ఉండవల్లి నుంచి కుప్పం పనులకు శంకుస్థాపన

త్వరలో కుప్పంలో రూ.6,300 కోట్ల పెట్టుబడితో మరో 8 కంపెనీలు వస్తున్నట్లు చంద్రబాబు ప్రకటించారు. పరిశ్రమలకు అవసరమైన విద్యుత్‌ను పూర్తిగా స్థానికంగానే ఉత్పత్తి చేస్తామని, సౌరవిద్యుత్‌ను ఇతర ప్రాంతాలకు సరఫరా చేస్తామని హామీ ఇచ్చారు. కుప్పంలో డెయిరీ, పౌల్ట్రీ రంగాలను విస్తరింపచేయాలని, గతంలో మైక్రో ఇరిగేషన్ ప్రారంభించినట్లు గుర్తుచేశారు. రైతుల పిల్లలు ఐటీ రంగంలోకి వెళ్లి, కొందరు పారిశ్రామికవేత్తలుగా మారారని, విదేశాల్లో ఉన్న భారతీయుల్లో 35 శాతం తెలుగువారేనని గర్వంగా పేర్కొన్నారు.

ప్రతి ఇంటి నుంచి ఒక పారిశ్రామికవేత్త రావాలని, కుప్పంను ఎడ్యుకేషనల్ హబ్‌గా మారుస్తామని సీఎం హామీ ఇచ్చారు. ఇప్పటికే యూనివర్సిటీ, మెడికల్, ఇంజినీరింగ్, పాలిటెక్నిక్ కాలేజీలు ఉన్నాయని, ప్రైవేటు రెసిడెన్షియల్ పాఠశాలలను ప్రోత్సహిస్తామని తెలిపారు. నాణ్యమైన పండ్లను విదేశాలకు ఎగుమతి చేస్తామని, ఏఐ సాయంతో ఇంటి వద్దే చికిత్స అందేలా చర్యలు తీసుకుంటామని వెల్లడించారు. నిర్దేశిత సమయంలో పరిశ్రమలు ప్రారంభించాలని సంస్థలకు సీఎం చంద్రబాబు  సూచించారు.