ఉన్నారు), 30 మందితో ఇంటి సమావేశాలు... ఇవి 'భయపూరిత' వాతావరణాన్ని సృష్టిస్తున్నాయి. అవినీతి ఆరోపణలు నిజమైతే చట్టపరమైన చర్యలు తీసుకోవాలి. కానీ పార్టీలోనే ముగిస్తుంటే అది 'కవరప్'గా కనిపిస్తుంది. జిల్లా పునర్విభజనలో ఎమ్మెల్యేల ప్రభావం పార్టీ విధానాలకు ఆటంకం కాకుండా చూడాలి. YSRCP ఒత్తిడి కూడా ఈ చర్యలను గుర్తు చేస్తోంది. కానీ దీర్ఘకాలంలో TDP ఐక్యతకు దెబ్బ తగులుతుందనే చర్చ టీడీపీ వర్గాల్లో ఉంది.

TDP అంతర్గత వర్గాల్లో "ఎందుకు ఇలా జరుగుతోంది?" అనే చర్చ జోరుగా ఉంది. చంద్రబాబు నాయుడు ఈ సమస్యలను సమగ్రంగా పరిష్కరించకపోతే, పార్టీ బలోపేతం కంటే బలహీనతలు మరింత పెరిగే ప్రమాదం ఉంది. రాష్ట్ర ప్రజలు వెల్ఫేర్ స్కీమ్‌లతో సంతోషిస్తున్నప్పటికీ, ఎమ్మెల్యేల పనితీరు మెరుగుపడకపోతే 2029లో ఎలాంటి పరిణామాలు రావచ్చో ఎవరూ ఊహించలేరు.