నా పొగరు అణిగింది, క్షమించండన్న ప్రవీణ్ ప్రకాశ్

అధికారంలో ఉన్నప్పుడు మనిషిలో గర్వం, అహంకారం సహజం. దాన్ని అదుపులో పెట్టుకుని నడుచుకునే వారే గొప్పవారు. అందుకే మనవాళ్లు పశ్చాతాపాన్ని మించిన శిక్ష లేదంటారు. ఇప్పుడు ఐఎఎస్ అధికారి ప్రవీణ్ ప్రకాష్ విషయంలో అదే జరిగింది. వైసీపీ అధికారంలో ఉన్నప్పుడు ఆయన చెలరేగిపోయారు. తన ఇష్టం వచ్చినట్టు వ్యవహరించారన్న ఆరోపణలు వచ్చాయి. దాని మూలంగా అటు ప్రజలు ఇటు కొందరు అధికారులు కూడా ఇబ్బందులు పడ్డారు. అలా ప్రవీణ్ ప్రకాశ్ బారిన పడి బాధ పడిన వారిలో ఇద్దరు అధికారులు ఉన్నారు. వారిలో ఒకరు ఐఆర్ఎస్ అధికారి జాస్తి కృష్ణ కిషోర్, మరొకరు ఇంటెలిజెన్స్ మాజీ చీఫ్ ఏబీ వెంకటేశ్వరరావు.

ఐఏఎస్ అధికారి ప్రవీణ్ ప్రకాశ్ బహిరంగ క్షమాపణలు చెప్పిన వీడియోతో ఆంధ్రప్రదేశ్ పరిపాలనా వర్గాల్లో కీలక చర్చ మళ్లీ తెరపైకి వచ్చింది. వైఎస్సార్‌సీపీ ప్రభుత్వం కాలంలో తాను చేసిన తప్పులకు బాధ్యత వహిస్తూ, ఐఆర్ఎస్ అధికారి జాస్తి కృష్ణ కిషోర్, ఇంటెలిజెన్స్ మాజీ చీఫ్ ఏ.బీ. వెంకటేశ్వరరావుకు క్షమాపణలు కోరిన ప్రవీణ్ ప్రకాశ్- ఒక్క తప్పుతో హీరో నుంచి విలన్‌గా మారిపోయాను, అందుకే వి.ఆర్‌.ఎస్‌కు దరఖాస్తు చేసుకున్నాను- అని తప్పు ఒప్పుకున్నారు. “30 ఏళ్లు సేవ చేశాను, అక్రమంగా ఒక రూపాయి సంపాదించలేదు” అని చెబుతూ, తన ప్రవర్తన వల్ల జరిగిన నష్టాన్ని తాను పశ్చాత్తాపంగా స్వీకరిస్తున్నానని తెలిపారు.

ఏం జరిగింది?

జాస్తి కృష్ణ కిషోర్ (ఐఆర్ఎస్): ఆంధ్రప్రదేశ్ ఎకనామిక్ డెవలప్మెంట్ బోర్డు (APEDB)తో పాటు పలు ఆర్థిక అభివృద్ధి ప్రాజెక్టుల్లో కీలక పాత్ర పోషించారు. వైఎస్సార్‌సీపీ అధికారంలోకి వచ్చిన తర్వాత, ఆయనపై రాష్ట్ర విచారణ సంస్థలు పలు కేసులు మోపింది.

ఇక, ఏ.బీ. వెంకటేశ్వరరావు (మాజీ ఇంటెలిజెన్స్ చీఫ్). 2020లో కొన్ని పరికరాల కొనుగోలు, సేకరణలో అక్రమాలు చేశారన్న ఆరోపణలపై రాష్ట్ర ప్రభుత్వం ఆయన్ను సస్పెండ్ చేసింది. ఆయన ఈ చర్యలను కోర్టుల్లో సవాల్ చేసి, తరువాతి దశల్లో ఉపశమనం పొందారు. కానీ ఆ సమయంలో జారీ అయిన ఆర్డర్లు, మీడియా బ్రీఫింగులు, సర్వీస్-రిలేటెడ్ కదలికలన్నీ కలిసి అధికార ప్రతిష్ఠ, కెరీర్‌కు గట్టి దెబ్బగా మారాయి. దీనికి కూడా ప్రవీణ్ ప్రకాశ్ కీలకం అన్న ఆరోపణలు వినిపించాయి.

“సోషల్ మీడియాలో దారుణంగా ట్రోల్ అయిపోయాక ‘నేను ఎక్కడ తప్పుచేశాను?’ అని లోతుగా ఆలోచించాను. సమాజం పెట్టిన పరీక్షలో ఫెయిల్ అయ్యానని అర్థమైంది. అదే నా వి.ఆర్‌.ఎస్‌కి కారణం.”

“జాస్తి కృష్ణ కిషోర్‌గారికి, ఏ.బీ. వెంకటేశ్వరరావుగారికి మనస్ఫూర్తిగా క్షమాపణలు.” అన్నారు ప్రవీణ్ ప్రకాశ్

వ్యక్తిగతంగా క్షమాపణ చెప్పడం ధైర్యం. కానీ పాలనలో “సిస్టమ్ ఎరర్” ఎక్కడ జరిగిందన్నది అసలు పాఠం. అధికారంలో ఉన్నప్పుడు- ఫైలు వేగం, విచారణల తీవ్రత, మీడియా నారేటివ్- ఇవన్నీ కలిసి ఒక వ్యక్తి ప్రతిష్ఠ/కుటుంబాలు పడే క్షోభను మనం లెక్కించలేం అంటున్నారు ప్రవీణ్ ప్రకాశ్.

ఈ సంఘటన “అధికార దర్పం vs న్యాయం/ప్రక్రియ” మధ్య సున్నితమైన రేఖను గుర్తు చేస్తోంది. కఠిన చర్యలు అవసరమే కానీ “దర్యాప్తు- యాక్షన్- కమ్యూనికేషన్” అనే మూడింటి సమన్వయంతో, ముందస్తు తీర్పుల్లేకుండా జరగాలి.

ఇది పేర్ల కథ మాత్రమే కాదు. ఇది పరిపాలన నైతికత (Administrative Ethics) కథ. ప్రతి కఠిన నిర్ణయానికి ముందు మనుషుల జీవితం మరో వైపు ఉందన్న స్పృహ లేకపోతే చాలా నష్టపోవాల్సి వస్తోందనేది ఏబీ, జాస్తి కేసుల్లో నిరూపణ అయిది. ప్రవీణ్ ప్రకాశ్ బహిరంగ పశ్చాత్తాపం వ్యక్తిగతంగా ఒక ముందడుగు మాత్రమే. పరిపాలన పరంగా “ప్రాసెస్ కరెక్షన్” అవసరమని ఈ ఉదంతం నిరూపిస్తోంది.

తప్పు చేసినవాడు క్షమాపణ చెప్పడం సాహసమే కానీ వ్యవస్థ అదే తప్పును మళ్లీ చేయకుండా చూడడమే అసలైన సంస్కరణ అవుతుంది.