’చంద్రబాబుకు పాపభీతి లేదు‘

జగన్ కలలు కన్న మెడికల్ హబ్

పేద, మధ్యతరగతి ప్రజలకు మెరుగైన వైద్యం ఉచితంగా అందాలనే ఉద్దేశంతో వైఎస్ జగన్ మోహన్ రెడ్డి ఎంతో కష్టపడి రాష్ట్రానికి 17 మెడికల్ కాలేజీలను తీసుకువచ్చారని సజ్జల గుర్తు చేశారు. ఆంధ్రప్రదేశ్‌ను దేశంలోనే అత్యుత్తమ మెడికల్ హబ్ గా మార్చాలని ఆయన అడుగులు వేశారని, కానీ చంద్రబాబు అధికారంలోకి రాగానే ఆ పనులను నిలిపివేసి ప్రైవేటీకరణకు తెరలేపారని మండిపడ్డారు.

పీపీపీ విధానంపై మండిపాటు

దాదాపు 10 మెడికల్ కాలేజీల నిర్మాణం పూర్తయినా, వాటిని ఎందుకు పీపీపీ విధానంలోకి నెడుతున్నారు?" అని సజ్జల ప్రశ్నించారు. ప్రైవేట్ వ్యక్తులు ఉచితంగా వైద్యం ఎందుకు చేస్తారని, ఇది కేవలం కార్పొరేట్ శక్తులకు మేలు చేయడానికేనని విమర్శించారు. చంద్రబాబు ఎన్నికల ముందు ఒక మాట, అధికారంలోకి వచ్చాక మరో మాట చెప్పడం అలవాటుగా మార్చుకున్నారని ఎద్దేవా చేశారు.

ప్రభుత్వ నిర్ణయంపై ప్రజల రెఫరెండం

మెడికల్ కాలేజీల ప్రైవేటీకరణకు వ్యతిరేకంగా వైఎస్సార్‌సీపీ పిలుపునిచ్చిన కోటి సంతకాల కార్యక్రమానికి ప్రజల నుంచి అనూహ్య స్పందన లభించిందని సజ్జల తెలిపారు. కేవలం రెండు నెలల్లోనే కోటికి పైగా ప్రజలు స్వచ్ఛందంగా వచ్చి సంతకాలు చేశారని, ఈ నిర్ణయాన్ని ప్రజలు ఒక 'రెఫరెండం'లా భావించారని పేర్కొన్నారు. ప్రజల ప్రాణాలతో చంద్రబాబు చెలగాటం ఆడుతున్నారని, ఈ కుట్ర వెనుక పెద్ద ఎత్తున నిధుల మళ్లింపు ఉందన్నారు.

మంత్రి సత్యకుమార్ వ్యాఖ్యలకు కౌంటర్

పార్లమెంటు స్టాండింగ్ కమిటీ పీపీపీకి వెళ్లమని చెప్పిందని చంద్రబాబు చెప్పడం హాస్యాస్పదమన్నారు. అలాగే, 108, 104 సేవలను పీపీపీకి ఇవ్వలేదా అని మంత్రి సత్యకుమార్ ప్రశ్నించడంపై స్పందిస్తూ.. ఆ సేవలు ప్రజలకు ఉచితంగా అందుతున్నాయని, కానీ మెడికల్ కాలేజీలను అమ్మేయడం ప్రజలకు తీవ్ర ద్రోహం చేయడమేనని స్పష్టం చేశారు. వైద్యం విషయంలో మరో ప్రత్యామ్నాయం ఉండకూడదని, అది కేవలం ఉచితంగా మరియు ఉత్తమంగా మాత్రమే ఉండాలని సజ్జల పేర్కొన్నారు. రాష్ట్ర ప్రయోజనాలను తాకట్టు పెడుతున్న చంద్రబాబుకు ఏమాత్రం పాపభీతి లేదని, ప్రజలు త్వరలోనే దీనికి తగిన బుద్ధి చెబుతారని ఆయన హెచ్చరించారు.