సీఎం సార్, అవినీతి ఆగిందెక్కడ? ఏసీబీకి దొరికిన డోన్ తహసీల్దార్

రైతు సమస్యల్ని ఎప్పటికప్పుడు పరిష్కరిస్తామని ముఖ్యమంత్రి చంద్రబాబు చెబుతుంటే అధికారులు మాత్రం చేతులు తడపనిదే ఫైలు కదలదని తెగేసి చెబుతున్నారు. ఇందుకు తాజా ఉదాహరణే నంద్యాల జిల్లా డోన్ తహసీల్దార్ ఉదంతం. ఓ రైతు తన భూసమస్యను పరిష్కరించమంటూ ఆ అధికారి చుట్టూ తిరుగుతుంటే లంచం ఇస్తే తప్ప ఫైలు కదపలేనని చెప్పారు. దీంతో ఆగ్రహించిన ఆ రైతు ఏసీబీ అధికారులను ఆశ్రయించి ఆ అధికారిని పట్టించారు. ఈ సమస్య పరిష్కారానికి రూ.35వేలు లంచం డిమాండ్ చేసినట్లు సమాచారం.

డోన్ తహసీల్దార్ కార్యాలయంలో పనిచేస్తున్న డిప్యూటీ తహశీల్దార్ (Deputy Tahsildar) సునీల్ రాజును ఏసీబీ అధికారులు పట్టుకున్నారు. ఓ రైతు భూసమస్య పరిష్కారానికి రూ.35వేలు లంచం డిమాండ్ చేసి ఏసీబీకి దొరికిపోయారు.

రైతు ఫిర్యాదు మేరకు ఏసీబీ అధికారులు మంగళవారం ఓ ప్లాన్ ప్రకారం ముందస్తు ఏర్పాట్లతో డోన్‌కు చేరుకున్నారు. డిప్యూటీ తహశీల్దార్ సునీల్ రాజు (Sunil Raju) లంచం తీసుకుంటున్న క్షణంలోనే రెడ్‌హ్యాండెడ్‌గా పట్టుకున్నారు. సునీల్ రాజు వద్ద నుండి డబ్బును స్వాధీనం చేసుకున్నారు. తహసీల్దార్ కార్యాలయంలో విస్తృత సోదాలు నిర్వహించారు. ఈ ఘటనతో కార్యాలయం సిబ్బంది ఉలిక్కిపడింది. ఇంతమారుమూల ప్రాంతానికి ఏసీబీ అధికారులు రారనే ధీమాతో రెవెన్యూ అధికారులు ఇష్టానుసారం వ్యవహరిస్తున్నారు.

దీనిపై అధికారులు పంచనామా నిర్వహించారు. డీఎస్పీ సోమన్న (DSP Somanna) ఆధ్వర్యంలో ఈ కార్యక్రమం చేపట్టారు. డిప్యూటీ తహసీల్దార్ ను విచారణ నిమిత్తం ఏసీబీ కార్యాలయానికి తరలించారు. జిల్లాలో అవినీతి అధికారుల భరతం పట్టేందుకు ఏసీబీ అధికారులు చర్యలు చేపట్టడం ప్రజల్లో చర్చనీయాంశంగా మారింది. అవినీతి అధికారులపై కఠిన చర్యలు తీసుకోవాలని స్థానికులు కోరుతున్నారు.