AI కూడా మీ చేతిలో కీలుబొమ్మే, భావి ఈక్వేషన్ AI + HI

ప్రపంచం వేగంగా మారుతోంది. ప్రతి ఉదయం ఒక కొత్త ఆవిష్కరణ మన ముందుకొస్తోంది. ప్రస్తుతం ఎక్కువగా వినిపిస్తున్న పదం – కృత్రిమ మేధ లేదా Artificial Intelligence (AI). కొందరికి ఇది భయపెట్టే పదం. మరికొందరికి ఇది కొత్త తలుపులు తెరుస్తున్న ఆశాకిరణం. కానీ నిజం ఏమిటంటే – AI మనిషిని భర్తీ చేయడం కాదు, అతను లేదా ఆమె మేధను విస్తరించడం.

భారతదేశం ఈ మార్పులో ముందున్న దేశం. ప్రపంచ ఐటీ రంగంలో భారత్ స్థానాన్ని ఎవరూ తోసిపుచ్చలేరు. ప్రస్తుతం ప్రపంచ వ్యాప్తంగా ఉన్న సాఫ్ట్‌వేర్ ఇంజనీర్లలో దాదాపు 28 శాతం మంది భారతీయులు. గూగుల్ సుందర్ పిచాయ్, మైక్రోసాఫ్ట్ సత్య నాదెళ్ల, ఐబీఎం అరవింద్ కృష్ణ, అడోబ్ శాంతను నారాయణ్- వీరందరూ భారత మేధా శక్తికి ప్రతీకలు.

Invest India ప్రకారం, 2023లో భారతదేశంలో 3,000కి పైగా AI స్టార్ట్‌అప్స్ నమోదు అయ్యాయి. వీటిలో ఎక్కువగా హెల్త్‌కేర్, ఫైనాన్స్, వ్యవసాయం, విద్య, రక్షణ రంగాల్లో ఉన్నాయి. 2024లో వీటిలోకి 12 బిలియన్ అమెరికన్ డాలర్ల పెట్టుబడులు వచ్చాయి. PwC అంచనా ప్రకారం, 2030 నాటికి భారత AI పరిశ్రమ విలువ 957 బిలియన్ డాలర్లకు చేరవచ్చు. దేశ GDPలో ఇది దాదాపు 10%.

AIతో పాటు, భారత మేధ కూడా వేగంగా మారుతోంది. TCS తమ మొత్తం పరిశోధన ఖర్చులో 30% AIకి కేటాయించింది. Infosys Topaz ప్లాట్‌ఫామ్ ద్వారా 50,000 మంది ఉద్యోగులు మళ్లీ శిక్షణ (Retraining) పొందుతున్నారు. Wipro “AI360” ప్రోగ్రామ్‌లో $1 బిలియన్ పెట్టుబడి పెట్టింది. Tech Mahindra స్థానిక భాషల్లో AI మోడల్స్ రూపొందిస్తోంది. Zoho CEO శ్రీధర్ వెంబు మాటల్లో చెప్పాలంటే- “AI మనిషి చేతిని కాదు, అతని మేధను పొడిగిస్తుంది.”

World Economic Forum ప్రకారం, 2025 నాటికి AI వలన ప్రపంచవ్యాప్తంగా 85 మిలియన్ ఉద్యోగాలు పోతాయి, కానీ 97 మిలియన్ కొత్త ఉద్యోగాలు పుడతాయి. వాటిలో 15% భారత్‌లోనే. కొత్త ఉద్యోగాలు- Prompt Engineers, AI Trainers, Human-AI Interaction Designers, Model Ethics Auditors. అంటే, భవిష్యత్ ఉద్యోగాలు యంత్రం లెక్కలు నేర్చుకున్నా, నిర్ణయాలు మాత్రం మనిషి తీసుకునే రంగాలే.

