ఏపీ ఇంటర్ పరీక్షల షెడ్యూల్‌లో మార్పులు

బోర్డు వివరాల ప్రకారం మార్చి 3న (హోలీ) జరగాల్సిన ద్వితీయ సంవత్సరం మ్యాథమెటిక్స్ పేపర్-2ఏ, సివిక్స్ పేపర్-2 పరీక్షలను మార్చి 4వ తేదీకి రీషెడ్యూల్ చేశారు. అలాగే మార్చి 20న (రంజాన్) నిర్వహించాల్సిన ప్రథమ సంవత్సరం పబ్లిక్ అడ్మినిస్ట్రేషన్ పేపర్-1, లాజిక్ పేపర్-1 పరీక్షలను మార్చి 21కి మార్చారు.

మిగతా పరీక్షలన్నీ యథాతథంగా జరుగుతాయని బోర్డు అధికారులు స్పష్టం చేశారు. పరీక్షల సమయం, సిలబస్, పేపర్ ప్యాటర్న్‌లో ఎలాంటి మార్పులు లేవు.

గతంలో అక్టోబర్‌లో విడుదల చేసిన తాత్కాలిక షెడ్యూల్ ప్రకారం ప్రథమ సంవత్సరం పరీక్షలు ఫిబ్రవరి 23 నుంచి మార్చి 24 వరకు, ద్వితీయ సంవత్సరం పరీక్షలు ఫిబ్రవరి 24 నుంచి మార్చి 23 వరకు ఉదయం 9 గంటల నుంచి మధ్యాహ్నం 12 గంటల వరకు నిర్వహించనున్నారు. ప్రభుత్వం ప్రకటించిన 2026 సెలవుల జాబితాకు అనుగుణంగా ఈ సవరణలు చేపట్టినట్లు బోర్డు తెలిపింది.

ప్రాక్టికల్ పరీక్షలు జనరల్ కోర్సులకు ఫిబ్రవరి 1 నుంచి 10 వరకు, వొకేషనల్ కోర్సులకు జనవరి 27 నుంచి ఫిబ్రవరి 10 వరకు జరుగనున్నాయి. ఎథిక్స్ అండ్ హ్యూమన్ వాల్యూస్ పరీక్ష జనవరి 21న, ఎన్విరాన్‌మెంటల్ ఎడ్యుకేషన్ పరీక్ష జనవరి 23న నిర్వహించనున్నారు.

విద్యార్థులు సవరించిన పూర్తి టైం టేబుల్‌ను అధికారిక వెబ్‌సైట్ bie.ap.gov.in నుంచి డౌన్‌లోడ్ చేసుకోవచ్చు. ఈ మార్పులు విద్యార్థుల సౌకర్యాన్ని దృష్టిలో ఉంచుకుని చేసినవని బోర్డు అధికారులు పేర్కొన్నారు.