ఆటల చదువు... వినూత్న బోధన

“చదువు అంటే భారం కాదు... ఆటలో భాగమే” అన్న సూత్రాన్ని ఆచరణలో చూపుతూ, ఆమె అమలు చేస్తున్న ‘Learning made easy with Activities’ విధానం ద్వారా పిల్లలు ఒత్తిడి లేకుండా, ఆట పాటలతోనే అక్షరాస్యత, సంఖ్యాజ్ఞానం నేర్చుకుంటున్నారు. No Bag Day కార్యక్రమాలు, Word Building ఆటలు, ఫౌండేషనల్ లిటరసీ అండ్ న్యూమరసీ (FLN) ఆధారిత బోధన, ప్రాజెక్ట్ వర్క్, గేమ్ బేస్డ్ లెర్నింగ్ వంటి కార్యక్రమాలతో పాఠశాల వాతావరణమే మారిపోయింది.

ఈ అద్భుతమైన కృషిని గుర్తించిన ఆంధ్రప్రదేశ్ విద్యాశాఖ మంత్రి నారా లోకేష్ 2025 నవంబరు 29న సామాజిక మాధ్యమాల ద్వారా అలివేలి మంగ ను ప్రత్యేకంగా అభినందించారు.

మంత్రి తన అధికారిక ట్విట్టర్ (X) ఖాతాలో ఇలా రాశారు

“విశాఖ జిల్లా పెందుర్తి మండలం పినగాడి యూపీ స్కూల్ టీచర్ పల్టాసింగి అలివేలి మంగ గారు పిల్లలకు ఆటపాటలతో విద్యాబోధన చేస్తూ, FLN ఆధారిత బోధన, వర్డ్ బిల్డింగ్, నో బ్యాగ్ డే యాక్టివిటీస్ వంటి వినూత్న పద్ధతులతో చదువుపై ఆసక్తి పెంచుతున్న విధానం అద్భుతం. ఈ టీచర్ గారి కృషి రాష్ట్రంలోని అందరు ఉపాధ్యాయులకు ఆదర్శం. అభినందనలు.”

ఈ ప్రశంసతో పాటు మంత్రి గారు టీచర్ తయారుచేసిన వీడియోలను కూడా రీట్వీట్ చేస్తూ, రాష్ట్రంలోని అన్ని పాఠశాలల్లోనూ ఇటువంటి వినూత్న బోధనా పద్ధతులను అమలు చేయాలని సూచించారు.

పల్టాసింగి అలివేలి మంగ తమ ఫేస్‌బుక్, యూట్యూబ్ ఛానెల్స్ ద్వారా ప్రతి రోజూ తమ తరగతి గది కార్యక్రమాల వీడియోలు పోస్ట్ చేస్తూ, వేలాది మంది ఉపాధ్యాయులకు, తల్లిదండ్రులకు స్ఫూర్తినిస్తున్నారు. గ్రామీణ ప్రాంతంలో సామాన్య సౌకర్యాలతోనే ఈ స్థాయి వినూత్న బోధన సాధ్యమని నిరూపించారు.

పినగాడి పాఠశాలలో చదువుతున్న విద్యార్థుల తల్లిదండ్రులు ఒకరు ఇలా అన్నారు. “మా పిల్లలు ఇంటికి వచ్చి రోజూ పాఠశాలలో ఏం నేర్చుకున్నారో ఆటలతో చూపిస్తారు. ఇంతకు ముందు చదువు అంటే భయం, ఇప్పుడు ఆటలా మారింది. టీచరమ్మకు కృతజ్ఞతలు.”

రాష్ట్ర విద్యాశాఖ ఉన్నతాధికారులు కూడా ఈ పాఠశాలను రాష్ట్రస్థాయి మోడల్ స్కూల్‌గా గుర్తించే అవకాశం ఉన్నట్లు తెలుస్తోంది.

ఒక సామాన్య గ్రామీణ టీచర్... అసాధారణమైన అంకితభావం... ఆటల ద్వారా చదువును ఆకర్షణీయం చేసిన పల్టాసింగి అలివేలి మంగ నిజంగా ఈ తరం పిల్లలకు మాత్రమే కాక... రాష్ట్రంలోని ప్రతి ఉపాధ్యాయుడికీ ఆదర్శంగా నిలుస్తారు. మంత్రి గారి ప్రశంసతో పాటు రాష్ట్ర ప్రజలందరూ ఈ టీచర్ గారికి అభినందనలు తెలియజేస్తున్నారు.