2024లో భారత AI స్కిల్లింగ్ ఇండెక్స్ 31% పెరిగింది. LinkedIn Global Skills Report ప్రకారం, భారత్ AI అవగాహనలో 160 దేశాలలో 6వ స్థానంలో ఉంది. IITలు, IIITలు, NITలు AI కోర్సులను ప్రవేశపెట్టాయి. IIT హైదరాబాద్, IIT మద్రాస్ ఇప్పటికే AI ప్రత్యేక డిగ్రీలను అందిస్తున్నాయి. 2025 నాటికి భారత్‌లో 2 మిలియన్ AI ప్రొఫెషనల్స్ ఉండవచ్చని అంచనా.

AI పెట్టుబడుల్లో నగరాల పాత్ర కీలకం. హైదరాబాద్, బెంగళూరు, పుణే, నోయిడా, గుజరాత్ - ఈ ఐదు నగరాలు భారత AI ఎకోసిస్టమ్‌కు గుండెకాయలాంటివి.

హైదరాబాద్‌లో Microsoft, Google తమ AI R&D కేంద్రాలను విస్తరించాయి. బెంగళూరులో DeepMind, Accenture కొత్త AI హబ్‌లు ఏర్పాటు చేశాయి. పుణేలో Tata Elxsi, Persistent Systems 2024లో AI ఉత్పత్తుల విభాగాలను ప్రారంభించాయి.

Digital India FutureLABS, AI for Bharat, National AI Mission- ఈ ప్రభుత్వ కార్యక్రమాలు AIని గ్రామీణ, విద్య, వ్యవసాయ రంగాలకు తీసుకెళ్తున్నాయి. రైతులకు AI ఆధారిత వాతావరణ అంచనాలు, విద్యార్థులకు వ్యక్తిగత అధ్యయన విశ్లేషణ, వైద్య రంగంలో ప్రాథమిక నిర్ధారణ సిస్టమ్స్- ఇవన్నీ భారత మేధా ఆవిష్కరణలు.

భారత ప్రభుత్వం “AI in Bharat 2047 Vision” పథకాన్ని ప్రకటించింది. ఇందులో లక్ష్యం- AI ద్వారా సమగ్రాభివృద్ధి. ఆరోగ్యం, విద్య, న్యాయం, వ్యవసాయం, పట్టణ పాలన, స్మార్ట్ మౌలిక వసతులు – ప్రతి రంగంలో AIని అనుసంధానం చేయడం. NITI Aayog అంచనా ప్రకారం, ఈ పథకం ద్వారా వచ్చే రెండు దశాబ్దాల్లో 50 మిలియన్ కొత్త ఉద్యోగాలు సృష్టించవచ్చు.

AIలో పెట్టుబడులు రికార్డు స్థాయిలో పెరిగాయి. SoftBank, Tiger Global, Sequoia, Accel వంటి సంస్థలు భారత AI స్టార్ట్‌అప్స్‌లో పెట్టుబడులు 118% పెంచాయి. Fractal Analytics, Grene Robotics, Mad Street Den, Niramai Health Analytica వంటి సంస్థలు అంతర్జాతీయ గుర్తింపు పొందుతున్నాయి. 2024లో 8 భారత AI సంస్థలు యూనికార్న్ స్థాయికి చేరుకున్నాయి.

AI ప్రభావం కేవలం ఐటీ రంగంలో మాత్రమే కాదు. భారతీయ ఔషధ పరిశ్రమలో AI ఆధారిత Drug Discovery ప్రాజెక్టులు 45% వేగంగా పురోగమిస్తున్నాయి.

Mahindra, Tata, Maruti వంటి ఆటోరంగ తయారీ సంస్థలు AI ఆధారిత క్వాలిటీ కంట్రోల్, ప్రిడిక్టివ్ మెయింటెనెన్స్‌ను ఉపయోగిస్తున్నాయి. DRDO, HAL AI ఆధారిత సిమ్యులేషన్ టెక్నాలజీని రక్షణ రంగంలో ప్రవేశపెట్టాయి.

చివరకు ఆల్కహాల్ తయారీ చేసే ఫ్యాక్టరీలు సైతం ఏఐని ఉపయోగిస్తున్నాయి. క్వాలిటీ కంట్రోల్ మొదలు ఏయే దశల్లో ఏయే వస్తువులు కలపాలో కూడా నిర్ణయిస్తున్నాయి.

