మొక్కజొన్న రైతులకు అచ్చెన్నాయుడు భరోసా

మొక్కజొన్న రైతుల కోసం ప్రభుత్వం ప్రత్యేక చర్యలు తీసుకుంటుంది. మంత్రి అచ్చెన్నాయుడు గురువారం ఈ విషయాన్ని చెప్పారు. మొక్కజొన్న కొనుగోలు అంశంపై వ్యవసాయశాఖ ఉన్నతాధికారులు, ప్రైవేటు సంస్థల ప్రతినిధులతో వీడియో కాన్ఫరెన్స్‌ నిర్వహించారు. కొనుగోళ్ల విషయంలో కేంద్ర ప్రభుత్వ అనుమతి కోసం ప్రయత్నిస్తున్నట్లు తెలిపారు.

ఏపీ మార్క్‌ఫెడ్‌ ద్వారా కనీస మద్దతు ధర సేకరణకు ప్రతిపాదనలు పంపామన్నారు. పౌల్ట్రీ, విత్తన, ఫార్మా సంస్థలు కొనుగోలును మ‌రింత వేగ‌వంతం చేయాల‌న్నారు. మొక్కజొన్న సేకరణ కోసం ప్రభుత్వానికి ప్రతిపాదన సమర్పించామని తెలిపారు. ఈ విడత 1.42 లక్షల హెక్టార్లలో పంట సాగు చేయగా.. 8.18 లక్షల మెట్రిక్‌ టన్నుల దిగుబడి వచ్చినట్లు అధికారులు అంచనా వేశారు.

రాజధాని రైతుల సమస్యల పరిష్కారానికి కృషి...

ఇదిలా ఉండగా, రాజధాని రైతుల (Amaravati Farmers) సమస్యల పరిష్కారంపై త్రిసభ్య కమిటీ మరోసారి సమావేశమైంది. జరీబు - మెట్ట భూముల అంశం, గ్రామ కంఠాలు, అసైన్డ్, లంక భూముల రైతుల సమస్యల పరిష్కారంపై చర్చించారు. వీలైనంత వరకు త్వరితగతిన సమస్యలు పరిష్కారంపై కమిటీ దృష్టి పెట్టింది. రైతుల ప్లాట్లకు హద్దు రాళ్లు వేసి వెంటనే అభివృద్ధి పనులు చేపట్టేలా చర్యలు తీసుకోవాలని కమిటీ నిర్ణయించింది. గుంటూరు, మంగళగిరి నుంచి అమరావతికి వచ్చే రోడ్ల అభివృద్ధిపైనా కమిటీలో చర్చ జరిగింది.

ఎల్లుండి (ఈనెల 29) ఉదయం మరోసారి సమావేశం కావాలని కమిటీ నిర్ణయించింది. ఈ సమావేశానికి కేంద్ర, రాష్ట్ర మంత్రులు పెమ్మసాని, నారాయణ, ఎమ్మెల్యే శ్రావణ్ కుమార్, అధికారులు హాజరయ్యారు.

ఈనెల 22న తొలి సమావేశం జరుగగా.. ఆరునెలల్లో రైతుల సమస్యలు పరిష్కరిస్తామని కమిటీ సభ్యులు హామీ ఇచ్చారు. కేంద్రమంత్రి పెమ్మసాని అధ్యక్షతన సమావేశం జరిగింది. సమస్యలను ఏ విధంగా పరిష్కరించాలన్న దానిపై సమావేశంలో చర్చించింది. రైతులు ఎవరూ అపోహలు నమ్మవద్దని కమిటీ విజ్ఞప్తి చేసింది. 6 నెలల్లో సమస్యలను పరిష్కరిస్తామని కేంద్రమంత్రి పెమ్మసాని స్పష్టం చేశారు.

అమరావతి రాజధానికి భూమి ఇచ్చిన రైతులు తీవ్ర అసంతృప్తితో తీవ్ర స్థాయిలో ఆరోపణలకు దిగిన నేపథ్యంలో ఆయన ఈ విషయాన్ని చెప్పారు.