IND vs SA: దక్షిణాఫ్రికాను దడదడలాడించిన టీమ్ ఇండియా
15.5 ఓవర్లలో 118 పరుగుల లక్ష్యాన్ని ఛేదించిన ఇండియా
By : Amaraiah Akula
Update: 2025-12-14 16:47 GMT
ధర్మశాల వేదికగా జరిగిన కీలకమైన మూడో టీ20లో టీమ్ ఇండియా సంపూర్ణ ఆధిపత్యం ప్రదర్శించింది. అటు బౌలింగ్లో, ఇటు బ్యాటింగ్లో సౌతాఫ్రికాను పూర్తిగా కట్టడి చేసిన భారత్, 118 పరుగుల లక్ష్యాన్ని 15.5 ఓవర్లలోనే ఛేదించి ఘన విజయం సాధించింది. ఏడు వికెట్ల తేడాతో విజయం సాధించింది. ఈ విజయంతో ఐదు మ్యాచ్ల టీ20 సిరీస్లో భారత్ 2-1తో ఆధిక్యంలో నిలిచింది.
టాస్ ఓడి ముందుగా బ్యాటింగ్కు దిగిన సౌతాఫ్రికా 117 పరుగులకే ఆలౌట్ అయింది. భారత బౌలర్లు ఆరంభం నుంచే ఒత్తిడి పెంచారు. తొలి ఓవర్లోనే అర్ష్దీప్ సింగ్ రీజా హెండ్రిక్స్ (0)ను ఎల్బీడబ్ల్యూగా వెనక్కి పంపాడు. ఆ తర్వాత హర్షిత్ రాణా క్వింటన్ డి కాక్ (1)ను ఔట్ చేశాడు.
3.1 ఓవర్కే డెవాల్డ్ బ్రెవిస్ (2) క్లీన్బౌల్డ్ కావడంతో సౌతాఫ్రికా 7 పరుగులకే మూడు వికెట్లు కోల్పోయింది.
ఒక్కడే పోరాడిన మార్క్రమ్
పవర్ప్లే ముగిసే సరికి సౌతాఫ్రికా స్కోరు 25/3. కెప్టెన్ ఐడెన్ మార్క్రమ్ కొంతసేపు క్రీజులో నిలిచి ఇన్నింగ్స్ను నిలబెట్టే ప్రయత్నం చేశాడు. దక్షిణాఫ్రికా తరఫున చెప్పుకోదగిన స్కోర్ చేసింది మార్క్రమ్ ఒక్కడే.
హార్దిక్కు వందో వికెట్.. స్పిన్నర్ల కట్టడి
ఏడో ఓవర్లో హార్దిక్ పాండ్య బౌలింగ్లో ట్రిస్టన్ స్టబ్స్ (9) జితేష్ శర్మకు క్యాచ్ ఇచ్చాడు. ఇది హార్దిక్కు అంతర్జాతీయ టీ20ల్లో వందో వికెట్ కావడం విశేషం.
వరుణ్ చక్రవర్తి, కుల్దీప్ యాదవ్ మధ్య ఓవర్లలో పరుగుల వరదను ఆపేశారు. 10 ఓవర్లకు సౌతాఫ్రికా 44/4 వద్దే నిలిచింది. డొనావన్ ఫెరీరా కొంత పోరాటం చేసినా, 13.3 ఓవర్కు వరుణ్ బౌలింగ్లో ఫెరీరా (20) క్లీన్బౌల్డ్ అయ్యాడు. చివరకు సఫారీ ఇన్నింగ్స్ 123 పరుగుల వద్ద ముగిసింది.
లక్ష్యఛేదనలో అభిషేక్ దూకుడు
118 పరుగుల లక్ష్యంతో బరిలోకి దిగిన భారత్ ఆరంభం నుంచే దూకుడుగా ఆడింది. తొలి బంతికే అభిషేక్ శర్మ సిక్స్ బాది సంకేతమిచ్చాడు. మార్కో యాన్సెన్ వేసిన రెండో ఓవర్లో 4, 6 బాదుతూ అభిషేక్ స్కోర్ వేగాన్ని పెంచాడు.
పవర్ప్లేలోనే భారత్ 60 పరుగులు చేసింది. 5.2 ఓవర్కు అభిషేక్ శర్మ (35; 18 బంతుల్లో) ఔట్ అయినా, అప్పటికే మ్యాచ్ భారత్ వైపు వాలిపోయింది.
గిల్–తిలక్ జోడీతో సులువైన విజయం
శుభ్మన్ గిల్ క్రీజులో నిలకడగా ఆడాడు. తిలక్ వర్మ కీలక షాట్లతో లక్ష్యాన్ని దగ్గర చేశాడు. 8 ఓవర్లకు భారత్ స్కోరు 83/1గా ఉంది. చివరకు 15 ఓవర్లలోనే లక్ష్యాన్ని ఛేదించి భారత్ విజయఢంకా మోగించింది.
బుమ్రా జట్టుకు దూరం.. హర్షిత్ రాణాకు అవకాశం
ఈ మ్యాచ్కు ముందు టీమ్ ఇండియాకు ఊహించని షాక్ తగిలింది. స్టార్ పేసర్ జస్ప్రీత్ బుమ్రా వ్యక్తిగత కారణాలతో జట్టును వీడాడు. ఈ విషయాన్ని BCCI అధికారికంగా వెల్లడించింది. బుమ్రా స్థానంలో యువ పేసర్ హర్షిత్ రాణా తుది జట్టులోకి వచ్చాడు. స్పిన్ ఆల్రౌండర్ అక్షర్ పటేల్ కూడా ఈ మ్యాచ్కు దూరమయ్యాడు.
తుది జట్లు
దక్షిణాఫ్రికా:
రీజా హెండ్రిక్స్, క్వింటన్ డి కాక్ (వికెట్కీపర్), ఐడెన్ మార్క్రమ్ (కెప్టెన్), డెవాల్డ్ బ్రెవిస్, ట్రిస్టన్ స్టబ్స్, డోనోవన్ ఫెరీరా, మార్కో జాన్సెన్, కార్బిన్ బాష్, అన్రిచ్ నోర్ట్జే, లుంగి ఎంగిడి, ఒట్నీల్ బార్ట్మన్
భారత్:
అభిషేక్ శర్మ, శుభ్మన్ గిల్, సూర్యకుమార్ యాదవ్ (కెప్టెన్), తిలక్ వర్మ, హార్దిక్ పాండ్యా, శివమ్ దూబే, జితేష్ శర్మ (వికెట్కీపర్), హర్షిత్ రాణా, అర్ష్దీప్ సింగ్, కుల్దీప్ యాదవ్, వరుణ్ చక్రవర్తి