AI పాలన (AI Governance) ఇప్పుడు ప్రధాన అంశం. యంత్రం నేర్చుకుంటుంది కానీ విలువలు నేర్చుకోదు. భారతీయ మేధ ఈ లోటును భర్తీ చేస్తుంది. AI వ్యవస్థలు నైతికంగా పనిచేయాలంటే మానవ పర్యవేక్షణ అవసరం. అందుకే భారత్ AI నియంత్రణ చట్టాలు, డేటా గోప్యతా విధానాలు, నైతిక ప్రమాణాలను రూపొందిస్తోంది.

AI కి భయపడకూడదు, దాన్ని అర్థం చేసుకోవాలి. భయపడితే అది మన స్థానాన్ని తీసుకుంటుంది, అర్థం చేసుకుంటే మన శక్తిని పదింతలు పెంచుతుంది. AI మన చేతిలో ఉంటే- మన ఆలోచన, మన సృజనాత్మకత, మన కరుణ, మన భవిష్యత్తును నిర్ణయిస్తుంది.

Gen Z ఈ విప్లవానికి యజమానులు. వారు AI కి భయపడరు, దాన్ని వాడుతారు. ChatGPT, Gemini, Copilot- ఇవి వారి రోజువారీ పనిలో భాగం. కానీ ఈ సాధనాల కంటే గొప్పది- వాటిని ఉపయోగించే మనిషి దృష్టి. భారత యువత “AI వర్క్‌ఫోర్స్” కాదు, “AI లీడర్‌షిప్ వర్క్‌ఫోర్స్.” వారు సాఫ్ట్‌వేర్ రాస్తారు, కానీ దాని వెనుక విలువను సృష్టిస్తారు.

భారత విద్యా వ్యవస్థ కూడా మారుతోంది. NEP 2020 ప్రకారం, AI, Data Science, Robotics కోర్సులు స్కూల్ స్థాయి నుంచే రానున్నాయి. గ్రామీణ విద్యార్థులు కూడా ఇప్పుడు AI ల్యాబ్‌లలో శిక్షణ పొందుతున్నారు. AI బేసిక్స్ ఇప్పుడు ఇంజనీరింగ్ మాత్రమే కాదు, సాధారణ విద్యలో భాగమవుతోంది. 2030 నాటికి ప్రతి కళాశాలలో AI ల్యాబ్ ఉండేలా లక్ష్యం నిర్ణయించారు.

భారతీయ కార్మికుడు భర్తీ చేయలేనివాడు ఎందుకంటే అతనిలో కేవలం నైపుణ్యం మాత్రమే కాదు, విలువ ఉంది. అతను కోడ్ రాస్తాడు, ఆ కోడ్ వెనుక ఉన్న మానవతనూ గుర్తుపెడతాడు. అతను యంత్రాలతో పని చేయడు, వాటితో ఆలోచిస్తాడు. AI వేగం ఇస్తుంది, భారతీయుడు ఆ వేగానికి హృదయాన్ని ఇస్తాడు.

AI భవిష్యత్తు పరిశ్రమలను మలుస్తుంది. 2024లో మాత్రమే, AI ఆధారిత సాంకేతికతల వలన భారత ఎగుమతులు 7.5 బిలియన్ డాలర్లు పెరిగాయి. Manufacturing, Defence, Agriculture, Urban Tech, Space Research — ప్రతి రంగంలో AIకి మానవ మేధ జత అవుతోంది.

AI మనకు వేగం ఇచ్చింది, కానీ మనసు మాత్రం మనదే. అదే మన శక్తి. అదే మన భవిష్యత్తు. AI మన ఇంజిన్ అయినా డ్రైవర్ మాత్రం మనమే. భారతీయ మేధా శక్తి భర్తీ చేయలేనిది. ఎందుకంటే ఆ శక్తి యంత్రంలో ఉండదు మన మనసులో ఉంటుంది.

ఫోన్ : 9640612057

aordsreddy@gmail.com)